Nyinika 12
12
1Naawen yaa weeni Moosis ale Aaron Ejipiti tɛŋka po ayen, 2<<Chiika de ale ka chim ni piilimka chiik, chiik kaai ale a chim ni benni piilimka chiik la. 3Weeni Izirali demma ayen chiika da pi dai, nuru meena a yaali pabiik a magsi wa dɔkdem, kanyi a magsi yeri meena. 4Yeri dii a dan fiisa ale pabiik, ba chari ka ale yeri dii ale moata a magsi chaab ale nuruma nɔi ale ka dii a boro la. Ni kpesi pabiika lammu ale a soa dii a magsi nuru yeŋ ŋɔbika la. 5Duŋ sii ate ni a lueri la a chim ben yeŋ duŋsa. Ŋandoa tii ale kan ta jomi ya. Ni yeeri ŋa piisaŋa yaase booŋa po. 6Nya si zuk a ga paari chiika daa pi ale ŋanaansi dai ku junɔi ate Izirali demma meena ale tɔgri si la. 7Ba yaa pai ziimu gela a sa yeeŋa tuataŋa ganaŋa ale ŋmazuimaŋa juijui ate ba kali a ŋɔbi pabisaŋa lantaŋa la.
8<<Yok kula ba se lammu bolim po a ŋɔbi ale tinaŋ tuasa ale boroborok ate dabinta a ka ku po. 9Ni kan ŋɔbi lammu bein ya yaase ni dik bu ale nyiamoa, alege ni se bu bolim po. Ni se zukku ale naŋsaŋa ale puuka po ŋantaŋa. 10Ni kan tali bu gela a ta paari saluiwa, bu gela a dan tali a paari saluik, ni ju bu. 11Ni ale magsi ni ŋɔbi lammu diila ale nna. Ni pai chiak gbana a bobi ni gattaŋa a paari, abe ni su ni nuesaŋa, abe ni ta ni doaŋa ni nisima po. Ni ŋɔbi bu nwuli. Ku ka Naawen Gaambasika.
12<<Yok kula dek m le va Ejipiti po a nak nuru ale jaabuuri meena ate ba dɛ niŋ a biak la a lɔnsi tɛŋ. Ate m yaa ta buusa boka a jam Ejipiti wenaŋa meena zuk. Mi ale Naawen. 13Ziimu ale bu sak yie ŋaai ate ni bo ŋa po la. M dan nya ziimu m le gaam ni a taam. Biem a kan maa paari ni ase m nin boro a kaasi Ejipiti.
14<<Ni magsi ni dɛ masim danni de nyiŋ kama. Gaŋsa ale bo ŋaaŋ a cheena la, ni dɛ tigi ku nyiŋ a te Naawen. Di abe kasim chim ŋmarisi kaai ale ka kasim boro a cheŋ. 15Daa ŋayopɔi ni ŋɔbi boroborok kuui ale kan ta dabinta la. Da dii dai ale a dɛ niŋ la ni yeeri dabintaŋa ni yeeŋa po a basi. Waai a dan dɛ jaab ate dabinta a boro a nyini piilimka danni a ta ga paari daa ŋayopɔiwa danni, ba yeeri a nyini Izirali po. 16Piilim ka danni ni nye tuilum tigsuŋ ale daa ŋayopɔiwa danni mɛ ni ŋman nye tuilum tigsuŋ. Ni kan tom tuin pagri. Dii nyiini ale magsi ayen ni nye la ale ni dik ŋandiinta a dɛ.
17<<Ni ŋɔbi Boroborok Ate Dabinta A Ka Ku Po La Tigini, dii nyiŋla ka da dila danni ate ni beŋsaŋa meena a nyini Ejipiti tɛŋka. Ni te ŋmarisika de a kasim boro a cheŋ gaŋsa buuri meena zuk. 18Chiik kaai ale a dɛ niŋ la, ni ŋɔbi boroborok kuui ate dabinta a ka ku po, a zaani daa pi ale ŋanaansiwa danni ku junɔi, a ga paari daa pisiye ale dinyi. 19Dabinta a kan bo waai yeri po daa ŋayopɔi. Ate waai a dan dɛ ŋandiinta ate dabinta a bo ti po, wa poom ka Izirali dek denɔ yaase nichaanɔ, ba yeeri wa a nyini Izirali nuruma po. 20Kan dɛ jaab ate ba pai dabinta a nye. Juijui meena ate fi boro la ŋɔbi boroborok kuui ate ba an pai dabinta a nye la.>>
21Ate Moosis yaa tigsi nuruma a yaa weeni ba ayen, <<Ni cheŋ nwuli a ga luk duŋsa a te ni dɔkdemma a magsi chaab ale Gaambasika. 22Ni pai kpaliok a su ziimu ale bo taasi kpienni po la a pai ziimu gela a sa tuataŋa ganaŋa meena. Ni wanyi mɛ la a kan gaam yenni tuoku a nyini peelim ate ku ga paari saluik. 23Naawen a dan va Ejipiti tɛŋka ayen wa ko Ejipiti demma a lɔnsi, wa le nya ziimu tuataŋa ŋmaaŋa ale ganaŋa ate wa le gaam tua tila, wa kan te kaasirɔwa suik ate wa ko ni lɔnsi.
