Nyinika 26

1<<Nye viuku garuk palaŋa pi, ale gattiak peelik kaai diak ale pagra la ale garuk miik sobluk ale garuk miik ŋmiŋmiruk ale garuk miik mɔnuŋ. Basi ate nuru a yɔk ŋanta ase ŋanvuta garuk palaŋa nyiŋ.#26:1 Nyinika 25:18-20 2Garuk palaŋa meena a soa ase chaab la, ŋa magsika woglimmu a paari anamagib pisinu ale buyuebi ate ŋa labsimu a paari anamagib naaniŋ. 3Pa garuk pala ŋanu a baali maŋ chaab abe fi nye nŋala ŋanuwa mɛ dila. 4Pai garuk pali sobluk a nye ŋanyiŋta garuk panni kpeglimka, nye ndila mɛ dila degadega. 5Nye ŋanyiŋta pisinu, garuk yeŋ nyiŋ abe fi ŋman nye ŋanyiŋta pisinu a basi ndila kpeglimka ate ŋanyiŋtaŋa a tuk chaab. 6Nye ligmɔniŋ ŋanta pisinu a kpi garuk pala buyewa a maŋ chaab ate viuku a chim bunyi.

7<<Pai buuk kɔbta a nye garuk pala pi ale dinyi a lik viuku. 8Garuk pala pi ale dinyiwa meena a soa ase chaab la. Ŋa magsika woglimmu a paari anamagib pisiyuebi abe ŋa labsimu a paari naaniŋ. 9Pai garuk pala ŋanu a maŋ chaab abe fi pai ŋayuebiwa mɛ a maŋ chaab. Kpamsi ŋayuebiwa buye a yik viuku niŋ. 10Nye ŋanyiŋta pisinu a kpi garuk palaŋa kpeglimka abe fi nye ndila kpeglimka mɛ dila ate fi baali maŋ chaab la kpeglimka. 11Nye kutuk mɔnuŋ ŋanyiŋta pisinu abe fi pai ŋanyiŋta a tuiri kpi garuk palaŋa kpeglimka a maŋ chaab. 12Alege viuku garuk palaŋa, garuk pali genni ale tali la a magsi di yik ka viuku ŋaaŋ. 13Viuku garuk panni magsika woglimmu a chim anamagib buye kabtaŋa meena. Dii ale tali la a yaa le yik a lik ka viuku ganaŋa. 14Be pai padiak gbana a mun si lik viuku abe fi pai gbaŋ maŋsa a lik ŋmani.

15<<Pai siik zaŋŋa ŋaai ale teenti la a magsi viuku. 16Zaŋŋi dinyi meena magsika woglimmu a paari anamagib pisiye abe di labsimu a paari anamagib buta, 17abe kpaasa ŋaye meena a feri ŋa ate ŋa kan tu chaaba. Nye viuku zaŋŋa meena wayeŋ. 18Yaali zaŋŋa pisiye a zaani viuku yeseoku geŋsa 19abe fi yaali kpana gola pisinaansi a chɔgsi ŋa, zaŋi yeŋ meena a su gola ŋaye po, dinyi meena a bo goluk yeŋ po. 20Alege kauk kunkula viuku wiilukku geŋsa zaani zaŋŋa pisiye 21ale kpana gola pisinaansi, nye gola ŋaye meena a magsi zaŋi yeŋ. 22Yaali zaŋŋa ŋayuebi a zaani viuku yeniŋ geŋsa. 23Yaali zaŋŋa ŋaye zaani viuku kpeglimka gugotta tiyewa po. 24Gugotta tiyewa de po, zaŋŋa a chim ŋaye a nyini tɛŋ a jueli ŋmai a jo voan yeŋ po. Zaŋŋa buyewa mɛ a chim dila. 25Ku yaa le chim ka zaŋŋa naaniŋ ale kpana gola pi ale ŋayuebi ate zaŋi yeŋ a soa gola ŋaye.

26<<Ŋman yaali siik chibsa. Sinu meena a magsi viuku kauk kunyi zaŋŋa, 27sinu mɛ a bo kauk kunkula, sinu mɛ a vi zaŋŋa ale bo viuku yeniŋka kpeglimka la. 28Suŋsuŋka chimmu a magsi bu vi zaŋŋa zuk a nyini ka kpeglimka a ga paari kpegli kinkala. 29Nye ligmɔniŋ a taari zaŋŋa zuk, nye ligmɔniŋ baŋsa a su zaŋŋa ate si yik chibsaŋa abe fi nye ligmɔniŋ mɛ a taari chibsaŋa zuk.

30<<Ti viuku a magsi chaab ale fi ale nya dii a nyini guuku zuk la.

31Yɔk garuk pali ale garuk miik ase sobluk la ale ŋmiŋmiruk ale mɔnuŋ ale gattiak peelik ate ka diak a pagra la; ate nuru a yɔk ŋanta ase ŋanvuta la a kali garuk panni nyiŋ. 32Pai garuk panni ale ligmɔniŋ ŋanyiŋta a yik siik daata tinaansi nyiŋ, ate ligmɔniŋ a taari ti zuk a za kpana gola ŋanaansi po la. 33Pai garuk panni a yik ŋanyiŋtaŋa nyiŋ a pai nɔiyeŋka dakanni a zaani garuk panni ŋaaŋ. Garuk panni ale labi jigi dii ale ta tuilum la a nyini jigi dii ale ŋmasi ta tuilum la. 34Pai biem duisi basika nanlikka a vi nɔiyeŋka dakanni zuk jigi dii ale ŋmasi ta tuilum la. 35Ta jazaanimu a nyini garuk panni jigini a zaani viuku wiilukku geŋsa a pai zeuŋtaŋa ale a zaani jabuui zuk la a zaani yeseoku geŋ a tuk ku.

36<<Nansuiŋku ale a jo viuku po la, yɔk garuk pali ale garuk miik sobluk ale garuk miik ŋmiŋmiruk ale garuk miik mɔnuŋ ale gattiak peelik ate ka diak a pagra la, ate nuru a yɔk garuk panni nyiŋ. 37Nye ligmɔniŋ ŋanyiŋta a magsi garuk panni de ale zauŋ zaŋŋa ŋanu a pai ligmɔniŋ taari du. Pai zaŋŋa a zaani kutuk mɔnta zuk.

Currently Selected:

Nyinika 26: BWU

Highlight

Copy