Nyinika 31

1Naawen yaa jam weeni Moosis ayen, 2<<Nya mi lueri ka Bezalel Uri nidoabinni ate wa kokpieŋka a chim Yur a nyini Juda dɔkku la, 3ate mi sueri wa ale Wen Chiika ale tuima sebika ale wie miŋka yam a bo nisa tuima meena po la 4ate wa baga a pai ligmɔniŋ ale kpana ale kutuk mɔnuŋ a ŋmirisi ŋa a magsi tuima meena po 5wa baga a gebi tintana, wa ale baga a tom daata tuima ale nisa tuima meena. 6Mi ŋman yeeri ka Oyoliab Ayisamak nidoabinni ale nyini Dan dɔkku la ayen wa maari wa. Mi ŋman te sebika baai meena ale ta nisa tuima la ayen ba nye dii meena ate mi weeni fi la. 7Tuka viuku ale nɔiyeŋka dakanni ale biem duisi basika nanlikka ale viuku ŋanta mbala meena 8ale jazaanimu ale ku ŋantaŋa ale cheri ligmɔniŋ jazaanimu ale ku ŋantaŋa meena kuŋkuŋku ate ba a ju nyum masik du la, 9ale kuŋkuŋku ate ba a nye juka tiirimu la ale ku ŋantomtaŋa ale chin kpienni ale di jazaanimu 10ale garuk tii ate ba yɔk la tuilum gatta buyewa ale magsi Aaron ase kaabteerɔ la ale wa nidoabilisaŋa gattaŋa ase ba nin boro a tom ase kaabteerɔba la 11ale bobika kpaam ŋan baai nyum ale masa la a magsi jigi dii ale ta tuilum la. Ba a magsi ba nye ba ase ka dii dek ate m weeni fu la.>>

12Ate Naawen yaa weeni Moosis ayen, 13<<Biisi a te Izirali demma ayen, <Ku a fɛ ate ni kpesi ta Vuusum Daaŋa. Kude ale chim ka daana mi ale nama suŋsuŋ a te gaŋ sii ale cheen la, ate nama ale seba ayen ka Mi ale Naawen dii ale gaari ni la.

14<< <Ni kpesi Vuusum Danni, dii nyiŋla di ta tuilum kama a te ni. Nuru waai ale a zɛri ku la, ni ko wa. Nuru waai ale a tom tuini di danni la, ku a fɛ ate ni yiak wa wa nuruma po a basi. 15Daa ŋayuebi, ni pai a tom tuima, alege daa ŋayopɔiwa danni ka Vuusum Dai a ta tuilum a te Naawen. Nuru waai ale a tom tuima Vuusum Danni la, ku a fɛ ate ba ko wa. 16Izirali demma a kpesi Vuusum Danni, a dɛ tigini ate gaŋ sii ale cheen la ku chim wa dii ale di boro a benni ase nɔiyeŋ la. 17Ku le chim ka daana mi ale Izirali demma suŋsuŋ taam wuu, ka daa ŋayuebi ate Naawen a pai nye wenŋmazukku ale tɛŋzuk de, daa ŋayopɔiwa danni wa basi tuima kama ale vuusi.>>>

18Ase Naawen ale jam biisi ale Moosis Sinai Guuku zuk a ga nueri la, wa yaa te wa tintain paglaksa siyewa ate wa wanni a bo ŋa zuk la, tintain paglaksaŋa ate Wen a pai wa nandub a ŋmarisi la.

Currently Selected:

Nyinika 31: BWU

Highlight

Copy