Sagrɔ 5

1Kpesi fidek ase fi nin cheŋ fi puusi Wen yenni po. Fi dan wom chak zunchoŋ fi le nye betta kaabka ale poom zɛ ayen fi nye kaasi kama.

2Kan te ate fi nɔi a valima abe fi kpesi fidek fi ale a biisi dii a te Wen la. Wen a bo ka wenŋmazuk ate fi bo tɛŋzuk de, dila biisi magadega. 3Fi daa poli yegayega ku ta ka gɔdaasima a jam, ka betta ale a biisi wie yega.

4Ase fi dan puulim a te Wen, kan beni ale nyeka. Wen sui kan peenti ale betta, nye fi le puulim diila. 5Fi dan kan puulim ya ku zunchoŋ fi le puulim ale kan nye fi ale puulim diila. 6Kan basi ate fi nɔnni a ta fu jo biem po, abe fi kan ta chaab ale biisiteerɔwa Wen yenni po ayen, <<Mi ale puulim diila m nye bɛ kama.>> Fi dan nye dila Wen sui ale puuri ale fu ate wa kaasi jaab meena ate fi nam nya la. 7Gɔdaasima yegayega ale wie yegayega biisika a ka kiri ya. Dila a zuli Wen.

8Fi dan nya ale ba a namsi ŋanjaksa tɛŋ kpieŋ po, ate nyemagsika ale wensie a karo, kan te wa ŋala a cha fu, ale ka kpagi kpien nina ale bo wa zuk, ŋayema zuk ka kpagi kpiema ale diem boro. 9Tɛŋka ŋantaŋa ka ba ale soa ba meena, naawa dek a nya nyuenta ka dula.

10Waai ale a yaali ligra la a kan ta ligra yega, waai ale a yaali jigsika la jigsika a kan paari wa. Kude mɛ a ka kiri ya.

11Ase ŋanta ale a piisi diila, ba dɛɛrɔma mɛ a piisi ka dila. Be ka boan jaab nyuenta a te ba nyɔnɔwa, ka wa pai nina a nya ba?

12Tuimtomdɔ goom a masa kama, wa dɛ maga yaase wa dɛ yega wa a goa kama alege nuru waai ale jigsi la ŋantaŋa a kan te wa suik ate wa a goa.

13Mi nya ka biem ate bu a daani tɛŋzuk de, paaruŋ ka biem a te ku nyɔnɔwa 14yaase paaruŋ a va ka suik yoŋ a muriŋ a be dila wa dan ta nidoabili jaab karo tali a te wa. 15Chaboala ate nuru a nyini wa ma popo a nyini, wa be pilim a cheŋ ka dila dek. Wa kan pai jaab a nyini wa gigelika nyiŋŋa a nyo wa nisaŋa po a cheŋ.

16Kude mɛ ka biem ale ta daanika tɛŋzuk de. Ase nuru ale jam diila, dila dek ate wa a ŋmani, ka boan nyuenta ate wa nya, wa nam a te ka vioku? 17Wa daaŋa meena po wa a dɛ kama legini po ale ninam kayiok ale nyiŋ wula ale suipuurum.

18Mi yaa nya ayen ku nala kama ale chim wamaŋ ayen nuru a dɛ abe wa a nyu a chak wa gigelika ale wa ninammu nyiŋ tɛŋzuk de daa magadega ate Wen a te wa la, ka wa charuk ale la. 19Alege Wen a dan te nuru jigsika ale ŋanta ale maari wa ate wa a dɛ ba ale masim, ate wa tuesi wa paaruŋku ale ta suipeentik, kude ka Wen tiirim. 20Wa nyiem kan poli wa daaŋa ale gela diila wari ya, dii nyiŋla Wen a basi kama ate wa nina a muni ate wa sui a peenti.

Currently Selected:

Sagrɔ 5: BWU

Highlight

Compare

Copy