Nyinika 18

1Yɔgyɔgla de Jetro, Midian kaabteerɔwa ale ka Moosis ŋachoba la, a wom dii meena ate Wen a nye te Moosis ale wa nuruma Izirali demma la, ale Naawen ale nye dii ta Izirali demma a nyini Ejipiti a nyini la.

2Moosis ale te ti wa powa Zippora a cheŋ la, wa ŋachobwa Jetro a tuesi wa kama 3ale wa nidoabilisa bayewa. Nidoabinni wanyi wa te wa yuei ayen ka Gersom, Moosis ayen, <<Mi chim ka nichaanɔ tɛŋ chaŋ po. 4Nwala yuei wa te ayen Ɛlieza, wa weeni ayen, <<Mi kowa Wenni ale jam chim mi maarɔ, wa vari mi a basi ate Faaro gebik woŋka an nye mu wari ya.>>

5Jetro, Moosis ŋachobwa ale Moosis bisaŋa ale wa powa a yaa va chaab a jam Moosis jigi gɔnni po, juijui ate ba tigsi boro a moata Wen guuku la. 6Jetro a poom te tomtomiŋ kama ayen, <<Mi fi ŋachobwa, ale fi powa ale wa bisa bayewa a cheen fi jigi.>>

7Moosis yaa nyini a tu wa ŋachobwa a koori tɛŋ a gbaari wa. Ba yaa puusi chaab ale jo viuku po. 8Moosis yaa weeni wa ŋachobwa dii meena ate Naawen a nye Faaro ale Ejipiti demma Izirali nyiŋla. Wa weeni wa mɛ ninam buui meena ate ba tu suiku po ate Naawen a nye dii a vari ba a basi la.

9Jetro sui jam peenti kama wa le wom wamaŋ sii meena ate Naawen a nye te Izirali demma a vari ba Ejipiti demma nisa po a basi la. 10Jetro weeni ayen, <<Mi a te Naawen pimpauk, waai ale vari fu Ejipiti demma ale Faaro nisima po a basi ale vari nuruma Ejipiti demma nisima po a basi la. 11Yɔgyɔgla de mi seba kama ayen Naawen a zuak gaam wen yona meena kama, wa nye nnala ale ka baai ale a nye Izirali demma gaasa la.>> 12Moosis ŋachobwa Jetro yaa ta juka tiirim ale kaab yonta jam te Wen, ate Aaron a jam ale Izirali nisɔmma ate ba dɛ ŋandiinta ale Moosis ŋachobwa Wen niŋ.

13Vari ale veenti la Moosis a yaa kali chim nuruma boteerɔ, ate nuruma a zaani gilim wa a nyini saluik a ga paari junɔi. 14Wa ŋachobwa ale nya Moosis a nye dii a te nuruma la, wa yaa weeni ayen, <<Ka boa ale nna ate fi nye a te nuruma? Ka boa ate fidek fi nyiini a kali ase boteerɔ la, alege ate nuruma de meena a za gilim fu a nyini saluik a ga paari junɔi ya?>>

15Moosis yaa tulisi wa ayen, <<Dii nyiŋla nuruma ale jam mi jigi ayen ba gisi Wen yaalika. 16Ase diipo meena ba dan ta chaab, ba ta a jam ka mi jigi, ate mi yaa nya bayewa wanni a weeni ba Wen le a weeni dii ale wa ŋmarisika ale wa sinsaŋŋa la.

17Moosis ŋachobwa yaa tulisi ayen, <<Fi le a nye diila an nala. 18Fi ale nuruma de ale a jam fi jigi la ale yoariŋ kama. Tuimaŋa a zuak kama a te fu, fi an baga a tom ŋa fidek fi nyiini. 19Be wom mi yɔgyɔgla de ate m sak fu, ate Wen a bo ale fu. Fi le magsi fi tagri nuruma a za Wen niŋ a ta ba wieŋa a jam wa jigi. 20Sak ba Wen sinsaŋŋa ale wa wieŋa, abe fi sak ba le ba boro dii ale tuim ŋaai ale magsi ba tomka la. 21Lueri nuru baai ale baga a nya wie zuk nuruma meena po, nuru baai ale a chali Wen, wensie nuruba baai ale kisi ba yaali ŋanta a te badek ate ba chim kpaga a nya tusa ale kobsa ale pisinuba ale piisa zuk. 22Basi ate ba chim nuruma boteerɔba diipo meena, alege ba ta wie ŋaai ale tua la a jam fi jigi, wie ŋaai ale kan tua la badek nya ŋa zuk. Kula ale basi ate fi tuimaŋa a valima a te fu, dii nyiŋla ni chari tuimaŋa kama. 23Fi dan nye dila a va chaab ale Wen sinsaŋŋa, fi le baga a zaani ale jiantaŋa de meena ate nuruma de mɛ meena a nya ba le a yaali diila abe ba kuli ale suipeentik.>>

24Moosis yaa wom wa ŋachobwa ale biisi diila a yaa nye wari meena ate wa weeni la. 25Wa lueri nuru baai ale baga wie zuk a nya la Izirali demma meena po, a basi ate ba chim kpaga nuruma zuk. Ba chim kpaga tusa ale kobsa ale pisinuba ale piisa zuk. 26Ba jam a tom ase ka boteerɔba la a te nuruba diipo meena. Wie ŋaai ale pagra la ba nyiem yaa ta jam ka Moosis jigi, alege wie ŋaai ale kan pagra la, badek a nya ŋa zuk.

27Ate Moosis yaa ta wa ŋachobwa Jetro a ga basi suik ate wa ŋman cheŋ wa tɛŋka.

Currently Selected:

Nyinika 18: BWU

Highlight

Copy