Nyinika 29

1<<Kude ale dii ate fi le nye a gaari ba a magsi la, ate dila ale basi ate ba tom a te mi ase kaabteerɔba la. Yik lalik paalik ale pada paalisa siye sii ale kan ta jomi la. 2Pai fi zom naliŋka gela buui ale kan ta dabinta la a nye boroborok, a pai gela a dam kpaam du a nye maasa paglaksa, a pai mbula meena a nye maasa fiisa a pai kpaam a sa. 3Pai ba a nyo kpanjɔk po a te a gum chaab ale lalikka ale padaasa siyewa. 4Ta Aaron ale wa nidoabilisaŋa a jam Viuku nansuiŋku nɔi a so ba ale nyiam. 5Pai gattaŋa a jo Aaron ale garuk peelukku, ale garuk genni garuk woŋku, garuk genni dek ale suinum jaligimmu. Pai garuk genni a jo wa ale chiak gbain dii ate ba yɔk di nalimnyiini la. 6Pai zutɔkka a vuk wa zukku a pai ligmɔniŋka jatanlaŋka a vuk zutɔkka zuk. 7Pai bobika kpaamu a kpiiri wa zuk a bobi wa ase kaabteerɔ la. 8Be ta wa nidoabilisaŋa a jam a jo ba garuk woŋta, 9a pai zutɔksa a vuk ba. Yaali garuk pala a bobi Aaron ale wa nidoabilisaŋa, kaab teka naamu ka ŋmarisi kaai ale ka a nueri. Suiku de po be bobi Aaron ale wa nidoabilisaŋa.

10<<Ta lalik a jam Tuka Viuku niŋ, ate Aaron ale wa nidoabilisaŋa a pai nisa a vi ka zuk. 11Be tɔgri ka Naawen niŋ Tuka Viuku nansuiŋku nɔi. 12Pai nandub a tiak lalikka ziimu a nyo kuŋkuŋku nyiilaŋa niŋ, abe fi pai buui ale tali la a kpiiri basi kuŋkuŋku tɛŋka. 13Pai kpapalaŋa meena ale bo ponni po la, ju ale paŋni kauk ale yiimaŋa ŋayema ale kpapalaŋa a ju kuŋkuŋku zuk. 14Alege lalikka ale ka gbainni ale lammu ale puutaŋa wa ta nyini ba boka jigini peelim a ju. Ku ka biem tiirim.

15<<Yik padaasaŋa kanyi ate Aaron ale wa nidoabilisaŋa a pai nisa a vi ka zukku zuk. 16Ba tɔgri ka a pai ziimu a misi kuŋkuŋku ganaŋa meena. 17Boanni padiaka bunabuna a sugri ka ponni po ŋantaŋa ale naŋsaŋa a pa ba a gum zukku ale gela nŋala po. 18Ju padiaka meena kuŋkuŋku zuk. Ku ka juka tiirim a te Naawen, nyum buui ale masa la, tiirim ate ba nye ale bolim a te Naawen.

19<<Yik padiak m kala ale Aaron ale wa nidoabilisaŋa ate ba le pai nisa a vi ka zuk. 20Ba le tɔgri ka, a tiak ziimu gela a sa Aaron ale wa nidoabilisaŋa juga tueŋa kie ale ba juga nandub doataŋa ale ba nandub doataŋa. Pai ziimu a misi kuŋkuŋku ganaŋa meena. 21Yaa pai ziimu gela a nyini kuŋkuŋku zuk ale bobika kpaamu gela a misi Aaron ale wa gattaŋa nyiŋ abe fi misi wa nidoabilisaŋa ale ba gattaŋa mɛ nyiŋ. Ate wa ale wa nidoabilisaŋa ale ba gattaŋa a gaari magsi tuima.

22<<Pai kpapalaŋa ale bo padiaka de po la, juiku kpapalaŋa ale kpapalaŋa meena ale bo ponni po, ale paŋni kauk ale yiimaŋa ŋayema ale kpapalaŋa ale juga kɔsukku. Padiaka ale nna a magsi kaabteerɔwa bobika. 23A nyini ŋandiintaŋa ale bo kpanjɔkku po ate dabinta a ka ti po la, tii ale bo Naawen niŋ la, pai boroborok ale maasa paglaksa ate ba pai kpaam a nye la ale maasa fiisa. 24Pai bade meena a nyo Aaron ale wa nidoabilisaŋa nisima po a yulum Naawen niŋ ase yulumka tiirim la. 25Yaa tuesi ŋantaŋa ba jigi a ju ba kuŋkuŋku zuk a gum chaab ale juka tiirimu ase nyum buui ale masa a te Naawen ale tiirim buui ate ba nye ale bolim a te Naawen. 26Ase fi le pai padiak kuusini a magsi fi bobi Aaron ase kaabteerɔ la ŋaaŋnyiŋ, yulum di Naawen niŋ ase yulumka tiirim la, ate di yaa chim fi charuk.

