Teerika 23

1Nuru waai ate ba je la yaase ba gebi wa yoari meena la an magsi wa gum Naawen nuruma po.

2Waai ate ba an yali alege biak wa la bala buuni po a ta ga paari buui dii ale a saari piika la an magsi ba gum Naawen nuruma po.

3Ammon demma yaase Moab demma yaase ba buuni po waai a ta ga paari buui dii ale saari piika la an magsi ba gum Naawen nuruma po. 4Dii nyiŋla ba an tu ni suiku po a te ni ŋandiinta ale nyiamoa diipo ate ni jam nyini Ejipiti po a nyini la. Ba gɔnti da ka Balaam, Biio ate wa nyini Petor Araam Nayaraim po la biika ayen wa ka a te ni. 5Alege Naawen dii ale ka ni Wen la a jam zɛri Balaam nɔi kama alege basi ate kikaasaŋa a chim niaka a te ni dii nyiŋla Naawen dii ale ka ni Wen la a yaali ni kama. 6Ase nama ale diem vua a boro ase tɛŋ la ni kan nye nɔiyeŋ ale tɛŋsaŋa de yaase ni basi ate ba jigsi.

7Ni nye Edom demma a magsi ale ba ka ni suata. Ni nye Ejipiti demma mɛ a magsi diila ni jam ka nicham ba tɛŋka po. 8Ba ŋaaŋbisa butawa po ale jam gum Naawen nuruma po kama.

9Ni dan tu chaab ayen ni nye kpaliŋ ale ni dachaasaŋa ni basi wa kaasima nye ka. 10Ase ni po nuru wanyi a dan daŋ wa le sam sim yokku la nyiŋ ku a magsi ka wa basi nuruma ale tigsi chaab kauk kuui la abe wa cheŋ jigi yoŋ. 11Ase wenni a dan baliŋ wa so wadek ate wenni a dan siŋ wa yaa le ŋmani a cheŋ nuruma ale tigsi chaab a bo kauk kuui la.

12Ni lueri kauk kuui ale kan moata ni tuka jigini la a cheŋ dula a ga gomsi nidek a magsi. 13Ase ni da a cheŋ ni ta jaab a magsi goluk tuka. Ate ni yaa dan cheŋ ni basi yaata ni ya tu goluk a lik ti. 14Naawen dii ale ka ni Wen la a cheŋ a gilim ni boka jigini kama a nya ni zuk ale gomsi ayen wa pai ni dachaasaŋa a nyo ni nisima po ni boka jigini a magsi ka weleŋsa a boro dii ale ku nye ate wa kan nya biem ni jigi ya ate dila nye ate wa basi ni.

15Ase yɔma a dan suk bo ni jigi, ni kan ni pai wa a te wa kpagni. 16Ni basi ate wa bo ale ni kauk kuui meena ate wa a yaa la ale tɛŋ kaai dek ate wa a lueri la. Ni kan namsi wa.

17Izirali nidoa yaase nipok a kan chim nidoa yaalik yaase nipok yaalik a bo bɔgta yeri po. 18Ni kan ta nidoa yaalik yaase nipok yaalik ale nya ŋan baai la a jam Naawen dii ale ka ni Wen la yenni po ayen ni tuni ni pumpuulima dii nyiŋla, Naawen dii ale ka ni Wen la a kisi ŋala meena kama.

19Ase fi dan peem ligra yaase ŋandiinta a te fi mabiik ka fi a yiili ayen wa tuni fu a poom gaam dii ate fi a peem a te wa la. 20Fi baga a nye dila nichaanɔ jigi kama alege kan nye dila Izirali denɔ jigi ya. Dila ale ku basi ate Naawen dii ale ka ni Wen la a niak ni ale tuin dii meena ate ni a tom tɛŋ kaai po ate ni a tuesi la.

21Ase ni dan pɛ ayen ni nye wari a te Naawen dii ale ka ni Wen la, kan beni abe ni tuni. Ni dan beni Naawen dii ale ka ni Wen la ale bek ni kama dii nyiŋla ku ka biem. 22Alege ni dan yeeri nidek pumpuulima po ni an nye kaasi ya. 23Alege ni dan nye dila ni be seba ayen ni a tuni kama, diila nidek ale lak ni noaŋa a puulim ale Naawen dii ale ka ni Wen la.

24Ase ni dan jo ni mabiik kaduk po ni baga a dɛ ŋan baai meena ate ni a yaali la kama. Alege ni kan tali a nyo busik po a ta kuli. 25Ase ni dan jo ni mabiik zaa laŋ po ni baga a wɛ zaaŋa a ŋɔbi kama alege ni kan che za ŋaai ale za la.

Currently Selected:

Teerika 23: BWU

Highlight

Copy

Compare