Nyinika 17

1Izirali demma tigsuŋku meena yaa basi Sin Gɔi Kosikka ale a nyiem ga de a ga de ase Naawen ale weeni diila. Ba ga kali ka Arefidim alege nyiam a ka du ate nuruma a nyu. 2Ba yaa nye kpaliŋ ale Moosis ayen, <<Te ti nyiam ate ti nyu.>> Moosis yaa tulisi ba ayen, >> Ka boa ate ni a nye kpaliŋ ale mu? Ka boa ate ni nye Naawen a nya?>>

3Alege nyanyuila a ta nuruma dula, ate ba a ŋuuni a ta chaab ale Moosis. Ba yaa weeni ayen, <<Ka boa ale soa ate fi ta ti nyini Ejipiti nyini ayen fi basi ate tama ale ti bisaŋa ale ti duŋsaŋa a kpi ale nyanyuila?>>

4Moosis yaa kaari wi Naawen ayen, <<Mi ale nye ka sɛ ale nuruma de? Ba gomsi kama ayen ba yuk mu ale tana.>>

5Naawen yaa weeni Moosis ayen, <<Cheŋ nuruma niŋ. Basi ate Izirali nisɔmma gela a va fu ate fi pai doa dii ate fi pai nak Nile benni nyiamu la a nyo fi nisa po a cheŋ. 6M le zaani dula fi niŋ Yoreb piuŋku tɛŋ. Nak piuŋku ate nyiam a nyini ku po a nyini ate nuruma a nyu.>> Moosis yaa nye nna Izirali niŋdeerɔma niŋ. 7Ate wa yaa wi dula jigini ayen Massaya ale Meriba dii nyiŋla Izirali demma a kpaliŋ kama ale nye Naawen nya a weeni ayen, <<Naawen tin bo le ti yaa wa ka?>>

8Amalek demma yaa jam nye kpaliŋ ale Izirali demma Arefidim. 9Moosis yaa weeni Josua ayen, <<Lueri ti nuruma gela a cheŋ ga nye kpaliŋ ale Amalek demma. Chum mi le zaani guuku zuk ale Naawen doani m nisa po.>>

10Josua yaa kpaliŋ ale Amalek demma ase Moosis ale weeni diila. Moosis ale Aaron ale Yur a jam jueli ka guuku zuk. 11Moosis ale zak wa nisaŋa wen diila, Izirali demma a nak a dɛ kama, alege diipo ate wa nisaŋa a siŋ tɛŋ la Amalek demma a nya nakdeka Izirali demma zuk. 12Moosis nisaŋa ale jiak la, ba yaa pai tain a dueni wa tɛŋ ate wa kali di zuk. Aaron ale Yur yaa zak wa nisaŋa ŋmai, wanyi bo kauk ate wanyi mɛ a bo kauk kunkula, ate wa nisaŋa a bo jigi yeŋ a ga siŋ wenni. 13Josua yaa nak dɛ Amalek tugurik tɔŋdɔma ale gebik woŋ.

14Naawen yaa weeni Moosis ayen, <<Ŋmarisi wanni de a dueni gbaŋ po ate ba a teeri abe fi seba ate fi te ti Josua wom, dii nyiŋla m le yeeri Amalek wie tɛŋka zuk ate ba kan teeri ba wari tɛŋka zuwa.>>

15Moosis yaa sɛ kuŋkuŋ a wi ku ayen nakdeka ku kiri, ale Naawen A Te Nakdeka. 16Wa weeni ayen, <<Nisima ale zak wen tuk Naawen naamu zukpaglika nyiŋ. Naawen ale kasim ta ka tugurik ale Amalek demma a ta cheŋ ba gaŋsa po meena.>>

Currently Selected:

Nyinika 17: BWU

Highlight

Copy