Teerika 27
27
1Moosis ale Izirali niŋdeerɔma a yaa weeni nuruma ayen, <<Ni ta wieŋa de ŋaai ate mi a weeni ni jinla de la. 2Ase ni dan lo Jodan benni a jueli a jo tɛŋ kaai ate Naawen dii ale ka ni Wen la a te ni la po, ni tigsi tintain kpiema a sɛ abe ni taari ŋa. 3Ni ŋmarisi sinsaŋŋa meena a dueni ŋa zuk ase nama a dan lo jueli ayen ni jo tɛŋ kaai ate Naawen dii ale ka ni Wen la a te ni la, tɛŋ kaai ate biisim ale siita a bo ka po la, ase Naawen dii ale ka ni koma Wen la ale puulim dii ale ni la. 4Ni yaa dan lo Jodan benni a jueli, ni tigsi tintanaŋa de Ebal Guuku zuk ase mi ale weeni dii jinla dɛ la abe ni misi ŋa ale ŋam. 5Ni sɛ kuŋkuŋ dula jigini a te Naawen dii ale ka ni Wen la. Ni pai tintana nyiini a sɛ kuŋkuŋku, ni kan pai kutuk a che tintanaŋa. 6Ni pai tintana a sɛ kuŋkuŋ a te Naawen dii ale ka ni Wen la abe ni nye juka kaabka a te Naawen dii ale ka ni Wen la. 7Ni nye suiyɔgni tiirita kaabka dula abe ni dɛ ale suipeentik Naawen dii ale ka ni Wen la niŋ. 8Abe ni ŋmarisi sinsaŋŋa meena ate ŋa a nya cheri a dueni tintanaŋa de ate ni sɛ la zuk.>>
9Ate Moosis ale kaabteerɔma baai ale ka Livaima la a yaa weeni Izirali demma ayen, <<Ni goori Izirali demma abe ni wom de! Ni yaa ka Naawen dii ale ka ni Wen la nuruba. 10Ni zuli Naawen dii ale ka ni Wen la abe le va wa wieŋa ale wa sinsaŋŋa ate mi a te ni jinla de la.>>
11Da dila danni dek Moosis a weeni nuruma ayen, 12<<Ase ni dan lo Jodan benni a jueli, nuruma de dɔkku po ku a magsika ba jueli zaani Gerizim Guuku zuk a niak nuruma, Baai ale magsi ba nye dila la ale Simeyon ale Livai ale Juda ale Isaka ale Josefi ale Benjamin. 13Abe nuruma de dɔkku mɛ po a jueli Ebal Guuku zuk a ka kikaasa. Baai ale magsi ba nye dila la ale Aruben ale Gad ale Asɛ ale Zebulun ale Dan ale Nafitali.
14Ate Livaima a yaa le biisi ate ku jueli a te Izirali demma meena ayen.
15<<Kikaasa a va waai ale pai diok yaase kutuk a nye bɔgluk la. Ka wa dii ate Naawen a kisa. Diok ate nuru a pai nisa a nye a zaani jigi susugi la,>> ate nuruma meena ale tulisi ayen, <<Ku be nye dila.>>
16<<Kikaasa ale va waai ale ka a zuli wa ko yaase wa ma la,>> ate nuruma meena ale weeni ayen, <<Ku be nye dila.>>
17<<Kikaasa a va waai ale voori tintain dii ate wa vaanchoawa a pai feri wa talim bain po a basi la,>> ate nuruma meena ale weeni ayen, <<Ku be nye dila.>>
18<<Kikaasa a va waai ale ta nuru waai ale ka a nya a cheŋ a bɛ la,>> ate nuruma meena ale weeni ayen, <<Ku be nye dila.>>
19<<Kikaasa a va waai ale kaa nya nichamma ale kpiŋsaŋa ale pukɔŋŋa wensie la,>> ate nuruma meena ale weeni ayen, <<Ku be nye dila.>>
20<<Kikaasa a va waai ale a goa ale wa ko pok la yaase wa an zuli wa kowa jaduemmu la,>> ate nuruma meena ale weeni ayen, <<Ku be nye dila.>>
21<<Kikaasa a va waai ale a goa ale duŋ la,>> Ate nuruma meena ale weeni ayen, <<Ku be nye dila.>>
22<<Kikaasa a va waai ale a goa ale wa tua waai ale ka wa kowa lie yaase wa mawa lie la,>> ate nuruma meena ale weeni ayen, <<Ku be nye dila.>>
23<<Kikaasa a va nuru waai ale a goa ale wa pok ma la,>> ate nuruma meena ale weeni ayen, <<Ku be nye dila.>>
24<<Kikaasa a va waai ale mak a ko nuru la,>> ate nuruma meena ale weeni ayen, <<Ku be nye dila.>>
25<<Kikaasa a va waai ate ba da ate wa a ko waai ale kan kaasi wari la,>> ate nuruma meena ale weeni ayen, <<Ku be nye dila.>>
26<<Kikaasa a va waai ale kan va sinsaŋŋa de ale kan ta ŋa la,>> ate nuruma meena ale weeni ayen, <<Ku be nye dila.>>
Currently Selected:
Teerika 27: BWU
Highlight
Copy
Compare
Share
Want to have your highlights saved across all your devices? Sign up or sign in
© 2023, Ghana Institute of Linguistics, Literacy and Bible Translation
