Sagrɔ 7

1Yuei maŋ a gaam kpa buui nyum ale masa la kama, ate kum dai a zunchoŋ biam dai. 2Fi dan cheŋ kuub a zunchoŋ dɛka tigi kama diila nuru meena a za wa kpi kama. Javuk meena abe a poli kude wari. 3Niniga a zunchoŋ laata kama, dii nyiŋla nimbie kaasika ka wamaŋ a te suinummu. 4Yam nyam popola a bo ka kuub yeri, alege betta popola a bo ka yie dii ate masim a boro la. 5Yam nyɔnɔ a dan toariŋ fu a zunchoŋ beruk ale a pak fu. 6Beruk laata a nye ase ka munsa ale bo bolim po a parisi diila. Kude mɛ a ka kiri ya.

7Varuk a tulim yam nyɔnɔ ate wa a chim ka beruk, ba dan pai ligra a da wa ŋa taŋ wa popolaŋa kama.

8Wari kpeglimka a zunchoŋ di piilimka kama ate chichiiba a zunchoŋ kanjanta. 9Kan basi ate fi sui a kpabi a puuri. Ka betta sue ale kpabi a puuri.

10Kan begi ayen ka boa ate dila po wa a zunchoŋ daaŋa de?>> Yam a ka ku po ase fi nin bek beŋŋa de.

11Yam a zunchoŋ kama ase bu nin jam ale nitalim. Ba meena a maari baai ale vua la kama. 12Yam a nye ase ka ligra la ba meena a maari kama. Alege yam a zunchoŋ kama, dii nyiŋla bu a vari waai ale ta bu la a basi kama.

13Nya Wen ale nye diila. Ka wana ale baga a teenti jabuui ate wa nye ate wa goaliŋ la? 14Ase daaŋa po ku dan masa, ta suipeentik, ale daaŋa po ku dan kan masa, a teeri, Wen a nye dinyiwa ase ka ndila la, dila nyiŋ nuru a kan baga a miŋ wa chum po wari ya.

15Mi bo kaai ale kan ta kiri la po mi nya ŋade buyewa kama, wayɔrisima nyɔnɔ a kpi ka wa wayɔrisimaŋa po ate gaasa nyɔnɔ a goa a beni ale wa gaasaŋa. 16Kan ŋmasi chim wayɔrisima nyɔnɔ a gaam taam yaase fi ta yam a gaam taam, boa ate fi a kaasi fi dega? 17Kan ŋmasi ta gaasa, abe fi kan chim beruwa, boa ate fi a kpi ale ge fi daa an paari yaa? 18Ku nala kama ate fi yik wanyi abe fi kan basi ate wanyiwa a cheŋ. Waai ale a chali Wen la ale ta ba meena.

19Yam a basi ate nuru a ta ka pagrim a gaam tɛŋ kpieŋ niŋdeerɔba pi.

20Wayɔrisima nyɔnɔ a ka tɛŋzuk de a nye dii ale magsi la a kan nye wabaata.

21Kan fi wom wari meena ate nuruba a weeni la, fi le wom ale fidek tomteerɔ a boro ka a te fu. 22Fidek seba kama fi suinum po ayen ku nɔi yega fi ka a te nuruba kama.

23Ŋade meena mi chamsi nya kama ale yam ale weeni ayen, <<Mi ale kpesi kama a nye ate m ta yam,>> alege kude a gaam m pagrim. 24Yam ale ka dii meena la, bu zunchoŋ kama ale zuak, ka wana ale baga a nya bu? 25Dila mi yaa tuliŋ m popola a basi miŋ chakka jigi ayen m kpesi gisi nya yam ale kperisa wie kiri abe m miŋ ayen ku ka koansa ase fi nin ta gaasa, ku abe a nye ase ka yesiŋsa la ase fi nin chim beruk.

26Mi nya ayen nipooba gela a bie gaam kum kama ate wa wari a pagra ase baruk la, ba yaalika a nye ase ka ŋmiak la, ate ba nisaŋa a bobi nidoaba a tara ase chɔrima la. Nidoa waai ale nye ate Naawen sui a yɔk la ale nya varibasika ba jigi, alege wabanyeerika ba le yik wa giŋgiŋ.

27Sagrɔwa ayen, <<Dii ate mi nya la ale nna. Mi pai ŋade meena a gum ka chaab ayen m nya kperisa meena kiri. 28Ase m le diem boro a gisi la, mi nya ka nidoa yeŋ tusini ate mi nya la po ale wa ta wensie alege daa nipok yeŋ ba po ale wa ta wensie. 29Kude nyiini ate mi nya ale Wen a nye nurubiik ayen wa ta wensie alege ba yaa va suita yega a gisi kperisa wie.>>

Currently Selected:

Sagrɔ 7: BWU

Highlight

Compare

Copy