Nyinika 28

1<<Aaron fi suoku a maa ta wa nidoabilisaŋa Nadab ale Abiyu ale Eleaza ale Itamar ale bo Izirali demma po la a jam te fu ayen ba tom a te ase kaabteerɔba la. 2Nye gattaŋa ate ti ta tuilum a te fi suoku Aaron, ate ku te wa yuei ale zula. 3Weeni nuru baai meena ale seba tuima ate m te ba yam ate suiku de po ba a nye gattaŋa a te Aaron a gaari wa ate wa tom a te mi ase kaabteerɔ la. 4Gattaŋa de ate ba kala ayen ba nye la. Ka kuui ale a lik suinum ale garuk geli ale garuk woŋ ale garuk kuui ate ba yɔk la, ale zutɔk ale chiak gbain. Ba magsi ba nye gattaŋa de ate ti ta tuilum a te fi suoku Aaron ale wa nidoabilisaŋa ate ba tom a te mi ase kaabteerɔba la. 5Pai ligmɔniŋ garuk miik ale garuk miik sobluk ale garuk miik ŋmiŋmiruk ale garuk miik mɔnuŋ ale gattiak peelik kaai diak ale pagra la a nye gattaŋa de.

6<<Waai ale seba tuima la pai ŋantaŋa de a nye garuk genni, ligmɔniŋ garuk miik ale garuk miik sobluk ale garuk miik ŋmiŋmiruk ale garuk miik mɔnuŋ ale gattiak peelik kaai diak ale pagra la. 7Nye ŋmankpala ŋaye ate garuk genni ate ŋa maŋ di gugottaŋa tiyewa nyiŋ, ate dila ale basi ate di yik wa a magsi. 8Ku chiak gbainni ate ba yɔk nalimnyiini la, a magsi di nye ase ka garuk genni dek la, a bo garuk genni nyiŋ ate ba yɔk ligmɔniŋka garuk miik ale garuk miik sobluk ale garuk miik ŋmiŋmiruk ale garuk miik mɔnuŋ ale gattiak peelik kaai diak ale pagra la.

9<<Pai tintain ŋaai ale gamisi ŋaye a maŋ du a ŋmarisi Izirali nidoabilisaŋa yue ŋa nyiŋ, 10a ta va ba biamu ale ka diila. Ŋmarisi yue ŋayuebi tanni dinyi nyiŋ, abe fi ŋmarisi nŋala ŋayuebiwa mɛ tintain ndila nyiŋ. 11Ŋmarisi Izirali nidoabilisaŋa yue a nyo tanaŋa ŋayewa de nyiŋ ase baai ale a ŋmarisi tana po diila. Pai tanaŋa a vi ligmɔniŋ zuk. 12Pai tana ŋaye ate ŋa yik ŋa a tanla garuk genni ŋmankpalaŋa zuk ase tintain ŋaai ale ŋa chim teerika a te Izirali nidoabilisaŋa. Aaron ale wa ta yueŋa de wa ŋmankpalaŋa zuk ase teerika la Naawen niŋ. 13Nye ligmɔniŋ ŋanta baye ate ba yik tanaŋa a tanla 14ale cheri ligmɔniŋ chɔrima ŋaye ase miik la a tuiri chɔrimaŋa a maŋ chaab ale yueŋa ale ŋmarisi juijui la.

15<<Nye jabuui ale a lik suinum la ate ku maari ate wa a zɔk zɔga. Baai ale seba yɔkka la pai ligmɔniŋ garuk miik ale garuk miik sobluk ale garuk miik ŋmiŋmiruk ale garuk miik mɔnuŋ ale gattiak peelik, kaai diak ale pagra la a nye suinum jaligimmu ase garuk genni la. 16Ku a magsi ka di nye ŋmɔgluk ate di magsika woglimmu a paari anamagib bunyi abe di labsimu mɛ a chim anamagib bunyi a kpamsi buye. 17Pai tintana dueni vuuta tinaansi ku nyiŋ. Vuuk kuui ale dɛ niŋka la, ku a magsi ka tintain munta ale tintain ŋaai ale a nye ase dubuulim la ale tintain paata. 18Vuuk kuui ale saari tiyewa ka tintain ŋmiŋmirita ale tintain sobta ale tintain ŋaai ale a nye ase gunungoona la. 19Vuuta titawa ka tintain bibituk ale tintain paasa ale tintain ŋaai ale a nye ase busumbooŋ la. 20Vuuta tinaansiwa po ka tintain salima ale tintain ŋaai ale gamisi ale tintain mɔnta. Pai ligmɔniŋ a vi ŋa zuk ate ŋa yik ŋa a maŋ chaab. 21Ku a magsika ŋa chim tintana pi ale ŋaye, dinyi meena zuk a magsi Izirali nidoabilisaŋa wanyi wanyi meena yuei a ŋmarisi du, dinyi meena zuk a ŋmarisi Izirali buuni wanyi wanyi yuei a dueni du.

