Teerika 29

1Wieŋa de ale nɔiyeŋka wieŋa ate Naawen a weeni Moosis ayen wa nye ale Izirali demma Moab tɛŋka la. Nɔiyeŋ kala a gum chaab ale ka kaai ate wa liŋ jam nye ale ba Yoreb guuku la.

2Moosis a yaa tigsi Izirali demma meena a yaa weeni ba ayen, <<Ni nya kama ale nidek nina dii meena ate Naawen a nye Faaro ale wa niŋdeerɔma ale Ejipiti tɛŋka meena po la kama. 3Ni nya kama ale nidek nina nye nya kaai ale zuak ale wakperikaliisaŋa ale wakinkaglaŋa ate Naawen a nye la kama. 4A ta jam paari jinla de Naawen an te ni popola ŋaai ale a miŋi wie yaase nina ŋaai ale nya wie yaase tue ŋaai ale wom la. 5Bena pisinaansi wade meena ate mi a te ni va gɔnni po la, ni kɔlimaŋa yaase ni nuensaŋa an kaasi ya. 6Nama an ŋɔbi boroborok yaase damasik yaase ni nyu da buui ale kumu la. Mi nye dila kama ayen ni seba ayen Mi ale Naawen dii ale ka ni Wen la.

7<<Ase ni dan paari dela jigini, Naab Siyon Yesbon Naawa ale Naab Og Basan Naawa a yaa jam a nye kpaliŋ ale ti, alege ti nak yiak ba. 8Ti jam tuesi ba tɛŋka kama a poori ka a te Aruben ale Gad ale Manasa dɔkku geli.

9<<Ni kpesi a va nɔiyeŋ wieŋa de ate dila ale basi ate ni nya niaka dii meena ate ni a nye la po. 10Nama ale ni nisɔmma ale kpaŋŋa ale nuruma meena Izirali tɛŋka po a za ka Naawen dii ale ka ni Wen la niŋ jinla de, 11ale ni bisaŋa ale nipooma ale nichamma baai ale bo ni tɛŋka po a che daata ale ŋari nyiam a te ni la. 12Ni za dela kama ayen ni nye nɔiyeŋ ale Naawen dii ale ka ni Wen la, ku ka pumpuulima ŋaai ate Naawen dii ale ka ni Wen la a nye ale ni jinla de ale pɛka, 13ate kula ale sak jinla de ayen ni ka wa nuruba la, ate wa mɛ ale chim ni Wen ase wa le puulim ale nuruma ale pɛ ale ni koma Abrayam ale Aizik ale Jekob diila. 14Mi kan nye nɔiyeŋ pumpuulimaŋa ale pɛka ale ka nama nyiini, 15ale za dela jinla de Naawen dii ale ka ti Wen la niŋŋa, alege ale baai ale kan bo dela jinla la.

16<<Nama dek a seba ti le jam bo Ejipiti tɛŋka po diila kama ale ti le gaam tɛŋ sii meena suiku po a basi alege a paari dela la kama. 17Ni jam nya biem wieŋa ŋaai ate ba jam nye a ta va ba le sɛ daata ale tintana ale kpana ale ligmɔniŋ bɔgta a kaab la kama. 18Ni be a seba a chak ayen nidoa yaase nipok yaase ni dɔkku po jinla de a nye wa suinum po ayen wa kan va Naawen dii ale ka ti Wen la abe wa cheŋ a ga a kaab tɛŋ yoŋta bɔgta; ni be kan te suik ate choŋ kula choa a jam ni po.

19<<Ni be a seba ayen ni po waai a dan wom wieŋa de alege a poli a te wadek ayen wari meena ale nye nalimnyiini a te wa kama ase wa ni poom a nye wadek ale a yaali diila. Kula ale ta kaasuŋ a jam tɛŋka meena zuk. 20Naawen a kan vɔŋ a te kula choa nyɔnɔwa. Naawen sui ale goanti a puuri kama ale wa ate wieŋa ale ŋmarisi gbaŋka de po la meena ale jam wa jigi a ta ga paari diipo ate Naawen a yaa wa kaasi wa la. 21Naawen ale yeeri wadek wa nyiini a ta nyini Izirali buuni po a nyini a basi ate kaasuŋ a jam wa jigi a ta va nɔiyeŋka kika sii meena ale ŋmarisi bo sinsaŋŋa gbaŋka de po la.

22<<Ate chum po ni ŋaaŋbisaŋa ale nichamma baai ale nyini niŋniŋ a jam bo ale ni la ale nya kaasuŋku ale ninam buui ate Naawen a ta jam ni tɛŋka po la. 23Ni tɛŋka a kan nala ate ni a kpa, ka le nye ase ka yesa ale bo ka po la. Ni kan bori Jaab ka po, wuuta a poom kan nyini du mɛ. Ni tɛŋka ale nye ase ka Sodom ale Gomora ale Adma ale Zeboiim tɛŋsaŋa ate Naawen a jam kaasi si meena diipo ate wa suinni a jam puuri ale ba la. 24Ate tɛŋka meena demma a yaa bek ayen, <Ka boa ate Naawen a nye ba tɛŋka dila? Ka boa ate wa sui a domu?>

25<<Tulisaŋa abe nna, <Dii nyiŋla nuruma de a zɛri Naawen, ba koma Wen nɔiyeŋ kaai ate ba nye diipo ate wa jam ta ba a nyini Ejipiti tɛŋka po a nyini la kama. 26Ba jam a kaabka bɔgluk yoŋta ale koori tɛŋ a zuli bɔgluk tii ate ba zɛ, bɔgluk tii ate wa an pai a te ba. 27Dila nyiŋ ate Naawen sui a yaa jam puuri ale ba ate wa yaa basi ate kika sii meena ale ŋmarisi gbaŋka de po la a jam ba jigi. 28Naawen suinni a ŋmasi jam a puuri kama, suipuurum bula nyiŋ wa yaa yeeri ba a ta nyini badek tɛŋka po ate a cheŋ tɛŋ yoŋ. Ba bo ka dula jinla de.>

29<<Wasusuga meena ka Naawen dii ale ka ti Wen la ale soa. Alege wie ŋaai ale kan daa wasusuga la, ka tama ale ti bisaŋa ale soa ŋa taam wuu, dila ale ku basi ate ti a va sinsaŋŋa wieŋa de.>>

Currently Selected:

Teerika 29: BWU

Highlight

Copy

Compare