Teerika 25

1Nuruba a dan ta chaab ku a magsi kama ayen ba ta biika a cheŋ buusa boka yenni ate baai ale a bo buusa la a nya biika zuk. Bala ale ba bo a te waai wari ale boro la abe ba bo a mini waai wari ale kan boro. 2Ase waai ate ba bo a mini la ku dan magsi kama ayen ba nak wa, boteerɔwa ale basi kama ate wa duak tɛŋ ate ba miiri wa wa nimbie po a magsi chaab ale wa kaasuŋku ale ka diila. 3Alege ku kan magsi ba miiri wa a gaam pisinaansi. Ba dan miiri wa a gaam di la, ba le valiŋ wa.

4Kan kpalimu naab dɛka ase ni nin yik bu a fɔbi za.

5Ase nuru ale wa suok a dan boro ale chaab ate ba wanyi a kpi alege ka biiga. Pukɔgini an magsi wa basi wa chorɔwa dɔkku po a bɛ wa yali jigi yoŋŋoa. Wa chorɔwa suoku ale a magsi wa faari wa a nye dii ale magsi wa nyeka la. 6Biik kaai ate nipowa a dɛ niŋ a biak la ba pai nidoawa waai ale kpi la yuenni a te wa ate nuruwa yuenni a kan bɛ Izirali tɛŋka po.

7Alege nuruwa a dan zɛri an faari wa suoku powa, Nipowa a yaa le cheŋ ka tɛŋka niŋdeerɔma jigi a weeni ba ayen, <M chorɔwa suoku a zɛri kama ayen wa kan zak wa suoku yue a zaani Izirali tɛŋka po. Wa kan nye wa suoku ale magsi wa nye dii a te mu la.> 8Tɛŋka niŋdeerɔma ale biisi ale wa. Alege wa dan diem a zɛri ayen, <Mi kan yaali ayen wa faari wa.> 9Wa suoku pukɔgini a yaa le cheŋ wa jigi niŋdeerɔma nimbie po, a pai wa nuesaŋa dinyi a yaa chesi tintueta a nyo wa nimbidiaka nyiŋ abe wa weeni ayen, <Ku le magsi ayen ba nye waai ale ka a yaali ayen wa suoku a ta bisa la diila ale nna. 10Izirali demma ale seba nuruwa de ase ka waai nuensa ate ba yeeri la.#25:5-10 Arut 4:1-7; Matiu 22:23-33; Maak 12:18-27; Luuk 20:27-40.

11Ase nidoaba baye a dan ta chaab ate nwala powa a dan maari wa a yik nwala kolaŋa, 12ni gebi wa nisaŋa ni kan sak jiirim ale wa.

13Ni kan pai ŋanta baye ate ba dobrim chim tɔgatɔga, wanyi dobra, wanyi valima a nyo foruk yeoŋ po. 14Ni kan pai ŋanmagsinta baye tɔgatɔga kunyi zuak, kunyi pɔsima a nyo yeri po. 15Ni ta dobrim maŋsa ale ŋanmagsin maŋsa ate ni goa tɛŋ kaai ate Naawen dii ale ka ni Wen la ayen wa te ni la a beni. 16Naawen dii ale ka ni Wen la a kisi nuru waai ale a nye wieŋa de la kama.

17Ni teeri dii ate Amalek demma a nye ni la, diipo ate ni jam nyini Ejipiti tɛŋka po a nyini la. 18Diipo ate ni jam jiak la ba jam tu ni ka suik a ko baai ale jam wobsa a wari bo ŋaaŋ la. Ba kan chali Naawen yaa. 19Ase Naawen dii ale ka ni Wen la, a dan basi ate ni nya vuusum a ta nyini ni dachaasaŋa meena ale gilim ni la, tɛŋ kaai ate wa le te ni ate ni boro la, ni yeeri Amalek demma tɛŋka zuk. Ni kan baŋ.

Currently Selected:

Teerika 25: BWU

Highlight

Copy

Compare