Nyinika 24

1Ate wa yaa weeni Moosis ayen, <<Jueli jam Naawen jigi fi ale Aaron ale Nadab ale Abiyu ale Izirali nisɔm pisiyopɔiwa. Ni yalima ale mi a puusi, 2alege Moosis nyiini ale wa jam Naawen jigi. Mbala meena ku a fɛ ate ni kan moata. Nuruma mɛ a kan va wa a jam.>>

3Moosis ale jam ga weeni nuruma Naawen wieŋa ale wa sinsaŋŋa la, ba jam tulisi ale lueluk yeŋ ayen, <<Dii meena ate Naawen a weeni la ti le nye.>> 4Moosis yaa ŋmarisi dii meena ate Naawen a weeni la a dueni. Dai dii ale paasaŋ la, saluik yokyokwa wa yaa yiti a sɛ kuŋkuŋ guuku chiak, a feri tintana pi ale ŋaye a sɛ zaŋŋa la, ate ŋa tagri za Izirali buuni pi ale ŋayewa nankula po. 5Ate wa yaa tom Izirali nidoa paalukku, ate ba nye tiirim juka a kaab lalik paalisa ase suiyɔgni tiirita la a te Naawen. 6Moosis yaa pai ziimu geli a nyo kuta china po, ale pai geli ndila a misi basi kuŋkuŋku zuk. 7Wa yaa pai Nɔiyeŋka Gbaŋka a kariŋ te nuruma. Ate ba tulisi ayen, <<Ti le nye dii meena ate Naawen a weeni la. Ti le siak a te wa.>>

8Moosis yaa pai ziimu a misi basi nuruma nyiŋ ale weeni ayen, <<Kude ka nɔiyeŋka ziimu ale la ate Naawen a nye ale ni a magsi chaab ale wieŋa de.>>

9Moosis ale Aaron ale Nadab ale Abiyu ale Izirali nisɔm pisiyopɔiwa yaa jueli nya Izirali Wenni. 10Wa naŋtaataŋa po a jam a nye ase ka suik ate ba pai tintain sobta a nye la, ku jam ka nna cheri ase chiŋmanni dek la. 11Alege Wen sui an jam puuri ale Izirali niŋdeerɔma dɛ. Ba jam nya Wen kama ale jam dɛ ale nyu.

12Naawen a weeni Moosis ayen, <<Jueli mi jigi guuku zuk a bo dela, ate m pai tintain paglaksaŋa ale m sinsaŋŋa ale m wieŋa ate m ŋmarisi la a te fu a magsi ba sakka.>>

13Moosis yaa cheŋ ale Josua wa pasaŋdoawa, Moosis a jam jueli ka guuku zuk Wen jigi. 14Wa weeni nisɔmma ayen, <<Ni limisi ti dela ate ku paari diipo ate ti le ŋman jam ni jigi la. Aaron ale Yur a bo ale ni kama, nuru waai a dan ta wari, wa cheŋ ba jigi.>>

15Moosis ale jam jueli guuku zuk la, chiŋmari a yaa lik, 16ate Naawen zulaŋa nyaksika a jam Sinai Guuku zuk. Chiŋmanni a jam bo dula ka daa ŋayuebi, daa ŋayopɔiwa danni Naawen yaa wi Moosis a nyini chiŋmanni po. 17Izirali demma jigi Naawen zulaŋa a jam a nye ase ka bolim ale a dɛ la guuku zuk. 18Moosis yaa ga jo chiŋmanni po, ase wa le a jueli guuku zuk la. Wa jam bo guuku zuk ka daa pisinaansi ale yɔkta pisinaansi.

Currently Selected:

Nyinika 24: BWU

Highlight

Copy