Teerika 24

1Ase nidoa a dan faari nipok ate ku ŋaaŋnyiŋ wa an ŋma a yaali wa dii nyiŋla wa nya ka wari wa jigi, ate wa yaa ŋmarisi gbaŋ a nyo wa nisa po a zɛri wa ayen wa nyini yenni po a nyini, 2wa dan ga basi yenni a ga nueri wa ŋma a chim ka nidoa yoŋ pok, 3ate wa chorɔ waai ale saari bayewa la mɛ a dan ŋman ŋmarisi gbaŋ ayen ba basi chaab ale weeni wa ayen wa nyini yenni po a nyini yaase nidoawa a kpi. 4Nidoa waai ale liŋ a zɛri nipowa la a ka suik a ŋma a faari wa dii nyiŋla nidoa yoŋ ale goa ale wa la nyiŋ. Dila ka kisuk Naawen nimbie po. Ni kan ta biem a jam tɛŋ kaai ate Naawen dii ale ni Wen la a yaa wa te ni la po.

5Ase nidoa a dan piilim faari nipok ku kan magsi ayen wa cheŋ kpaliŋ po yaase ba tom wa jigiya. Ku a magsi wa wari ka yeri a nye ate nipowa waai ate wa faari la sui a yɔk.

6Ase fi dan peem fi ligra a te nuru fi baga a tuesi wa jaab kama a ta dii ale ku nye ate wa tuni ligni a te fu abe wa tuesi wa jaamu la. Alege kan fi tuesi niri yaase ba nie ŋaye wa meena ni dan nye dila ba le kpi ale kɔm. Ba ta nieŋa a num ka zom a nye ŋandiinta.

7Ase ni dan nya nuru ale wa yik wadek suok Izirali demma wanyi a nye wa ase yɔma la ni ko wa. Ni yeeri biem a ta nyini ni po a nyini.

8Gama tuem a dan boro ni kpesi nidek a nye dii ate kaabteerɔma baai ale ka Livaima a weeni ni la. Ku a magsi kama ayen ni va mi ale weeni diila. 9Ni a teeri dii ate Naawen dii ale ka ni Wen la a jam nye Miriam la diipo ate ni jam nyini Ejipiti po a nyini la.

10Ase nama a dan peem jaab a te ni mabiik, ni kan cheŋ wa yenni a ga tuesi jabuui ate wa a yaali wa pai a te a puulim la. 11Limisi ate nuru waai ale dɛ fi pamini la dek a jam te fu. 12Ase nuruwa a dan ka jajak kan ga goa ale wa le puulim jaabuui la a tara. 13Pai wa garukku a te wa, alege ate wen siŋ ate wa goa ku zuk ate wa te fi jiam ate ku nye ase wa maŋ la Naawen dii ale ka ni Wen la nina po.

14Ni kaa vari ŋanjaksaŋa yaase baai ate ni pai ate ba a tom. Ku nyɔnɔwa a dan poom ka Izirali denɔ yaa wa ka nichaanɔ a bo ni tɛŋsaŋa kanyi po ni kan vari wa. 15Ni tuni wa danni tutunaŋa ku le magsi ni tuni wa diila abe le ge ate wenni a siŋ. Wa ka jajak wa boro ka ŋanta bala nyiŋ. Kan daa di wa le kaari a te Naawen ate wa namsi ni biem bula nyiŋ.

16Ko a kan kpi a te biiga biik mɛ abe ka suik a kpi ko nyiŋŋa. Waai meena a kpi ka wadek biem nyiŋ.

17Ni be kan kasi nichamma ale kpiŋsaŋa ayen ba ka a nye ba yaalika, abe ni kan tuesi pukɔgi garuk a ta ayen wa dɛ pami nyiŋŋa. 18Ni a teeri ayen ni daam ka yɔm Ejipiti tɛŋka po ate Naawen dii ale ka ni Wen la da tuesi ni a basi. Dila ale soa ate mi a weeni ayen ni a nye kude la.

19Ase ni dan boro a che ni tattaŋa ŋantaŋa, ŋan baai ate ni gaam a basi la ni kan ŋman a cheŋ ba po. Ni basi bala ate nichamma ale kpiŋsaŋa ale pukɔŋŋa ate Naawen dii ale ka ni Wen la a niak ni nisima tuimaŋa meena. 20Ase ni dan zaŋ kpaam tiisaŋa yɔnaŋa ŋaai ale a wari naŋsaŋa nyiŋla ni basi ba a te nichamma ale kpiŋsaŋa ale pukɔŋŋa. 21Ni dan gbesi ni kaduksaŋa yɔnaŋa, ŋaai ate ni gaam a taam la, ni kan ŋman cheŋ ŋa po. Ni basi ŋala ate nichamma ale kpiŋsaŋa ale pukɔŋŋa. 22Ni be kan baŋ ni a le jam ka yɔm Ejipiti tɛŋka po la. Dila ale soa ate mi a weeni kude la.

Currently Selected:

Teerika 24: BWU

Highlight

Copy

Compare