Teerika 26

1Ni dan jo tɛŋ kaai ate Naawen dii ale ka ni Wen la a yaa wa pai te ni la po a ga kali nueri, 2ni pai ni ale kpa ŋan baai tɛŋ kaai po ate Naawen dii ale ka ni Wen la ayen wa te ni la, ŋan baai ale dɛ niŋ a bɛ la ni ta ba cheŋ juijui ate Naawen dii ale ka ni Wen la a lueri ayen ni a puusi wa la ale busisa a ga nye wa jiam. 3Abe ni weeni kaabteerɔma ayen, <Mi a weeni fi Naawen dii ale ka mi Wen la jinla de kama ayen m jam tɛŋ kaai po ate fi Naawen a pɛ ayen fi le pai ka a te ti kokpieŋsaŋa la po kama.> 4Ate kaabteerɔwa a yaa le tuesi busika fi nisimaŋa po a pai ka a zaani kuŋkuŋ kuui ate ba nye kaabka a te Naawen dii ale ka ni Wen la tɛŋ. 5Ate ni yaa le weeni Naawen fi Wenni ayen, <M kowa jam ka Araam denɔ a nyiem a cheŋ. Wa jam cheŋ ga bo ka Ejipiti tɛŋka po, ale nuruba maga. Wa jam bo ka dula a yaa jam chim tɛŋ kpieŋ a pagra ale piisi mɛ. 6Alege Ejipiti demma a jam ta ka gaasa ale ti a basi ate ti a nam ale basi ate ti a tom tuim pagra. 7Ate tama a yaa jam kaari a te ti koma Naawen dii ale ka ti kokpieŋsaŋa Naawen la, ate Naawen a wom ti luelutaŋa ale nya tama ale a namu diila. 8Naawen a yaa ta ti a nyini Ejipiti po a nyini ale wadek pagrim. Wa sui ale jam puuri ate wa nye wakperikaliisa ale wakinkagla ale kpazinagsuk wie. 9Wa ta ti a jam ka dela a pai tɛŋka de a te ti. Tɛŋ kaai ate biisim ale siita a kasim bo ka po a chali. 10Ate m yaa ta ŋan baai ate mi a kpa tɛŋka po ate fi te mu ate ba dɛ niŋ a bɛ la a jam ayen m te fi Naawen.> Pai busika a zaani Naawen dii ale ka ni Wen la niŋ, a koori tɛŋ wa niŋ a puusi wa. 11Nama ale Livaima ale nichamma yaa le ta suipeentik ale wamaŋ sii meena ate Naawen dii ale ka ni Wen la a nye te ni ale ni yeeŋa demma la nyiŋ.

12Bena ŋata po meena tuni fi kpanni ŋantaŋa piika po a te Livaima ale nichamma ale kpiŋsaŋa ale pukɔŋŋa ate dila ale basi ate jigi meena baai ale kan ta ŋanta a dɛ ŋandiinta a chak. Ase ni dan nye dila, 13ni yaa weeni Naawen dii ale ka ni Wen la ayen, <M pai tuilum ŋan baai ate m yeeri m yenni po a magsi fi la m pai te Livaima ale nichamma ale kpiŋsaŋa ale pukɔŋŋa la a te ba kama a ta va fi ale weeni diila. Mi an zɛri fi ale weeni diila yaase m baŋi dinyi mɛ la. 14Mi an dɛ ŋan baai ate m yeeri a magsi fi la diipo ate mi a kum la, mi abe m pai wanyi mɛ la diipo ate mi daŋ la. Mi abe m pai jaab a te kpio. Mi a wom fi nɔi kama Naawen dii ale ka mi Wen la, m nye dii meena ate fi a weeni ayen m nye la kama. 15Nya ti a nyini wenŋmazuk fi tuilum jigini ate fi boro la abe fi basi ate niaka a nyini wenŋmazuk a jam fi nuruma Izirali demma jigi. Ase fi ale puulim dii ale ti koma ayen fi le te ba tɛŋ kaai ate biisim ale siita a bo ka po la.

16Naawen dii ale ka ni Wen la a weeni ni kama jinla de ayen sinsaŋŋa de: Ni kpesi a va ŋa ale ni suiniima meena ale ni chiisa meena. 17Nama a weeni kama jinla de ayen Naawen dii ale ka ni Wen la ale va wa suitaŋa kama abe ni va wa wieŋa ale wa sinsaŋŋa abe ni a wom wa le a weeni diila. 18Naawen a weeni kama jinla dɛ ayen ni ka wa nuruba ale wa tuilum ŋanta ase wa le puulim dii ale ni la ale weeni ayen ni va wa wieŋa la. 19Wa le basi ate ni gaam tɛŋsa meena ate wa nye la, ate ni nya yuei ale zula. Ni le chim ka nuru weleŋsa a te Naawen dii ale ka ni Wen la ase wa le puulim diila.

Currently Selected:

Teerika 26: BWU

Highlight

Copy

Compare