Nyinika 1
1
1Izirali nidoabilisaŋa ale jam cheŋ Ejipiti ale Jekob la ale nna. Ba wanyi meena ale wa dɔkdem. 2Aruben ale Simeyon ale Livai ale Juda, 3ale Isaka ale Zebulun ale Benjamin, 4ale Dan ale Nafitali ale Gad ale Asɛ. 5Jekob ŋaaŋsaŋa meena jam ka pisiyopɔi. Josefi poom jam bo ka Ejipiti.
6Yɔgyɔgla de Josefi ale wa suataŋa meena ale gaŋ kala meena a jam kpi kama, 7alege Izirali demma jam kasim a biak kama ale a piisi nna yegayega, a sueri tɛŋka meena.
8Naab paalik waai ale kan jam seba Josefi la ale jam dɛ naamu Ejipiti tɛŋka po. 9Naawa yaa weeni wa nuruma ayen, <<Nya Izirali demma yaa piisi ka nna yegayega a gaam ti. 10Ni jam ate ti nye ale ba dan kan daa di ba le ŋmasi piisi a gaam dila, ate kpaliŋ a dan yiti abe ba gum ti dachaasaŋa po a nye kpaliŋ ale ti abe ba basi tɛŋka.>>
11Dila la, ba yaa yaali yɔm kpaga ate ba a nya ba zuk ale a namsi ba ale fifiok tuima, ate ba sɛ Pitom ale Arameses ase geruŋ diina tɛŋsa la a te Faaro. 12Alege ba le jam namsi ba dii yegayega la, ba jaa piisi ka dila a waaŋ tɛŋka po. Ejipiti demma yaa jam basi ate yɔgsum a yik ba alege 13ate ba a tom a kan sak jiirim ale ba. 14Ba jam basi kama ate ba boka a tua ale tuim pagra ase peela nakka ale tanta damka ale tuima tɔgatɔga laŋsaŋa po. Ba tuim pagra meena po Ejipiti demma a basi kama ate ba a tom a kan sak jiirimmoa.
15Ejipiti naawa yaa weeni Yiburu nipok baai ate ba a wi ba ayen Sifra ale Pua ate ba yik ate nipooba a biak la, ayen. 16<<Ni dan boro a yik Yiburu nipooba ayen ba a biak ate ni nya ale ka nidoabili, ni ko wa alege dan ka nipokbili ni basi wa.>> 17Nipok baai ale yik ate nipooba a biak la a yaa chali Wen yɔgsum an nye Ejipiti naawa ale weeni ayen ba nye diila. Ba basi kama ate nidoabilisaŋa a boro. 18Ate Ejipiti naawa yaa wi nipooma a bek ba ayen, <<Ka boa ale soa ate nama nye nna? Ka boa ale soa ate nama a basi ate nidoabilisaŋa a boro?
19Nipok baai ale yik ate nipooba a biak la yaa tulisi Faaro ayen, <<Yiburu nipooma a kan nye ase Ejipiti nipooma la, ba ta pagrim kama a nyiem biak alege ate tama a paari.>>
20Dila la Wen jam ta jiirim ale nipok baai ale yik ate nipooba a biak la kama ate nuruma a piisi nna yegayega a gum du. 21Nipooma abe le a chali Wen yɔgsum la, wa yaa te ba dɔkdem.
22Faaro yaa te wanni de wa nuruma meena ayen, <<Nidoabili meena ate ba a biak la, ku a fɛ ate ni yuk wa a basi Nile benni po, alege nipokbili meena ni basi ate wa boro.>>
Currently Selected:
Nyinika 1: BWU
Highlight
Share
Compare
Copy
Want to have your highlights saved across all your devices? Sign up or sign in
© 2023, Ghana Institute of Linguistics, Literacy and Bible Translation
