Sagrɔ 4

1Mi yaa ŋman nya namsi kaai meena ale bo tɛŋzuk de la. Mi nya baai ate ba a namsi la ninyaataŋa alege ba ka maarɔ, pagrimu a jam bo ka ba namsidɔma jigi, ba jam ka maarɔ. 2Mi yaa weeni ayen kpiema, baai ale ŋaam kpi la a ta suipeentik a gaam ŋanvutaŋa baai ale diem vua la. 3Alege ba le kan diem biak baai la a zunchoŋ ba nɔi buyewa kama ba an diem nya biem buui ale nye tɛŋzuk de la.

4Ate mi yaa nya ninam ale dii meena ate nuru a nye la ka wa ninŋmaarima ale wa vaanchoa la nyiŋ. Kude mɛ a ka kiri ya, ku a nye ase ka fi le chali a vi viok diila.

5Beruk a pa ka nisa vi chaab a kala a kan tom tuini ate ku a jo wadek nyiŋ. 6Ku zunchoŋ ate fi nina a sueri ale magadekka ate fi ta la. Kan daa di fi le kasim a nam kama fi nya yega, dila abe a nye ase ka fi le chali a vi viok diila.

7Mi ŋman nya ka wari ale di ka kiri tɛŋzuk de. 8Nuru ale jam boro wadek wa nyiini, wa ka nidoabili yaase suokwa. Wa ninammu a ka kpeglimka, dila meena wa nina an sueri ale wa paaruŋku. Wa yaa bek ayen, <<Ka wana ate mi a nam a te, ka boa ate mi a zɛri masim dɛka?>> Kude mɛ a ka kiri ya. Ninam kayiok.

9Nuruba baye a zunchoŋ wanyi kama, dii nyiŋla ba ale nya ka yega ba le a tom ale chaab la nyiŋ. 10Wanyi a dan lo tɛŋ, wa doawa ale maari wa ate wa yiti. Alege ta niniga ale waai ale lo ale ka nuru ate wa a maari wa ate wa a yiti la. 11Baye a dan doa ale chaab ba nyiŋsa a toliŋ kama. Alege nuru yeŋ nyiŋ ale nye ka sɛ a toliŋŋi? 12Ba le baga a nya pagrim wanyi zuk, alege nuruba baye a baga a zɛri badek nyiŋ kama. Miisa sita a dan mɛliŋ chaab si gebika toa kama.

13Bi kaai ale jaŋ ale ta yam la a zunchoŋ naab waai ale pak ale kan wom sinsaga la kama. 14Dai dii dai bi paaluk ale nyini likka dɔk a jam dɛ naam yaase ba biak wa jaŋsa po wa naamu po. 15Mi nya ale baai meena ale boro ale a cheŋ tɛŋzuk de la a va ka bi paalukku, waai ale tagri za naawa nankula po la. 16Nuru baai ale jam dɛ wa niŋ la a ka kpeglimka. Alege baai ale jam ŋaaŋnyiŋ la sue an peenti ale waai ale za naawa nankula po la. Kude mɛ a ka kiri ya, ku a nye ase ka fi ale chali a vi viok diila.

Currently Selected:

Sagrɔ 4: BWU

Highlight

Compare

Copy