Nyinika 2

1Yɔgyɔgla de nuru ale nyini Livai yenni a faari Livai denɔ lie, 2ate wa yik puuk a biak nidoabili. Wa le nya ale wa ka biik naliŋ la, wa yaa pai wa suk chiisa sita. 3Alege wa le nya ale wa an ŋman baga a suk wa la, wa yaa yaali busik a magsi wa a pai kotaali a lik. Wa yaa pai biika a dueni du a pai su wuuk tii ale woŋŋa po Nile benni nɔi. 4Wa tuawa yaa zaani niŋ ayen wa nya dii ale di nye wa la.

5Faaro liewa yaa cheŋ Nile benni ayen wa so, ate baai ale tom a te wa la a nyiem a cheŋ benni nɔi. Wa yaa nya busika wuuk woŋtaŋa po a yaa tom wa nipokbili yɔmma wanyi ayen wa ga pai. 6Wa yaa lak a nya biika du. Wa jaa kaari kama, ate ku daani wa. Wa yaa weeni ayen, <<Yiburu bisaŋa wanyi ale nna>>.

7Wa tuawa yaa bek Faaro liewa ayen, <<M ga yaali Yiburu nipooma wanyi ate wa a nya biika zuk a te fu?>>

8Wa yaa tulisi ayen, <<Ŋuu cheŋ.>> Ate nipokbinni yaa ga yaali biika mawa ate wa jam. 9Faaro liewa yaa weeni ayen, <<Pai biika de a wuuk a te mu, ate m tuni fu>>. Nipowa yaa tuesi biika a wuuk wa. 10Biika ale pak la, wa yaa ta wa cheŋ Faaro liewa jigi ate wa chim wa biik. Wa yaa te wa yuei ayen Moosis, ku kiri ale, <<M yeeri wa ka nyiam po.>>

11Moosis yaa le chim pak la, dai yeŋ wa yaa cheŋ wadek nuruma ale bo juijui la a nya ba le a tom ba tuim pagra la. Wa nya ale ka Ejipiti denɔ ale boro a nak Yiburu denɔ, wadek nuruma po wanyi. 12Wa yaa gisi dɛ gisi dɛ wa an nya waai ya a yaa ko Ejipiti denɔwa a pa gu tintain busuŋku po. 13Vari ale veenti la wa yaa ŋman cheŋ ga nya ale ka Yiburu dem baye ale ta chaab. Wa yaa bek waai ale nye kaasi la, ayen, <<Ka boa ale soa ate fi a nak fi Yiburu denɔ choawa?>>

14Nuruwa yaa weeni ayen, <<Ka wana ale nye fi kpagi ale boteerɔ tama zuwa? Fi a poli ayen fi ko mi mɛ ase ka fi deem ale ko Ejipiti denɔwa diila.>> Moosis yaa jam a chali yɔgsum a yaa poli ayen, <<Mi ale nye diila da dii dai ba seba kama.>>

15Faaro le ga wom kude la, wa yaa yaali ayen wa ko Moosis, alege Moosis a chali cheŋ ga bo Midian. Dula wa jam kali ka vili tɛŋ. 16Midian kaabteerɔ jam ta ka lieba bayopɔi. Ba yaa jam ba ŋari nyiam a sueri ŋanta a te ba kowa piisa. 17Naapeerisa yaa jam yiak ba ate ba cheŋ, alege Moosis yaa yiti vari ba a basi ale te ba piisaŋa nyiam ate ŋa nyu.

18Nipokbilisaŋa ale ŋmani ba kowa Areuel jigi la, wa yaa bek ba ayen, <<Ka boa ate ni jinla a kpabi ŋmani?>>

19Ba yaa tulisi ayen, <<Ejipiti denɔ ale vari ti naapeerisaŋa jigi a basi. Wa poom ŋari ka nyiam a te ti ale te piisaŋa nyiam mɛ>>.

20Wa yaa bek wa liema ayen, <<Wa boka bɛ? Ka boa ale soa ate nama pai wa a basi? Ni wi wa ate wa jam dɛ ŋandiinta.>>

21Moosis yaa siak bo ale nuruwa, ate wa te wa wa liewa Zippora ate wa faari. 22Zippora yaa biak nidoabili ate Moosis a te wa yuei ayen, Gersom, yaa a weeni ayen, <<Mi chim ka nichaanɔ tɛŋ chaŋ po.>>

23Da ŋala po meena Ejipiti naawa a kpi kama. Ate Izirali demma a kum ba puusa po ba yɔntini po ale kaari a yaali maarika dii nyiŋla ba yɔntini a jueli paari Wen kama. 24Wen yaa wom ba kumsaŋa a teeri wa nɔiyeŋka ale Abrayam ale Aizik ale Jekob. 25Wen yaa nya Izirali demma ate wa niŋ a bo le ba.

Currently Selected:

Nyinika 2: BWU

Highlight

Compare

Copy