22<<Alege suinum jaligimmu pai cheri ligmɔniŋ a nye chɔrima ase miik la. 23Nye ligmɔniŋ baŋsa siye a magsi di a pai si a maŋ garuk genni ŋmankpala ŋayewa gugottaŋa po. 24Pai ligmɔniŋ chɔrima ŋayewa a tuiri baŋsaŋa ale bo suinummu jaligimmu gugottaŋa po la, 25Abe chɔrimaŋa ŋayewa kpeglimka ale a su vie ŋayewa po la, a maŋ chaab garuk genni ŋmankpalaŋa niŋka. 26Nye ligmɔniŋ baŋsa siye a maŋ nsila siyema ale bo suinum jaligimmu gugottaŋa po a moata garuk genni la. 27Ŋman nye ligmɔniŋ baŋsa siye a pai si a maŋ suinummu jaligimmu tɛŋka garuk genni niŋka, a moata vuurisa siyewa ale tu chaab a bo garuk genni chiak gbainni ŋmai la. 28Bobi suinum jaligimmu baŋsaŋa a maŋ garuk genni baŋsaŋa ale garuk miik sobluk, a tom chaab ale chiak gbainni, ate suinum jaligimmu a kan cheŋ nyini peelim abe ku ge garuk genni.

29<<Diipo meena Aaron a daa jo jigi dii ale ta tuilum la, wa nyiem pai Izirali nidoabilisaŋa yueŋa a yik ka wa kuusini nyiŋ suinum jaligimmu ale a zɔk la ase teerika la Naawen niŋ. 30Maa pai Urim ale Tummim a nyo suinum jaligimmu po, ate ba bo Aaron kuusini zuk diipo meena ate wa a jo Naawen niŋ la. Ate Aaron ale kasim a nye popola a te Izirali nidoabilisaŋa wa suinum po Naawen niŋ.

31<<Pai garuk pali sobluk a nye garuk genni garuk woŋku, 32a nye voan suŋsuŋka a magsi zukku. Ku a magsika ba yɔk ku ŋinni ate ku kan cheeri. 33Pai garuk miik sobluk ale garuk miik ŋmiŋmiruk ale garuk miik mɔnuŋ a yɔk ŋangilima ase yɔna a basi garukku nyiŋ, a nye ligmɔniŋ lɔŋŋa suŋsuŋka po. 34Pai ligmɔniŋ lɔŋi ale ŋan baai ale a nye ase yɔn gigiluta la, wanyi wanyi a maŋ chaab a piisi a baali basi garukku nyiŋ. 35Ku a fɛ ate Aaron a jo ku ase wa ale a tom wa tuimaŋa. Ba le wom lɔŋni kumsaŋa ase wa nin jo jigi dii ale ta tuilum la Naawen niŋ ale a nyini peelim, ate wa kan kpi.

36<<Pai cheri ligmɔniŋ a nye jatanlaŋ, tuilum zutɔk ate ba ŋmarisi ka zuk ayen, <<Ta tuilum a te Naawen.>> 37Yaali garuk miik sobluk a bobi jatanlaŋka a maŋ zutɔkka, ku a magsi ku bo ka zutɔkka niŋ. 38Ku le bo ka Aaron dinni nyiŋ, ate wa ale ta kaasuŋ kuui ate Izirali demma a nye kaasi tiirim tii ale ta tuilum la. Ba tiiritaŋa a dan poom ka dii ya, ti le kasim bo ka Aaron dinni nyiŋ, ate dila ale basi ate Naawen tuesi tiiritaŋa.

39<<Pai gattiak kaai diak ale pagra la, a nye garuk kuui ate ba yɔk la ale zutɔk. Waai ale seba tuima la a nye chiak gbain. 40Yɔk gatta a nye chiak gbana ale zuk bobsa a te Aaron nidoabilisaŋa ate ku te ba yue ale zula. 41Ase fi dan te fi suoku Aaron ale wa nidoabilisaŋa gattaŋa a nueri, bobi ba a kpiiri kpaam ba zuk ase kaabteerɔba la. Nye ba ate ba ta tuilum a magsi ate ba tom a te mi ase kaabteerɔba la.

42<<Nye garuk peeluk faasiŋsa a basi tɛŋ ate ku a lik ba nyiŋka a nyini chiak a ga paari koasitaŋa. 43Aaron ale wa nidoabilisaŋa ku a fɛ ate ba a jo ti diipo meena ate ba a jo viuku po la, yaase ba nin moata kuŋkuŋku jigi dii ale ta tuilum la, ate dila ale basi ate ba kan kpi. Kude ale chim ka ŋmarisi kaai ale ka beni a te Aaron ale wa ŋaaŋbisaŋa.

Currently Selected:

Nyinika 28: BWU

Highlight

Copy