Nyinika 30

1<<Yaali siik daata a nye kuŋkuŋ a magsi ŋan baai nyum ale masa la juka. 2Nye ku ŋmɔgluk ŋmɔgluga, ate ku woglimmu a paari anamagib buye ate ku labsimu a paari anamagib buye, ku juelika a paari anamagib bunaansi. Nye ku nyiilaŋa mɛ ale daataŋa. 3Pa cheri ligmɔniŋ a taari ku ŋmanni ale ku ganaŋa ale nyiilaŋa abe fi pai ligmɔniŋ a gebiri gilim ku. 4Nye ligmɔniŋ baŋsa siye a basi ba le gebiri juijui ale ligmɔniŋka la kinni po ate siye a bo gauŋ kunyi meena a yik dawoŋtaŋa ate ba yik a ji la. 5Nye siik dawoŋta a pai ligmɔniŋ a taari ti. 6Pai kuŋkuŋku a zaani garuk panni niŋ ale moata nɔiyeŋka dakanni la biem duisi basika nanlikka niŋ ale lik nɔiyeŋka dakanni nɔi la, juijui ate m le tu fu la.

7<<Ku a fɛ ate Aaron a ju ŋan baai nyum ale masa la kuŋkuŋku zuk saluik meena ase wa nin jam wa nya zeuŋtaŋa zuk. 8Ku a fɛ ate wa ju ŋan baai nyum ale masa la ase wa nin jo wa tɔti zeuŋtaŋa junɔi, ate ŋan baai nyum ale masa la a kasim a de Naawen niŋ a te ŋaaŋbiik sii ale cheen la. 9Kuŋkuŋku de zuk kan ju nyum yoŋ yaase juka tiirim yoŋ yaase ŋandiinta tiirim yoŋŋoa, abe fi kan kpiiri nyuka tiirim ku zuwa. 10Benni po bunyi ate Aaron a nye biem duisi basika kaabka kuŋkuŋku nyiilaŋa zuk. Benni po biem duisi basika de, ku a fɛ ate ba pai biem tiirim ziimu a nye biem duisi basika a te Naawen a te ŋaaŋbiik sii ale cheen la. Bu ŋmasi ta tuilum kama a te Naawen.>>

11Ate Naawen a yaa weeni Moosis ayen, 12<<Ase fi dan chiini Izirali demma, ku a fɛ nuru yeŋ meena a tuni wa nyuvuri a nyini diipo ate fi chiini wa la. Ate nyiŋtuila a kan jam ba jigi diipo ate fi chiini ba la. 13Nuru waai a dan gaam cheŋ baai ate ba chiini la po, wa tuni Puusika Yenni ligni geli, a magsi chaab ale Puusika Yenni ligraŋa ate ŋa dobrimu a magsi chaab ale ligbie pisiye la. Tiirimu de ka Naawen ale Soa. 14Baai meena ale gaam taam la, baai ale paari bena pisiye yaase ba gaam dila la, a te Naawen ka tiirim. 15Jigsirɔma a kan te a gaam dila, ŋanjaksaŋa mɛ abe kan te pɔsimu ase nama a nin boro a te Naawen ayen wa nye biem duisi basika ni nyuvooŋa nyiŋ. 16Tuesi biem duisi basika tiirimu a nyini Izirali demma jigi a tom Tuka Viuku tuimaŋa. Ku le chim ka teerika a te Izirali demma Naawen niŋ, a nye biem duisi basika ni nyuvooŋa nyiŋ.>>

17Naawen a weeni Moosis ayen, 18<<Nye kutuk mɔnuŋ chin kpienni ale kutuk mɔnuŋ jazaanim a magsi sugrika. Pai jaamu a zaani tuka viuku ale kuŋkuŋku suŋsuŋ a ŋari nyiam a nyo du. 19Aaron ale wa bisaŋa a sugri ba nisaŋa ale ba naŋsaŋa ale nyiam dula. 20Diipo meena ate ba a jo Tuka Viuku po la, ba sugri ate ba kan kpi. Ba dan forisi moata kuŋkuŋku mɛ ayen ba te tiirim buui ate ba nye ale bolim a te Naawen la, 21ba yaa le sugri ba nisaŋa ale ba naŋsaŋa ate dila ale basi ate ba kan kpi. Kude ale chim ka wa dii ale di beni a te Aaron ale wa ŋaaŋbisaŋa ale cheena la.

22Naawen yaa weeni Moosis ayen, 23<<Pai ŋantaŋa de ate ba nyummu a masa la. Tiib sim ate dobrimu a nye ase ligbie kobsinu la, tiib ŋaaŋ pagta ate dobrimu a nye ase ligbie kobsiye ale pisinu la, kinkalama ate ŋa dobrimu a nye ase ligbie kobsiye ale pisinu la, 24tiib pagta ate dobrimu a nye ase ligbie kobsinu la, ba meena a magsi chaab ale Puusika Yenni ligraŋa ale kpaam kɔlima ŋayopɔi. 25Nye ŋantaŋa de meena ase naam bobika tuilum kpaam la. Waai ale seba kpaam tuima la, a gum ba chaab ate ba nyummu a masa. 26Pai bu kpiiri Tuka Viuku ale nɔiyeŋka dakanni nyiŋ a puusi te ba ale 27jazaanimu ale ŋanta meena ale zeuŋku ale a zaani jabuui zuk la ale kuŋkuŋku ate ba a ju ŋanta du la ale 28tiirim juka kuŋkuŋku ale ŋan baai meena ate ba ta a tom ku tuima la, chin kpienni ale di jazaanimu. 29Fi gaari ba a magsi ate ba ŋmasi ta tuilum ate jabuui meena ale a tiri ba mɛ la ale ta tuilum.

30<<Bobi Aaron ale wa nidoabilisaŋa a gaari ba a magsi ate ba tom a te mi ase kaabteerɔba la. 31Weeni a sak Izirali demma ayen, <Kude ale chim ka tuilum kpaam a te gaŋ sii ale cheen la. 32Kan pai bu a kpiiri nyo nuruba nyiŋsa be kan nye kpaam ase bu de la. Bu ta tuilum kama, fi mɛ a nya bu ase tuilum kpaam la. 33Waai dek ale a nye kpaam ase bu de la, waai dek ale pai bu a nyo nuru nyiŋ alege wa daa kaabteerɔ la, ku a fɛ ate ba yeeri wa nuruma po a nyini.> >>

34Naawen a weeni Moosis ayen, <<Pai ŋan baai nyum ale masa ase zauŋ kuŋ la ale kanbieŋsa ale chambakuurik ale ŋan baai nyum ale masa, ba meena a soa si chaab la, 35Waai ale seba kpaam tuima la a gum ba chaab a ju. Ku a magsi yesa a boro abe bu nye cheri a ta tuilum. 36Num ŋan nyuntisaŋa lɔklɔk ase zom la a nyo nɔiyeŋka dakanni ale Tuka Viuku niŋka, juijui ate mi ale tu fu la. Ku a fɛ ate fi pai ŋantaŋa de a nye ba le magsi ba nye diila. Bu ŋmasi ta tuilum kama a te fu. 37Kan nye ŋan baai nyum ale masa la a ju a te fidek ase fi le nye bade diila. Nya ba ase ba ka tuilum ŋanta la a te Naawen. 38Waai ale a nye ŋan baai nyum ale masa ase bade la, a de masim ba nyummu nyiŋla, ku a fɛ ate ba yeeri wa a nyini wa nuruma po.>>

Currently Selected:

Nyinika 30: BWU

Highlight

Copy