Sagrɔ 6

1Mi nya ka biem bu choa tɛŋzuk de ate bu dobra nna zaŋzaŋ nurubiik zuk. 2Wen a te nuru ka jigsika ale ŋanta ale zula, dila wa kan silim jaaboa, alege Wen an maari wa ate wa dɛ ba masimmoa, ale goanti basi ate nichaanɔ a dɛ ba. Kude a ka kiri ya, biem buui ale a daani.

3Dai dii dai nuru ale ta bimbaansa kook ale goa ben boari, wa dan poom goa beni dii ya, wa dan kan dɛ masim wa jigsika nyiŋŋa ate ba an gu wa nalimnyiini, mi a weeni kama ayen biluak kpiuk a zunchoŋ wa kama. 4Ka jamka a ka kiri ya, ka pilim ŋmani ka legini po, ku ka yuei ya. 5Ka an poom nya wenbinni yaase ka seba wari ya, ka nya vuusum a gaam nuru wala kama. 6Ase wa dan poom goa bena tusa ŋaye (2,000) alege an dɛ wa ŋantaŋa masimmoa. Ba meena a kan cheŋ daa jigi yeŋka la yaa?

7Nurubiik a nam ka wa nɔnni nyiŋ, alege wa nɔi masimu a kan kpi. 8Ka boan jaab zunchoŋ ate yam nyɔnɔ a ta gaam beruwa? Ka boan nyuenta ate jaŋsa nyɔnɔ ale nya ase wa nin seba wadek yikka nuruba niŋŋa? 9Fi dan nya jabuui ate fi ta la a zunchoŋŋa fi ale a yaali yega. Ŋanta yaalika yega a ka kiri ya, ku a nye ase ka fi le chali a vi viok diila.

10Jabuui meena ale boro la a poom ŋaam ta yuei kama, nuru abe le ta jabuui la ba poom seba kama, nuru a kan nak nanpaga ale waai ale pagra gaam wa la. 11Wieŋa a dan piisi, ŋa kiri a gela kama, dila abe le te ka wana nyuenta?

12Ka wana ale seba dii ale nala a te nuru wa boka po, daa magdega ale kan ta kiri la ate wa a taam ase yisuŋ la? Ka wana ale baga a weeni wa dii ale ku nye tɛŋzuk de wa nin cheŋ ga nueri ŋaaŋ nyiŋŋa?

Currently Selected:

Sagrɔ 6: BWU

Highlight

Compare

Copy