Nyinika 27

1<<Pai siik daata a nye kuŋkuŋ ate ku juelika magsika a chim anamagib buyuebi abe ku nye ŋmɔgluk, ate ku woglimmu magsika a chim anamagib pi abe ku labsimu magsika mɛ a chim anamagib pi. 2Nye nyiila a basi gugotta tinaansiwa meena po, ate nyiilaŋa ale kuŋkuŋku meena a chim bunyi, pai kutuk mɔnuŋ a taari kuŋkuŋku. 3Pai kutuk mɔnuŋ a nye ŋantaŋa de meena, ku samɔnsaŋa ate ba ta a vaari buntuemmu la ale ku saabulutaŋa ale chin ŋaai ate ba ta a misi la ale duisuk nyinaŋa ate ba ta a yeeri lam la ale bolim chinaŋa. 4Pai kutuk mɔnuŋ a nye jaab ase ŋoari la, pai kutuk mɔnuŋ a nye baŋsa a basi gugotta tinaansiwa meena po. 5Pai ku a nyo kuŋkuŋku po ate ku nyini kinni po a jueli bo ku suŋsuŋsa po. 6Yaali siik dawoŋta a feri kuŋkuŋ a pai kutuk mɔnuŋ a taari ti zuk. 7Daataŋa a magsi ti su ka baŋsaŋa po a bo kuŋkuŋku ganaŋa ŋayewa ase ba nin zak ku a ji. 8Pai tapaga a nye kuŋkuŋku ate ku lak. Nye ku dila dekdega ase fi ale nya dii guuku zuk la.

9<<Nye dabiak a te viuku. Yeseoku geŋka nye garuk palaŋa ate woglimmu magsika a chim anamagib kobsiye abe ku ta gattiak peelik kaai diak ale pagra 10ale zaŋŋa pisiye ale kutuk mɔnuŋ gola pisiye ale kpana ŋanyiŋta a su yik zaŋŋa nyiŋ. 11Wiilukku geŋsaŋa nye garuk pala ate woglimmu magsika a chim anamagib kobsiye abe ku ta garuk pala ale zaŋŋa pisiye ale kutuk mɔnta gola pisiye ale kpana ŋanyiŋta.

12<<Yeniŋka geŋsa nye garuk pala ate labsimu magsika a chim anamagib kook abe ka ta garuk pala ale zaŋŋa pi ale gola pi. 13Kori geŋka nye dabiaka labsimu magsika ate ku chim anamagib kook. 14Garuk palaŋa magsika woglimmu a chim anamagib pisita a bo nansuiŋku kauk yeŋ ale zaŋŋa ŋata ale kutuk mɔnuŋ gola ŋata ale 15garuk pala ate ŋa magsika woglimmu a paari anamagib pisita ale magsi ŋa bo kauk kunkula ale zaŋŋa ŋata ale gola ŋata.

16<<Nansuiŋku ale a jo dabiaka po la, yaali garuk miik sobluk ale garuk miik ŋmiŋmiruk ale garuk miik mɔnuŋ ale gattiak peelik ate ka diak a pagra la, ate di woglimmu magsika a paari anamagib pisinaansi. Nuru waai ale seba yokka la a nye dila a su daata tinaansi ale gola ŋanaansi nyiŋ. 17Zaŋŋa meena ale gilim dabiaka la a taari ale ka kpana ale magsi ti ta kpana ŋanyiŋta a bobi a su kutuk mɔnuŋ golaŋa po. 18Dabiaka magsika woglimmu a chim anamagib kobsiye abe ka magsika labsimu mɛ a paari anamagib kook abe garuk pali peelik kaai ate ka diak a pagra la juelika magsika a chim anamagib pi ale kutuk mɔnuŋ gola. 19Ŋanta mbala meena ate ba ta a tom viuku tuima la, a maa pai viuku kpaasa piika ale dabiaka kpaasa piika, a magsi ŋa chim ka kutuk mɔnuŋ.

20<<Weeni ate Izirali demma a ta kpaam buui ale nye cheri ate ba ŋmiak a ta nyini kpaam tiib yɔna po a magsi bolim zeuŋtaŋa la a jam, ate dila ale basi ate bolimu a kasim a de. 21Tuka viuku po, garuk panni peelim, juijui ale bo nɔiyeŋka dakanni niŋ la, Aaron ale wa nidoabilisaŋa a magsi ba ta bolimu ate bu a dɛ Naawen niŋ, a nyini junɔi a ta ga paari saluik. Kude ale chim ka ŋmarisi kaai ale ka boro a te Izirali demma gaŋsaŋa.

Currently Selected:

Nyinika 27: BWU

Highlight

Copy