Nyinika 14
14
1Ate Naawen yaa weeni Moosis ayen, 2<<Weeni Izirali demma ayen ba cheem ŋaaŋ a ga kali a moata Pi Yayirot, Migdol ale nyakpiemu suŋsuŋ. Ba yaa kali moata nyakpiemu, a tuk Baal Zefon. 3Faaro ale poli ayen, <Izirali demma a tuim kama a cheŋ a gilim goa kosikka suŋsuŋ.> 4M le basi ate Faaro suinummu a pagra, ate wa chali vi ba. Alege m le nya zula a te m dek Faaro ale wa kpaliŋ nyeerisaŋa nyiŋ. Ate Ejipiti demma a seba ayen Mi ale Naawen.>> Ate Izirali demma a nye kude.
5Ba le weeni Ejipiti naawa ayen nuruma a chali kama la, Faaro ale wa nisɔmma yaa tagri ba popolaŋa a weeni ayen, <<Ti tin nye ka sɛ? Ti basi ate Izirali demma a cheŋ alege jɔgi ba tuimaŋa.>> 6Wa yaa gomsi wusum ale toroko a magsi a ta wa kpaliŋ nyeerisaŋa a cheŋ. 7Wa jam ta wusuma ale toroko maŋsa kobsiyuebi ale Ejipiti wusuma ale toroko yonta, ate kpaga a nya ba meena zuk. 8Naawen a basi ate Faaro Ejipiti naawa suinummu a pagra ate wa vi Izirali demma ale jam gɔk santiri a nyini ale suinum pagrisa la ŋaaŋ. 9Ejipiti demma ale Faaro wusumaŋa ale torokoma ale wusum duerisa ale kpaliŋ nyeerisaŋa meena a vi Izirali a ga paari ba, ba le kali a moata nyakpiemu a moata Pi Yayirot a tuk Baal Zefon nyiŋla.
10Faaro ale ga tuak la, Izirali demma yaa zak nya ale Ejipiti demma a gɔk santiri a vi ba. Yɔgsum yaa yik ba ate ba kaari a wi Naawen. 11Ba yaa weeni Moosis ayen, <<Ka vie ale kan bo Ejipiti ate fi yaa ta ti jam gɔi kosikka po ayen ti kpi yaa? Ka boan le la ate fi nye a ta ti nyini Ejipiti nyini? 12Tama an weeni fu Ejipiti ayen, <Basi tidek ti nyiini, basi ate ti tom a te Ejipiti demma?> Ku ti le zunchoŋ ase ti nin tom a te Ejipiti demma a gaam ti nin kpi gɔnni po!>>
13Moosis yaa tulisi nuruma ayen, <<Ni kan chali yɔgsummoa. Ni zaani giŋgiŋ ate ni ale nya varibasika kaai ate Naawen a za wa ta jam jinla la. Ejipiti demma ate ni a nya ba jinla la ni kan ŋman nya ba. 14Naawen ale kpaliŋ a te ni. Ni tin nye diki.>>
15Ate Naawen yaa weeni Moosis ayen, <<Ka boa ate fi kaari a wi mi? Weeni Izirali demma ayen ba a cheŋ. 16Zak fi doani a teeri fi nisaŋa nyakpiemu zuk a poori nyiamu ate Izirali demma a va nyakpiemu po tɛŋ kosik zuk a taam. 17M le basi ate Ejipiti demma suiniima a pagra ate ba siŋ a vi ni. Ate m nya zula Faaro ale wa kpaliŋ nyeerisaŋa ale wa wusum duerisaŋa nyiŋ. 18Ejipiti demma ale seba ayen mi ka Naawen ase m nin va Faaro ale wa torokoma ale wa wusum duerisaŋa nyiŋ a nya zula.>>
19Ate Wen maarɔwa ale dɛ Izirali kpaliŋ nyeerisaŋa niŋ a cheŋ la yaa yeeri wadek a taam ba ŋaaŋ. Chiŋmanni ale a maari ba la a yeeri di dek ba niŋ a taam zaani ba ŋaaŋ, 20a yaa bo Ejipiti kpaliŋ nyeerisaŋa ale Izirali suŋsuŋ. Yɔkku meena chiŋmanni a ta ka legi a jam kauk kunyi ale ta bolim a jam kauk kunkula. Ba waai an moata wa choa yokku meena.
21Ate Moosis yaa teeri wa nisaŋa nyakpiemu zuk, ate yok kula meena Naawen a basi ate kori geŋ va pagrik a fuk nyakpiemu ate ku chim tɛŋ kosik. Ate nyaataŋa a poori, 22ate Izirali demma a cheŋ va nyakpiemu po tɛŋ kosik zuk a taam ate nyiam parik a bo ba juga ale ba gala.
23Ate Ejipiti demma a va ba, ate Faaro wusumaŋa ale wa torokoma ale wa wusum duerisaŋa a va siŋ nyakpiemu po. 24Yɔkku suŋsuŋ Naawen a yaa nya nyini bolimu ale chiŋmanni a nya Ejipiti kpaliŋ nyeerisaŋa a yaa basi ate butimka a jam. 25Wa nye kama ate ba torokoma wiilima a yeeri ate ba damka a tua. Ate Ejipiti demma a weeni ayen, <<Ni te ti cheŋ abe ti ge Izirali demma. Naawen ale kpaliŋ a maari ba a ta chaab ale Ejipiti.>>
26Naawen yaa weeni Moosis ayen, <<Teeri fi nisaŋa nyakpiemu zuk ate nyiamu a ŋmani a lik Ejipiti demma ale ba torokoma ale ba wusum duerisaŋa.>> 27Moosis a teeri wa doani nyakpiemu zuk, ate vari ale veenti la nyakpiemu a pilim ŋman bu jigini, Ejipiti demma a chali a cheŋ bu jigi, ate Naawen a chuiri ba a basi nyakpiemu po. 28Nyiamu a chali a ŋmani ŋaaŋ a lik torokoma ale wusum duerisaŋa, Faaro kpaliŋ nyeerisaŋa ale va Izirali demma a siŋ nyakpiemu po la. Ba wanyi mɛ la an vuugi ya.
29Alege Izirali demma a va nyakpiemu tɛŋ kosik zuk ate nyiam pagrik a bo ba juga ate m kala mɛ a bo ba gala. 30Dai dila danni Naawen yaa vari Izirali demma Ejipiti demma nisa po a basi, ate Izirali demma a nya Ejipiti demma ale kpi doa kunkɔŋni la. 31Izirali demma ale nya Naawen ale sak pagrim kpiemu ale Ejipiti demma la, nuruma yaa chali Naawen yɔgsum ale ta mariŋka ale wa ale Moosis wa tomteerɔwa.
Currently Selected:
Nyinika 14: BWU
Highlight
Share
Copy
Want to have your highlights saved across all your devices? Sign up or sign in
© 2023, Ghana Institute of Linguistics, Literacy and Bible Translation
