Nyinika 11

1Yɔgyɔgla de Naawen yaa weeni Moosis ayen, <<M le ta ka daanika bunyi a jam Faaro ale Ejipiti zuk. Kula ŋaaŋnyiŋ wa le te ate ni nyini dela cheŋ. Wa dan nye dila wa le yiak ni meena ate ni nyini. 2Weeni Izirali nidoama ale nipooma ayen ba bek ba le Ejipiti dem baai ale moata chaab la a tuesi kpana ale ligmɔniŋ ŋanta a nyini ba jigi.>> 3Naawen a basi kama ate Ejipiti demma a pai badek a te Izirali ate Moosis dek mɛ Faaro nisɔmma ale nuruma jaa zuli wa kama.

4Moosis yaa weeni ayen, <<Naawen ale weeni diila ale nna: <Yɔk suŋsuŋ m le cheŋ Ejipiti tɛŋka meena. 5Bi kpagi meena Ejipiti tɛŋka po ale kpi, a zaani Faaro bikpagni waai ale wa kali naamu zukpaglika zuk la, a ga paari nipok yɔmawa waai ale a num zom la bikpagni ale niiga bi kpaga mɛ. 6Kaarik nna yegayega le za ku bo Ejipiti a bie a gaam kaarik sii ate ba kaari a nya la, yaase kaari ka choa ale ŋman jam ase dila la. 7Alege Izirali demma po biak mɛ la a kan wosi nuru yaase duŋŋa.> Ate ni miŋ ayen Naawen a nye kama ate pooruŋ a bo Ejipiti ale Izirali suŋsuŋ. 8Fi nisɔmma de meena ale jam mi jigi a koori tɛŋ mi niŋ a weeni ayen, <Ni cheŋ, fi ale fi nuruma meena ale va fu la.> Dila ŋaaŋnyiŋ m le cheŋ.>> Moosis yaa basi Faaro ale suipuurum nna yegayega.

9Naawen a poom weeni Moosis kama ayen, Faaro ale zɛri wa kan wom fu ate m wakinkaglaŋa a tom piisi Ejipiti.>> 10Moosis ale Aaron a tom wakinkaglaŋa de meena kama Faaro niŋ, alege Naawen a basi ate Faaro suinummu a pagra, ate wa kan basi ate Izirali demma a nyini wa tɛŋka po a nyini.

Currently Selected:

Nyinika 11: BWU

Highlight

Copy