Teerika 30

1<<Mi a te ni ka suik ayen ni lueri a ta nyini niaka ale kikaasa po. Ase wieŋa de meena a dan nye ni alege ate ni dan bo ale tɛŋ sii ate Naawen dii ale ka ni Wen la a basi ate ni waaŋ a bo si po la, ni le teeri mi ale weeni ayen ni lueri diila. 2Ase nama ale ni ŋaaŋbisaŋa a dan ŋman a jam Naawen dii ale ka ni Wen la jigi ale a zuli wa ale ni suiniima meena ale ni chiisa meena ale va wa wieŋa ate mi a te ni jinla de la. 3Naawen dii ale ka ni Wen la ale ta jiirim ale ni. Wa le ta ni a ŋman nyini tɛŋ sii po ate wa basi ate ni bo si po la a ŋman kuli abe wa basi ate maarika a ŋman jam ni jigi. 4Ni dan poom a yalima diidii ya, Naawen dii ale ka ni Wen la ale tigsi ni a basi jigi yeŋ a ta ni ŋman jam. 5Naawen dii ale ka ni Wen la, ale ŋman pilim a tuesi tɛŋ kaai ate ni koma a daam bo ka po la. Ate wa yaa le basi ate ni nya niaka abe ni piisi a gaam ni koma a daam ale ka diila. 6Naawen dii ale ka ni Wen la, dek ale te ni ale ni ŋaaŋbisaŋa suiniima ŋaai ate ni a zuli, dii ale ku basi ate ni a yaali Naawen ale ni suiniima meena ale ni chiisa meena ate ni boro. 7Naawen dii ale ka ni Wen la, ale tulim kikaasaŋa de meena a te ka ni dachaasaŋa baai ale kisi ni ale a namsi ni la. 8Ate nama ale ŋman a zuli Naawen abe ni va wa sinsaŋŋa meena ate mi a te ni jinla de la. 9Naawen dii ale ka ni Wen la ale niak ni wa dii meena ate ni a nye la po. Ni bisaŋa ale piisi abe wa niak ni duŋsaŋa mɛ. Ni tattaŋa ale nye ŋandiinta nalimnyiini. Naawen sui ale peenti ate wa basi ate ni jigsi ase wa le jam a basi ate ni koma a jigsi diila. 10Alege ku a magsi ka ni a wom Naawen dii ale ka ni Wen la nɔi abe ni ta wa wieŋa ale wa ŋmarisika ale ŋmarisi a bo wa sinsaŋŋa gbaŋka de po la. Ku a magsi kama ayen ni ŋmani a va Naawen dii ale ka ni Wen la ale ni suiniima meena ale ni chiisa meena.

11<<Wie ŋaai ate mi a te ni jinla de la vaka an toa yaase ŋa pagra a gaam vaka. 12Ŋa an bo daa chiŋmaaŋa po ate ni bek ayen, <Ka wana ale wa jueli a ta ŋa a jam ate ti wom abe ti va ŋa?> 13Yaa ŋa boka nyakpiemu kauk kunkula ate ti bek ayen ka wana ale wa lo beni a jueli a mooli a sak ti ate ti va ŋa? 14Aaya, wanni a moata ni kama, a bo ni noa po ale ni suiniima po. Dila nyiŋla ku a magsi kama ayen ni va ŋa.

15<<Ni nya jinla de m te ni ka nyuvuri ale niaka, kum ale kaasuŋ 16M weeni ni kama jinla de ayen ni a yaali Naawen dii ale ka ni Wen la abe ni a cheŋ wa suiku po abe ni ta wa wieŋa ale wa ŋmarisika ale wa buusaŋa ate ni boro abe ni piisi mɛ, ate Naawen dii ale ka ni Wen la ale niak ni tɛŋ kaai ate ni a jo ni tuesi la po.

17<<Alege ni dan tagri ni popolaŋa a zɛri ale nye tukpari nyeka, alege cheŋ a ga boro a koori tɛŋ a zuli bɔgluk yoŋta. 18Mi a weeni kama jinla de m le kaasi ni. Ni kan bo tɛŋ kaai ate ni lo le Jodan benni a jueli ayen ni tuesi la po a beni.

19<<Jinla mi a wi ka wenŋmazuk ale tɛŋ ate ba chim mi seerɔba ayen ni lueri nyuvuri ale niaka yaase kum ale kikaasa. Yɔgyɔgla de ni be lueri nyuvuri dii ale ku basi ate nama ale ni bisaŋa a vua. 20Yaali Naawen dii ale ka ni Wen la, wom wa lueluku abe ni va wa nalimnyiini. Ale ka wa ale ni nyuvunni, wala ale wa te ni bena piisi tɛŋka ate Naawen puulim ayen wa le te ni koma, Abrayam ale Aizik ale Jekob la.>>

Currently Selected:

Teerika 30: BWU

Highlight

Copy

Compare