Nyinika 25

1Naawen a yaa weeni Moosis ayen, 2<<Weeni Izirali demma ate ba ta tiirita a jam te mu. Fi magsi fi tuesi tiirimu a te mu a nyini ka nuru waai meena suinum ale a weeni wa ayen wa te la. 3Tiirim tii ate fi le tuesi ba jigi la ale nna. Ligmɔniŋ ale kpana ale kutuk mɔnuŋ 4garuk miik sobluk ale garuk miik ŋmiŋmiruk ale garuk miik mɔnuŋ ale gattiak peelik kaai diak ale pagra la ale buuk kɔbta. 5Tuesi piisa gbaŋ sii ate ba tak ale muni si la ale gbaŋ maŋsa ale siik daata 6ale kpaam a magsi bolimu ale tinaŋsa a magsi naam bobika kpaamu ale ŋanti baai nyum ale masa la. 7Ale tintain ŋaai ale gamisi ale tintain yona ŋaai ale a nyaksi a pai ŋa a maŋ garuk genni ale jabuui ale a lik suinummu la nyiŋ.

8<<Abe fi yaa basi ate ba nye weleŋsa boka jigi a te mu ate m bo ba suŋsuŋ. 9Nye viuku de ale ku ponni ŋantaŋa meena ale a zaani du la a magsi chaab ale m le za m sak fu diila.

10<<Basi ate ba pai siik daata a nye nɔiyeŋka dakanni ate di magsika woglimmu a paari anamagib bunu abe labsimu a chim anamagib buta ate ku juelika a paari anamagib buta. 11Pai cheri ligmɔniŋ a taari di ponni po ale di ŋaaŋka meena, ale pai ligmɔniŋ a gebiri a gilim di noawaaŋa. 12Nye ligmɔniŋ baŋsa sinaansi a maŋ di naŋsa sinaansiwa, baŋsa siye meena a bo ganaŋa. 13Abe fi yaali siik daata a pai ligmɔniŋ a taari ti zuk. 14Pai daataŋa a su baŋsaŋa ale bo dakanni ganaŋa la a magsi yik jika. 15Da woŋtaŋa abe kasim bo dakanni baŋsaŋa nyiŋ po, ni kan yeeri ti. 16Abe fi pai m sinsaŋŋa piwa ale ŋmarisi doa tintain paglaksa siyewa nyiŋla a nyo dakanni po.

17<<Nye biem duisi basika nanlikka ale cheri ligmɔniŋ. Ka woglimmu a paari anamagib bunu ate labsimu a paari anamagib buta. 18Abe fi pai ligmɔniŋ mɛ ŋanta ase ŋanvuta baye ate ba ta kinkaŋŋa a za nanlikka zuk ate ba tuk chaab.#25:18 Piilimka 3:24; Ezekiel 10:1-19 19Ŋanvutaŋa wanyi a zaani nanlikka nɔi abe m wala mɛ a zaani kpeglimka. Nye ba meena a basi nanlik yeŋka nɔi, ŋayewa nɔi waaŋa zuk. 20Ŋanvutaŋa kinkaŋŋa a zak wen a lagri a lik nanlikka. Ŋanvutaŋa a zaani a tuk chaab a nya nanlikka geŋsa. 21Pai nanlikka a vi dakanni zuk a pai nɔiyeŋka a nyo di po. Nɔiyeŋ kaai ate mi ale te fu la. 22Dula jigini nanlikka zuk, ŋanvutaŋa de bayewa suŋsuŋ, ale bo nɔiyeŋka dakanni zuk la, m le tu fu a te fu m sinsaŋŋa meena a magsi Izirali demma.

23<<Pai siik daata a nye jazaanimu. Ku woglimmu a chim anamagib bunaansi abe labsimu a chim anamagib buye abe ku juelika anamagib buta. 24Pai cheri ligmɔniŋ a taari ku abe fi pai ligmɔniŋka a gebiri gilim ku. 25Abe fi nye jagigiluk ate ku labsa ase nitali la a gilim ku a pai ligmɔniŋ a gebiri ku a gilim noawaaŋa. 26Pai ligmɔniŋ a nye baŋsa sinaansi a magsi jazaanimu gugotta tinaansiwa juijui ate naŋsaŋa sinaansiwa a boro la. 27Baŋsaŋa a magsi si moata ka noawaaŋa a yik daataŋa ate ba pai a ji jazaanimu la a tara. 28Abe fi yaali siik daata pai ligmɔniŋka a taari ti, abe ni yik jazaanimu ale daata. 29Pai cheri ligmɔniŋ a nye ku taasi tanlaŋsaŋa ale chinaŋa a magsi ŋan baai nyum ale masa la, ale ku leŋsaŋa ale taasaŋa ate ba ta a kpiiri daam tiiritaŋa la. 30Ni pai mi niŋ boroboroku a dueni jazaanimu zuk ate ku kasim bo mi niŋ daa meena.

31<<Kuri cheri ligmɔniŋ a nye zeuŋ jazaanim ku kinni ale nyiŋka ale ŋan baai ale nye ase puuta beerisa la ale naŋsaŋa ate ba meena a bo jigi yeŋ. 32Zeuŋku naŋsaŋa a chim siyuebi, sita a bo kaukku kunyi, sita mɛ a bo kauk kunkula. 33Nye beerisa sita ate si a niesi almond puuta#25:33-34 Almond tiib a nye ase ka kangbegi tiib la. a bo naŋ kanyi zuk, sita a bo naŋ kinkala zuk, nye dila dek a basi naŋsa siyuebiwa zuk meena ale tom zeuŋ jazaanimu nyiŋla. 34Be nye zeuŋ jazaanimu zuk beerisa sinaansi ate si a niesi almond puuta. 35Puuk fiik kunyi ale magsi ku bo naŋsa siyewa ale dɛ niŋ ka a teeri nyini zeuŋ jazaanimu nyiŋla, ate buyewa po, puuk fiik a bo naŋsa siyewa nyiŋ, ate butawa po, puuk fiik a bo naŋsa sitawa nyiŋ, si meena ka naŋsa siyuebi. 36Puuk fiisaŋa ale naŋsaŋa meena a bo ka jigi yeŋ ale zeuŋ jazaanimu, ka cheri ligmɔniŋ ate ba le kuri a nye ŋantaŋa de.

37<<Yaa nye zeuŋta tiyopɔiwa a pai ti a zaan du ate bu a nya peelimmu po meena. 38Pai cheri ligmɔniŋ a nye boom ŋangebinta ale taasi tanlaŋsaŋa. 39Ka cheri ligmɔniŋ dobrim ase boorik yeŋ la ate ba pai nye zeuŋ jazaanimu ale ŋantaŋa de meena. 40Seba ate fi nye kude a va chaab ale dii meena ate m sak fu guuku zuk la.

Currently Selected:

Nyinika 25: BWU

Highlight

Copy