Nyinika 23

1<<Kan mooli venta wie a cheŋ. Be kan weeni venta wie a maari gaasa nyɔnɔ ate wa chim seerɔ waai ale a namsi nuruba.

2<<Kan va nuru boanni a nye a kaasi. Ni daa bo buusa, ni kan basi wensieŋa abe ni va nuru boanni, 3abe ni kan ŋman te jajak buusa boka po.

4<<Ase fi dan nya fi dachiak lalik kpaaŋ yaase wa boniŋ ale ka cheŋ a bɛ, yik ta ga te wa. 5Fi dan nya waai ale kisi fu la boniŋ ale ka ji ŋanta a lo, kan basi ka dula. Seba ate fi maari wa ate ka zaani.

6<<Ku a fɛ ate ni bo wensie buusa a te nuru waai ale jaŋ la. 7Ku a fɛ ate ni kan velimu ase nama ale a ŋma waai buusa dɔkku po la. Ni kan basi ate nuru waai ale kan seba wari nɔi po la yaase wensie nyɔnɔ a kpi, dii nyiŋla mi a kan nya waai ale nye kaasi la ase waai ale kan seba wari nɔi po la.

8<<Kan tuesi ligri a nyini waai ale a yaali fi velim buusa boka dɔkku po la, dii nyiŋla lig ŋala chaab a kan basi ate fi a biisi wensie. Dila a basi ate ka nuru maŋsa a velim.

9<<Kan namsi nichaanɔ. Nama dek seba nicham chimka ale ka diila kama, diila ni le jam chim ka nicham a bo Ejipiti tɛŋka po.

10<<Bena ŋayuebi ale a magsi ni pai bori ni tattaŋa a che ni ŋandiintaŋa, 11alege bena ŋayopɔiwa po ni kan kpa. Ate dila ale basi ate ŋanjaksaŋa ale bo ni po la a nya ŋandiinta a dɛ, ate duŋ waarisa a dɛ bala. Ni kaduksaŋa ale bo yeeŋa po la ni kan kpa, ni yɔna tiisaŋa mɛ ni kan nya si zuwa.

12<<Ni pai daa ŋayuebi a tom nidek tuima, alege daa ŋayopɔiwa danni ni kan tom, ate dila ale basi ate ni lalik kpaansaŋa ale bonsaŋa ale ni yɔmma ate ba biak ba ni yieŋa po la, ale nichamma a vuusi a nya nyiŋ pagra.

13<<Ni kpesi nidek a nye dii meena ate m weeni ni la. Ni kaa wi wen yona yue. Ni kan basi ate waai wom dila ni noaŋa po.

14<<Ben meena po ni dɛ tigi buta a te mu.

15<<Ni dɛ Tigi Dii Ŋandiinta Ate Dabinta a ka ti po la. Ni pai daa ŋayopɔi a dɛ ŋandiin tii ate dabinta a ka ti po la, ase m le weeni ni la. Ni nye kude diipo ate m dak la Abib chiika po ale ka dila po ate ni nyini Ejipiti tɛŋka po a nyini la. Waai a kan jam mi niŋ ale nikotta.

16<<Ni dɛ Ŋandiinta Tigini Ale Yɔna Ŋaai Ale Dɛ Niŋ a bɛ ni tattaŋa po la. Ni dɛ Ŋandiintaŋa Tigini Benni Kpeglimka Po, ase nama a nin tigsi ni ŋantaŋa ni tattaŋa po a ta jo.

17<<Buta meena benni po nidoama a magsi ba jam Nyɔnɔwa waai ale ka Naawen la niŋ kama.

18<<Kan te mi ziim ase kaabka la ate dabinta a bo bu po. Mi tigini kpapalaŋa tiiritaŋa ku a fɛ ate fi kan basi ate vari veenti ŋa.

19<<Ta ŋandiin tii ale dɛ niŋ a bɛ fi kaduksaŋa po la a jam Naawen fi Wenni yenni po. Be kan dik bu poali ku ma biisim po.>>

20<<Nya mi a tom ka Wen maarɔ ayen wa dɛ ni niŋ a nya ni zuk abe wa ta ni a jam juijui ate m gomsi la. 21Ni zaan nalimnyiini abe ni wom wa le a weeni diila. Ni kan nye tukpari ale wa. Wa kan vɔŋ te ni tukpanni, ayen mi Yuenni ale bo wa po la nyiŋŋa. 22Ni dan kpesi wom dii ate wa weeni la nalimnyiini ale nye dii meena ate m weeni la, mi ale chim dachiak a te ni dachaasaŋa abe m kan siak a te baai ale kan siak a te ni la. 23Mi maarɔwa ale dɛ ni niŋ a ta ni jam Amori ale Yit ale Perizzi ale Keenan ale Yivi ale Jebus demma tɛŋka po, ate mi ale ko ba. 24Ni kan koori tɛŋ ba wenaŋa niŋŋa yaase ni puusi ŋa yaase ni va ŋa nyeelaŋa. Ku a fɛ ate ni kaasi ŋa a bugsi ba tintanaŋa nna bunabuna. 25Ni puusi Naawen ni Wenni, ate wa niauŋku ale bo ni ŋandiintaŋa ale ni nyiamu zuk. M le yiak yuem ni jigi a basi, 26ate waai a kan biak a kaasi yaase wa chim kirik ni tɛŋka po. M le te ni nyuvuri woŋ.

27Mi ale basi ate mi yɔgsum a dɛ ni niŋ a basi ate tɛŋ meena ate ni le tu la a butim. M le basi ate ni dachaasaŋa meena a ŋman ba ŋaaŋ a yiti chali. 28Mi le tom waai ate ba a chali wa yɔgsum la, a dɛ ni niŋ a yiak Yivi ale Keenan ale Yit demma a basi nakpiak a te ni. 29Alege m kan yiak ba ka ben yeŋ po, dii nyiŋla tɛŋka ale doa ate gɔi duŋsa ale bo ka po a gilim ni. 30Mi ale yiak ba ka maga maga a te ni ate ku paari diipo ate ni le piisi a soa tɛŋka.

31<<Mi ale basi ate ni tɛŋ banni a nyini Nyakpiem Mɔnuŋku a ga paari Filistia Nyakpiemu a nyini gɔnni a ta cheŋ ga paari Benni. M le pai nuruma ale bo tɛŋka po la a nyo ni nisima po ate ni yiak ba a basi. 32Ni kan nye nɔiyeŋ ale ba yaase ba wenaŋa. 33Ni kan basi ate ba bo ni tɛŋka po, ni dan basi ate ba boro, ba le basi ate ni nye biem a kaasi mi, dii nyiŋla ba wenaŋa puusika ale chim baruk a te ni.>>

Currently Selected:

Nyinika 23: BWU

Highlight

Copy