Nyinika 15

1Moosis ale Izirali demma yaa yi yiini de a pak Naawen ayen. <<M le yi yiili a pak Naawen, diila wa zuak ka yegayega. Wusummu ale bu duerɔwa wa yuk basi nyakpiemu po. 2Naawen ka m pagrɔ ale m yiili, wa chim ka m varibasika. Wa ka m Wen, m be le pak wa, m kowa Wen, m be le zak wa yuenni a zaani. 3Naawen ka tugurik tɔŋdɔ, Naawen ale wa yuenni. 4Faaro torokoma ale wa tugurik tɔŋdɔma wa yuk ba basi nyakpiemu po. Faaro kpagi maŋsaŋa a siŋ ka Nyakpiem Mɔnuŋku po. 5Nya liuŋtaŋa a lim ba. Ba siŋ liuŋku po ase tintain la.

6<<Naawen yaa, fi naamu zuaka bo fi juga nisaŋa po. Naawen yaa, fi juga nisaŋa a lik dachiaka nɔi. 7Fi naamu zuaka po, fi yuk baai ale kisi fu la a lɔnsi. Fi basi ate fi suipuurumu ale a de nna pɔkpɔk la a nyini a dɛ baai ale a zɛri fi wie ase wuuk la a basi. 8Fi nyueŋa vuusika a basi ate nyaataŋa a tigsi a vi chaab zuk. Nya tii ale a chali la a zaani giŋgiŋ ase parik la. Nya liuŋtaŋa a nye diki nyakpiemu suŋsuŋ.

9<<Dachiaka yaa nak suinum ayen, <Mi le vi a yik ba m le pai ba ŋantaŋa. M le gomsi a kɔlim ba meena. M le yeeri m gebik woŋka ate m nisaŋa a ko ba meena.> 10Alege fi peeri ale fi vuusumu ate nyakpiemu a lik ba. Ate ba siŋ tɛŋ ase nanlik la nyakpientaŋa po.

11<<Ka wana ale bo wenaŋa po a nye ase fi la, Naawen yaa? Ba waai a kan magsi chaab ale fu, diila fi ta tuilum kama a gaam ba meena. Nuru meena ale ta yɔgsum chala ale fu, abe ba pak fu, diila fi a tom ka wakinkagla? 12Fi teeri fi juga nisaŋa ate tɛŋka a nɛ ba.

13<<Fi ŋmanteka nyiŋ, fi le dɛ nuru baai ate fi da tuesi la niŋ. Fi pagrimu nyiŋ fi le gani ba ta cheŋ fi tuilum boka jigini. 14Tɛŋsaŋa nuruma ale wom ate ba nyiŋsa a gɔk, yɔgsum ale yik Filistia demma. 15Edom nalimaŋa yɔgsum ale yik ba, Moab niŋdeerɔma nyiŋsa ale kasim a gɔk, Keenan demma ale nyaliŋ a bɛ. 16Yɔgsum ale siŋ ba zuk. Fi nisa pagrimu nyiŋ ba le nye diki ase tintain la, Naawen yaa, ate fi nuruma ate fi da la a ga taamu. 17Fi le ta ba jam jo a vuk ba guuk kuui ate fidek soa la zuk, juijui ate fi Naawen a nye magsi fi boka la, jigi weleŋka ate fi Nyɔnɔwa a nye ale fi nisa la. 18Naawen ale dɛ wa naamu a kasim a cheŋ wuu.>>

19Faaro wusumaŋa ale torokoma ale wusum duerɔma a yaa siŋ nyiamu po, ate Naawen a ta nyakpiemu nyaataŋa a jam lik ba, alege Izirali demma a cheŋ tɛŋ kosik zuk a taam. 20Ate Miriam, Naawen biisiteerɔwa, Aaron tuawa a pai sinyak a nyo nisa po, ate nipooma meena a va wa ale sinyaksa a gɔk. 21Miriam yaa yi yiili a te ba ayen, <<Yi yiili a pak Naawen, diila wa yuenni a zuak kama. Wusum ale bu duerɔ wa yuk a basi nyakpiemu po.>>

22Ate Moosis yaa dɛ Izirali demma niŋ a ta ba nyini Nyakpiem Mɔnuŋku jigini ate ba cheŋ a jo Sur Gɔnni po daa ŋata alege ba an nya nyiamoa. 23Ba le jam paari Mara la, ba an baga a nyu nyiamu diila bu tua kama. Dila ale soa ate ba a wi dula jigini ayen Mara la. 24Dila nyiŋ nuruma yaa jaa ŋuuni a ta chaab ale Moosis, a weeni ayen, <<Ti le nyu ka boa?>>

25Moosis yaa kaari wi Naawen, ate Naawen yaa dak diok a sak wa. Moosis yaa pai yuk a basi nyiamu po ate bu tagri a masa. Dula jigini Naawen yaa te ba sinsaga ale chamsi ba a nya. 26Wa weeni ayen, <<Ni dan kpesi a wom Naawen ni Wenni lueluk ale a nye dii ale nala wa nina po la ale kpesi a wom wa sinsaŋŋa ale a va ŋa meena, m kan ta nyiŋtuilaŋa dɛ ŋaai ate m ta jam Ejipiti demma zuk la a jam ni zuwa, diila ka Mi ale Naawen dii ale a tebi ni la.

27Ate ba yaa jam Elim, kauk kuui ate bulisa pi ale siye ale kpinkpatta tiisa pisiyopɔi, ate ba wari kali dula a moata nyiamu.

Currently Selected:

Nyinika 15: BWU

Highlight

Copy