Nyinika 13

1Naawen yaa weeni Moosis ayen, 2<<Gaari ba le liŋ biak jaduok kuui meena a te mu ase tuilum jaab la. Luik meena ale liŋ biak jabuui Izirali demma po la, nuru yaase duŋ ka mi ale soa.>>

3Moosis yaa weeni nuruma ayen, <<Ni kan baŋ jinla danni de. Di ka da dii dai ate ni basi Ejipiti ale ka yɔntidi tɛŋ la. Danni de ate Naawen a pai wa pagrimu a ta ni nyini dula. Dila nyiŋla ku an magsi ayen ni ŋɔbi boroborok kuui ate dabinta a bo ku po la. 4Jinla Abib chiika po ate ni a basi dela. 5Naawen a dan ta ni a ga jo Keenan demma ale Yit demma ale Amori demma ale Yivi demma ale Jebus demma tɛŋka, tɛŋ kaai ate wa puulim ale ni kokpieŋsaŋa ayen wa te ni la, tɛŋ kaai ale ta biisim ale siita la, ni a teeri tigini de chiika de po. 6Daa ŋayopɔi ni ŋɔbi boroborok kuui ate dabinta a ka ku po la, abe daa ŋayopɔiwa danni ni nye tigi a te Naawen.

7<<Ni ŋɔbi boroborok kuui ate dabinta a ka ku po la daa ŋayopɔiwa po. Jaabuui ale ta dabinta la a kan bo ni suŋsuŋŋa yaase dabinta a bo ni tɛŋ banaŋa. 8Dai dila danni weeni fi nidoabinni ayen, <Mi nye nna ka Naawen ale nye dii a te mi la nyiŋ, diipo ate mi a jam nyini Ejipiti tɛŋka po a nyini la.> 9Kpesi teerika de ale chim ka daana a bo ni nisa po ale teerika ni deeŋa nyiŋ ate Naawen sinsaŋŋa abe bo ni noaŋa po. Ale Naawen a ta ni nyini Ejipiti nyini kama ale wa ni pagrisa. 10Ni be magsi kama ayen ni ta ŋmarisika de diipo ale magsi la, ale ben ben meena po.

11<<Naawen a dan ta ni jam jo Keenan demma tɛŋka a pai ka a te ni, ase wa le puulim a pɛ ale nama ale ni kokpieŋsaŋa la ŋaaŋnyiŋ, 12jabuui ale liŋ a nyini luik po a nyini la ni pai te Naawen. Ni duŋ wuunsa ale liŋ a biak ŋan doa tii la, Naawen ale soa. 13Pai pabiik a da tuesi boniŋ ale liŋ biak kaai la, alege fi dan kan da tuesi ya, wɛ ka ŋinni. Ni da tuesi biik kaai meena ate ba liŋ biak ni bisaŋa po la.

14<<Chum po fi bisaŋa a dan bek fu ayen, <Ka kude kiri ale boa?> Weeni wa ayen, <Naawen ale pai wa pagrimu a ta ti a nyini Ejipiti ale ka yɔntidi tɛŋ po la nyiŋ. 15Faaro ale ta tukpari a zɛri a kan te ti a cheŋ la, ate Naawen yaa ko bi kpaŋŋa Ejipiti po, nuruba ale duŋsa meena. Ka dila ale soa ate mi a nye kaabka ale ŋandoa tii ate ba liŋ biak la ayen m da tuesi ba a basi.> 16Ate ku chim magsa fi nisa nyiŋ ale magsa fi diri nyiŋ ayen Naawen ale ta ti nyini Ejipiti nyini ale wa pagrim.>>

17Faaro ale te nuruma a cheŋ la, Wen an basi ate ba va suik kuui ale va Filistia tɛŋka la. Suik kula abe jam gela kama. Wen jam weeni kama ayen, <<Ba dan tu kpaliŋ, ba le tagri ba popolaŋa a ŋman cheŋ Ejipiti.>> 18Dila Wen yaa ta ba gilim va goa kosikka suiku ale a cheŋ Nyakpiem Mɔnuŋku la. Izirali demma a jam basi Ejipiti kama a gomsi badek a magsi kpaliŋ.

19Moosis a jam pai Josefi kobaŋa kama dii nyiŋla Josefi a jam basi kama ate Izirali bisaŋa a pɛ. Wa jam weeni kama ayen, <<Wen za wa sum jam maari ni kama, ate ni yaa pai m kobaŋa dela a ji a ta cheŋ.>>

20Ba le basi Sukkot ŋaaŋ nyiŋla, ba ga kali ka Etam goa kosikka nɔi. 21Kantueŋ Naawen nyiem a de ba niŋ ale ka chiŋmari a maari ba a dak suiku alege yokku wa a de ba niŋ ale ka bolim a maari ba ate ku a nya, ate ba baga a cheŋ kantueŋ ale yok. 22Kantueŋ chiŋmanni yaase yokku bolimu an basi ba niŋ dɛka.

Currently Selected:

Nyinika 13: BWU

Highlight

Copy