Nyinika 22

1<<Ase nuru a dan zu lalik kpaaŋ yaase posuk a tɔgri yaase wa pai da, ku a fɛ ate wa tuni niiga ŋanu lalik kpaaŋka nyiŋ abe wa tuni piisa ŋanaansi pa yeoŋku nyiŋ.

2<<Ase ba dan yik zue ale wa boro a zu ate ba ko wa, waai ale nye dila la an kaasi wariya ku nyɔnɔwa ziimu ale nyini la nyiŋŋa. 3Alege ku dan nye dila ka wenbinni ale pusi la ŋaaŋnyiŋ, kula nyɔnɔwa a kaasi kama, wa le ko nuruwa la nyiŋ. Ku a fɛ ate zue a pai jabuui ate wa zu la a te, alege wa dan kan ta jaaboa, ku a fɛ ate ba yik wa da a tuni pamini.

4<<Ase ba dan nya duŋ kaai ate wa zu la vuta wa jigi, duŋka yaase lalik kpaaŋka yaase boniŋ yaase posuk yoo, ku a fɛ ate wa tuni a vi.

5<<Ase nuru a dan ta wa duŋsa a nyini si dɛ wuuk a basi ate duŋsaŋa a jo waai laŋ yaase kaduk po, ku a fɛ ate wa pai wadek laŋ maŋ ale kaduk maŋ a te tuni.

6<<Ase bolim a daa dɛ kapeok ale za yaase laŋ meena waai ale beeri bolimu la, ku a fɛ ate wa tuni.

7<<Ase nuru a dan pai wa kpana yaase ŋanta a te wa vaanchoa ayen wa dueni a te wa, ate ba zu ŋa wa yenni po ate ba dan yik zuewa, ku a fɛ kama ate wa tuni ŋa ku nɔi buye. 8Alege ba dan kan nya zuewa, yenni nyɔnɔwa a jam buusa boorɔwa niŋ a pagsi wa nɔi ase ka wa ale pai wa vaanchoawa nitalimu yaa daa wa. 9Suik kuui meena po ate nuru a va a ta jaab ase boniŋ yaase lalik kpaaŋ yaase posuk yaase garuk yaase jabuui meena ale bei a bo fi jigi la, ate waai a dan yen wa lo kama, ku a fɛ ate wa tuni a te wa vaanchoawa ku nɔi buye.

10<<Ase nuru a dan pai wa boniŋ yaase lalik kpaaŋ yaase posuk yaa duŋ kaai meena a te wa vaanchoa ayen wa nya a te wa, ate ka kpi yaase ka koani yaa ba yik ka ate waai an nya ya, 11nanpaŋŋa ale bo baai bayema suŋsuŋ la, a nya wanni zuk ale pɛka Naawen niŋ ayen wa vaanchoawa an pai nisa a tiri wa nitalimu. Duŋka nyɔnɔwa ale siak kude ate tutuna a kan boro. 12Alege ba dan zu duŋka fi vaanchoawa jigi, ku a fɛ ate wa tuni ka nyɔnɔwa. 13Be dan ka duŋ waarik ka choa ale yik ka, wa ta lamboanaŋa a jam ate ba nya ate dila ale basi ate wa kan tuni ka nyiŋŋa.

14<<Ase nuru a dan piem duŋ wa vaanchoa jigi ate ka koani yaase ka kpi alege ka nyɔnɔwa an moata, ku a fɛ ate wa tuni. 15Alege ka nyɔnɔwa a dan moata duŋka, waai ale piem duŋka la a kan tuni jaaboa. Alege wa dan te ka ligra ale tuesi duŋka, wa le te lig dii ale tuesi ka la, a deri magsi duŋka ale bɛ la nyiŋ.

16<<Ase nuru a dan fɛ goa ale nipok kaliak kaai ale kan ta yoŋ la, ku a fɛ ate wa nye a kaa yaali ate wa chim wa pok. 17Ase nipok kaliaka kowa a dan zɛri an pai wa a te nidoawa, ku a fɛ ate fi diem tuni fi le magsi fi tuni dii a te waai ale kan seba nidoa la.

18<<Kan basi ate chichirik wiirik a vua.

19<<Nuru waai a dan goa ale duŋ, ku a fɛ ate ni ko wa.

20<<Waai a dan kaabi wen yoŋ alege daa Naawen ku a fɛ ate ba kaasi wa.

21<<Ni kan nye nichaanɔ viesiviesiga ate ku jo wa nyiŋŋa, diila nama a jam ka nicham Ejipiti tɛŋka po.

22<<Ni kan nya pukɔgi yaase kpiŋ a nueri. 23Ni dan nye dila ate ba kaari a te mu, m le wom ba kaarika. 24Mi sui ale puuri ate m ko ni ale gebik. Ni pooma ale chim pukɔga ate ni bisaŋa ale chim kpiŋsa.

25<<Ase ni dan peem ligra a te m nuruma baai ale bo ni po ate ku a silim wa la wanyi, ni kan nye ase baai ale peem ligra a te a yaali viila la. 26Ase fi dan tuesi fi vaanchoa gattiak ase peemka la, wenbinni ale di siŋka, ta cheŋ ga te wa, 27dii nyiŋla wa gattiaka meena ale la, ate wa ta a pili wa nyiŋka. Wa le pili ka boa a goa? Ase wa dan kaari a te mi, m le wom, mi ka waai ale ta jiirim.

28<<Kan nye dii ate Wen a kisi la yaase fi ka a te baai ale a nya fi nuruma zuk la.

29<<Kan peri ŋandiinta ale daamu tiiritaŋa ate ni te mi la. <<Ku a fɛ ate ni te mi ni bi kpaŋŋa. 30Ni nye dila dekdega a te mu ni niiŋa ale piisaŋa. Ni basi ate ŋa bo ale ŋa mama a paari daa ŋayopɔi, alege ni pai ŋa a te mi da naanika danni.

31<<Ni ale chim ka nuru baai ale ta tuilum. Dila nyiŋ ni kan ŋɔbi duŋ waarik ale yik duŋ kaai la lammoa. Ni yuk te baasa.

Currently Selected:

Nyinika 22: BWU

Highlight

Copy