Nyinika 16

1Izirali naakuuni meena yaa nyini Elim a jam Sin Gɔi kosikka ale bo Elim ale Sinai suŋsuŋ la. Ku jam ka benni po chi kaai ale a saari siyewa la, ka daa pi ale ŋanu dai ba le basi Ejipiti la ŋaaŋnyiŋ. 2Gɔi kosikka po Izirali demma meena jam a ŋuuni kama a ta chaab ale Moosis ale Aaron. 3Izirali demma yaa weeni ba ayen, <<Ku ti le zunchoŋŋa ase Naawen a nin poom ko ti Ejipiti tɛŋka po. Dula ti nyiem kali kama a gilim samɔnsa ale lanta a dɛ ŋandiintaŋa meena ate ti a yaali la, alege fi ta ti jam gɔnni de po ayen nuruma de meena a viiri.>>

4Ate Naawen yaa weeni Moosis ayen, <<M le basi ate ŋandiinta nyini wenŋmazuk a siŋ a te ni. Nuruma a nyini daa meena a tigsi a zuak a magsi dai dila danni. Suik kude po m le nye ba a nya ase ba le va m sinsaŋŋa ya. 5Daa ŋayuebiwa danni ba tigsi ku paari naŋtuok nɔi buye a ta jam jo a dik daa ŋaye.>>

6Dila la Moosis ale Aaron yaa weeni Izirali demma meena ayen, <<Junɔi ni le seba ayen ka Naawen ale ta ni nyini Ejipiti a nyini. 7Abe saluik ni le nya Naawen zulaŋa, dii nyiŋla wa wom ni le ŋuuni a te wa la kama. Tama ka bana, ate ni ŋuuni a ta chaab ale ti?>> 8Moosis mɛ yaa weeni ayen, <<Ni le seba ayen ka Naawen ale te ni lanta ate ni ŋɔbi junɔinni ale ŋandiinta meena ate ni a yaali saluiku la, dii nyiŋla wa wom ni le a ŋuuni a ta chaab ale wa la kama. Tama ka bana? Ni kan ŋuuni a ta chaab ale ka tama, alege ka Naawen.>>

9Moosis yaa weeni Aaron ayen, <<Weeni Izirali demma meena ayen, <Ni jam Naawen niŋ, diila wa wom ni ŋuunika kama.>>

10Aaron ale boro a biisi a te Izirali demma meena la, ba yaa nya gɔnni geŋka, ate Naawen zulaŋa nyaksi a nyini chiŋmari po a nyini.

11Naawen a weeni Moosis ayen, 12<<M wom Izirali demma ŋuunika kama. Weeni ba ayen, <Junɔi ba le ŋɔbi lanta, abe saluik ba dɛ ŋandiinta a chak. Ate ni seba ayen Mi ale Naawen ni Wenni.

13Junɔi dila yeŋsa yaa jam sueri ba boka jigini, ate saluiku maglim yaa lo gilim ba boka jigini. 14Maglimu ale kpaanti la, ŋanta ase ŋmoruk tana la kabsa kabsa yaa doa tɛŋ gɔnni po. 15Izirali demma ale nya ŋantaŋa la, ba yaa bek chaab ayen, <<Ka boa ale nna?>> Diila ba zɛ le ka ŋan baai la. Moosis yaa weeni ba ayen, ka ŋandiin tii ate Naawen a te ni ayen ni dɛ la. 16Naawen abe le weeni diila ale nna. <Waai meena a tigsi a magsi wa le a yaali diila. Pai chin nɔi a magsi nuru meena ale bo viuku po la.

17Izirali demma yaa nye ba le weeni ba diila, ba gela tigsi yega, ba gela tigsi maga. 18Ba le magsi ale chinni la, waai ale tigsi yega an ta zuak gaam ya, waai mɛ ale tigsi maga la an ŋmasi ta fii fiiga. Waai meena a tigsi ka wa le a yaali diila.

19Moosis yaa weeni ba ayen, <<Waai a kan tali ŋantaŋa gela ate ku paari chum saluiwa.>>

20Alege ba gela an wom Moosis ale weeni diila, ale tali gela a ta paari saluik, ate nanzue a sueri ba po a nyuŋ. Moosis sui yaa jam a puuri ale ba.

21Saluik meena waai meena a tigsi ka wa le yaali diila, wenbinni a dan a nak ate ku tuila, ŋa nyaliŋ a bɛ. 22Daa ŋayuebiwa danni ba a tigsi ka buye, china ŋaye a magsi nuru yeŋ ate niŋdeerɔma a jam weeni a sak Moosis. 23Moosis yaa weeni ba ayen, <<Naawen ale weeni diila ale nna. <Chum ka vuusum dai, vuusum dai dii ale ta tuilum a te Naawen. Dila nyiŋ ni sɛ ni le a yaali ayen ni sɛ ŋan baai la abe ni dik ni le a yaali ayen ni dik ŋan baai la. Ŋan baai ale a tali la ni pai zaani ate ku paari saluik.> >>

24Ba yaa pai zaani ate ku paari saluik ase Moosis ale weeni diila alege ba an nyuŋ ya yaase nanzue a jo ba. 25Moosis yaa weeni ayen, <<Ni dɛ jinla, dii nyiŋla jinla ka Vuusum dai a te Naawen. Ni kan nya ŋandiinta tɛŋka jinla. 26Daa ŋayuebi ni tigsi ŋandiintaŋa alege daa ŋayopɔiwa, Vuusum danni, ŋandiinta kan boro.>>

27Alege dila meena nuruma gela a diem nyini kama daa ŋayopɔiwa danni ayen ba tigsi, alege ba an nya jaaboa. 28Naawen yaa weeni Moosis ayen, <<Nama taa ni zɛri m wieŋa ale m sinsaŋŋa vaka a paari ka dimpo? 29Ni ta ni popola po ayen Naawen a te ni Vuusum danni kama, dila ale soa ate daa ŋayuebiwa danni wa te ni ŋandiinta a magsi daa ŋaye la. Waai meena a bo wa le bo juijui la daa ŋayopɔiwa danni, waai a kan nyini peelim. 30Nuruma yaa vuusi daa ŋayopɔiwa danni.

31Izirali demma a jam a wi wenzuk ŋandiintaŋa ayen, ka manna. Ŋa jam peenti kama ase ŋanta bie la. A masa nna se boroborok faasiŋ ate ba nye ale siita la. 32Moosis a weeni ayen, <<Naawen ale weeni diila ale nna. <Pai wenzuk ŋandiinta chin nɔi a zaani magsi ni gaŋ sii ale za ba yiti la, ate ba nya ŋandiin tii ate mi te ayen ni dɛ gɔnni po diipo ate mi jam ta ni nyini Ejipiti a nyini la.> >>

33Moosis yaa weeni Aaron ayen, <<Pai jaab a pai wenzuk ŋandiinta chin nɔi a nyo du. Yaa pai zaani Naawen niŋ ate ti za a magsi ni gaŋ sii meena ale za ba yiti la.>>

34Naawen ale weeni Moosis la, Aaron yaa pai wenzuk ŋandiintaŋa a zaani Nɔiyeŋ Dakanni niŋ, ayen ba za. 35Izirali demma a dɛ ka wenzuk ŋandiinta a ga paari bena pisinaansi, ga paari tɛŋ kaai ale magsi kalik la. Ba dɛ ka wenzuk ŋandiinta ate ba yaa ga paari Keenan tɛŋ banni.

36Ŋanbie chin nɔi pisiye ale a chim boorik geli.

Currently Selected:

Nyinika 16: BWU

Highlight

Copy