27Padiaka kuusini ale kɔsukku ate fi pai gaari Aaron ale wa nidoabilisaŋa ase kaabteerɔba la, pai dueni nakpiak. Kabtaŋa de ka bala ale soa. 28Kabtaŋa de ale kasim chim ka ba charuk a nyini Izirali demma jigi a te Aaron ale wa nidoabilisaŋa. Ku ka cheesika ate Izirali demma a nye a te Naawen a nyini ba suiyɔgni tiiritaŋa po.

29<<Aaron tuilum gattaŋa ka wa ŋaaŋbisaŋa ale soa ti a jo diipo meena ale magsi ayen ba kpiiri kpaam ba zuk a bobi ba ase kaabteerɔba la. 30Nidoabili dii ale wa zaani wa nankula po ase kaabteerɔ ale a jam Tuka Viuku po a tom jigi dii ale ta tuilum la po la, a magsi wa jo ti ka daa ŋayopɔi.

31<<Pai padiaka ale magsi kaabteerɔwa bobika la a dik ka lammu jigi weleŋ. 32Tuka Viuku nansuiŋku nɔi, Aaron ale wa nidoabilisaŋa a yaa ŋɔbi padiaka lammu ale boroboroku ale bo kpanjɔkku po la. 33Ba yaa de tiiritaŋa de, dii nyiŋ ate biem duisi basika a nye ba a magsi ayen ba bobi ba kaabteerɔba a gaari ba la. Alege nuru yoŋ a kan maa de ti, dii nyiŋla ti ta tuilum kama. 34Ase padiaka lammu yaase boroboroku ate ba pai nye kaabteerɔwa bobika la a dan tali paari saluik, ju bu a basi. Ka a fɛ ate ni kan de, dii nyiŋla ti ta tuilum kama.

35<<Nye dii meena ate m weeni fu la a te Aaron ale wa nidoabilisaŋa, a pai daa ŋayopɔi a bobi ba kaabteerɔba. 36Pai lalik a nye kaabka dai meena ase biem tiirim la, a nye biem duisi basika. Nye biem duisi basika kaabka kuŋkuŋku zuk ate ku nye cheri, a kpiiri kpaam ku zuk a gaari ku. 37Daa ŋayopɔi nye biem duisi basika a te kuŋkuŋku a gaari ku. Ate kuŋkuŋku ale ŋmasi ta tuilum, ate jabuui meena ale a tiri ku la a ta tuilum.

38<<Dii ate fi ale kasim a nye dai meena kuŋkuŋku zuk la ale fi ko pabisa siye sii ale ta ben yeŋ dekki la. 39Ko kanyi saluik abe fi ko m kala mɛ junɔi. 40Pabiik kaai ale dɛ niŋ la te zom naliŋ kuruba nɔi a nyini pi po a dam kpaam kolini dinyi du ale daam kolini ase nyuka tiirim la. 41Kaab pabiik m kala junɔi ale ŋandiinta tiirim bula dek ale bu nyuka tiirimu ase saluik la. Bu ka nyum masik, tiirim buui ate ba ju ale bolim a te Naawen.

42<<A te ŋaaŋbiik sii ale cheen la, juka tiirimu de ale kasim a nye kama Tuka Viuku nansuiŋ Naawen niŋ. Dula mi Naawen ale tu fu a biisi ale fu. 43Dula jigini mi dek ale tu Izirali demma, ate dula jigini ale chim tuilum jigi m zulaŋa niŋ.

44<<Dila m le gaari Tuka Viuku ale kuŋkuŋku, abe m nye Aaron ale wa nidoabilisaŋa ate ba gaari badek a tom a te mi ase kaabteerɔba la. 45Ate m bo Izirali demma po a chim ba Wen. 46Ba le seba ayen m ka ba Naawen ba Wen dii ale ta ba a nyini Ejipiti tɛŋka po a nyini la, ate m le bo ba po. Ka mi Naawen ba Wenni.

Currently Selected:

Nyinika 29: BWU

Highlight

Copy