24<<Ni nye tuewomma a te sinsaŋŋa de ase wari dii ale doa a te ni ale ni ŋaaŋsaŋa la. 25Ni dan jo tɛŋ kaai ate Naawen ayen wa te ni a magsi chaab ale wa le puulim la, ni kpesi a va wanni de. 26Ate ni bisaŋa a dan bek ni ayen, <Tigini de kiri ale boa a te ni?> 27Ni yaa weeni ba ayen, <Ka Gaambasika kaabka a te Naawen dii ale gaam Izirali demma yeeŋa a basi ale vari ti yeeŋa a basi wa le jam ko Ejipiti demma a lɔnsi la.> >> Ate nuruma a koori tɛŋ a puusi wa. 28Izirali demma a jam nye ka dii dek ate Naawen a weeni Moosis ale Aaron la.
29Yɔk suŋsuŋ Naawen a ko bi kpaŋŋa meena a dueni, a zaan Faaro bikpagni waai ale wa kali naam zukpaglika zuk la, a ga paari waai ate ba lik likka dɔk po la bikpagni ale duŋsa bi kpaga mɛ. 30Faaro ale wa nisɔmma ale Ejipiti demma yaa yiti yokku a kasim a kaari nna yegayega Ejipiti po diila yeri karo ate waai an kpi ya.
31Yɔkku Faaro yaa wi Moosis ale Aaron a weeni ba ayen, <<Ni yiti. Ni basi m nuruma, fi ale Izirali demma. Ni cheŋ a ga puusi Naawen ase ni ale bek diila. 32Ni ta ni piisaŋa ale ni duŋsaŋa, ase ni ale weeni diila a cheŋ. Abe ni niak mu mɛ.>>
33Ejipiti demma a yaa va nuruma ayen ba nye nwuli a basi tɛŋka. Ba weeni ayen, <<Kan daa di ti meena ale kpi.>> 34Nuruma yaa pai ba boroboroku alege ate ba gum dabinta du, a yaa pai vi ŋmankpala ale taasi tanlaŋ sii ate ba bilisi boroborok du la a pai gatta a pobi. 35Izirali demma yaa nye Moosis ale weeni diila. Ba yaa bek Izirali demma a tuesi kpana ale ligmɔniŋ ale gatta. 36Naawen a basi kama ate Ejipiti demma a ta ŋman teka ale siak teka ale nuruma ate ba te ba jabuui meena ate ba bek a yaali la. Ba yaa vari Ejipiti demma.
37Izirali yaa piilim ba chelimu a nyini Arameses a ga paari Sukkot. Nidoama a jam ka nuruba tusa kobsiyuebi (600,000) a cheŋ naŋta. Nipooba ale bimbaansa an gum du. 38Nuru boari ate ba an chim Izirali dem la ale piisa ale bua ale niiga nna yegayega ale jam maa cheŋ ale ba. 39Ba le ta zom buui a nyini Ejipiti jam la, ba yaa pai nye maasa. Ba an jam nyo dabinta du. Zommu a jam ka dabinta dii nyiŋla ba yiak ba kama ate ba nyini Ejipiti nyini, ba an nya suik a nye ŋandiinta.
40Izirali demma a jam goa Ejipiti ka bena kobsinaansi ale pisita. 41Bena kobsinaansi ale pisitawa nueri ka danni, a jam paari da dila danni dek, Naawen nuruma ale poori, poori la meena a basi Ejipiti kama. 42Naawen ale kpesi a nya yokku ayen wa ta ba nyini Ejipiti nyini la nyiŋ, Izirali demma meena a kpesi ate ba a zuli Naawen a magsi ba ŋaaŋsaŋa ale cheen la.
43Naawen yaa weeni Moosis ale Aaron ayen, <<Ŋmarisika ale nna a magsi Gaambasika. Nichaanɔ a kan dɛ Gaambasika. 44Fi dan ta yɔma wa baga dɛ kama, wa yoanni gebika ŋaaŋnyiŋ, 45alege waai ale kan boro a beni yaase waai ate fi pai wa ate wa a tom a te fu ate fu a tuni wa la an baga a dɛ.
46<<Waai dan ayen wa ŋɔbi lammu wa be ŋɔbi yenni po. Kan ta lammu a nyini peelimmoa. Kan wɛ kobini dinyi mɛ. 47Izirali demma meena a magsi ba dɛ tigini kama.
48<<Nichaanɔ waai ale maa bo ale ni la a daa yaali ayen wa dɛ Naawen Gaambasika ku a fɛ ate wa gebi nidoama ale bo wa yenni po la yoaŋa. Ate wa yaa maa baga a dɛ ase waai ate ba biak wa tɛŋka po la. Nidoa waai ale kan gebi la a kan dɛ. 49Sinsaŋŋa ka dila degadega ale tɛŋ biik ale nichaanɔ waai ale bo ale ni la.>>
50Izirali demma meena yaa nye dii ate Naawen a weeni Moosis ale Aaron la. 51Dai dila danni dek ate Naawen a ta Izirali demma a nyini Ejipiti nyini a va chaab ale ba ale poori diila.
Currently Selected:
Nyinika 12: BWU
Highlight
Share
Copy
Want to have your highlights saved across all your devices? Sign up or sign in
© 2023, Ghana Institute of Linguistics, Literacy and Bible Translation
