Teerika 22

1Fi dan nya fi suok naab yaase wa posuk a cheŋ bɛ a jam fi jigi kan deri ta, ta cheŋ ga te waai ale soa jaamu la. 2Alege ku nyɔnɔwa a dan yalima ale fu yaase fi zɛ ku nyɔnɔwa, ta duŋka a kuli fi yenni ate ku nyɔnɔwa a dan jam abe fi te wa. 3Nye dila dekdega a te fi suok kuui boniŋ yaase wa garuk ale bɛ la mɛ yaase jabuui meena ale bɛ jam fi jigi la. Kan fi peri jaamu.

4Ase fi dan nya fi suok boniŋ yaase naab ale bu lo suik po kan gaam duŋka a taamu maari wa ate ni yik ka ate ka yiti zaani.

5Nipok an magsi wa a jo nidoa kɔlima yaase nidoa a jo nipok kɔlima, dii nyiŋla Naawen dii ale ka ni Wen la a kisa dila kama.

6Ase fi dan nya nuim tuk tiib zuk yaase ku doa tɛŋka ate jaamu a dan pobi wa bisaŋa ta doa yaase jaamu a doa jena zuk, kan yik jaamu ale wa bisaŋa meena. 7Ni baga a yik bisaŋa kama alege basi ate ba mawa a cheŋ. Dila ale ku basi ate wie a nye a cheŋ nalimnyiini abe ni goa a beni.

8Ase ni dan se dɔk paaluk, ni se parik a gilim gboŋku ate waai a dan nyini ku zuk a lo abe wari a kan daani ni.

9Ni kan pai ŋanta baye a bori kaduk yeŋ po; ni dan nye dila daa jabuui ate fi a vuk fi kadukka po la nyiini ale a kaasi yɔnaŋa mɛ a kaasi kama.

10Ni kan yik naab ale boniŋ a maŋ chaab a kpa.

11Ni kan pai ba le pai duŋsa kɔbta ale garuk miisa a gum chaab yɔk kɔlima ŋaai la a jo.

12Ni dan baali garuk ni basi ate ku ta zuesa ku noaŋa bunaansiwa.

13Ase nuru a dan faari nipok a goa ale wa ku ŋaaŋnyiŋ a kan ŋma a yaali wa, 14a yaa kisi wa ale te wa yue kaasuŋ, a weeni ayen, <<Mi faari nipowa de kama, alege mi ale goa ale wa a ga nueri la m yaa miŋ ayen ba liŋ goa ale wa a nya kama.>> 15Nipokbinni kowa ale wa mawa a yaa le weeni ayen wa jam ka waai ale kan seba nidoa a nya ya ate tɛŋka niŋdeerɔma a seba ku nɔi po. 16Nipokbinni kowa ale weeni niŋdeerɔma ayen, <<Mi pai m liewa a yalisi nuruwa de kama alege ate wa kan yaali wa. 17Wa weeni ayen fi liewa ka waai ale poom seba nidoa la. Ate wa kowa yaa ale weeni ayen dii ale a sak ayen m liewa ka waai ale kan seba nidoa la ale nna. Liewa nyama yaa le lati garuk kuui ate wa duek ku zuk a goa la.>> 18Ate niŋdeerɔma ale yik nuruwa de a namsi wa. 19Ba le basi ate wa tuni ligra nna yegayega a te nipokbinni kowa, dii nyiŋla nuruwa a de a yaali ka yue kaasuŋ a te Izirali nipokbili dii ale kan seba nidoa la. Nipokbinni ale diem chim ka wa pok. Ase ba le ta nyuvuri a diem boro la wa ka suik a baga a zɛri wa.

20Ase nidoawa ale weeni diila a dan sum ka wensie ayen nipokbinni a seba nidoa a nya kama, alege wari a karo a sak ayen wa zɛ nidoa. 21Ba ta wa a nyini wa kowa nansuiŋku nɔi ate tɛŋka nuruma a yuk wa ale tana a ko. Dii nyiŋla wa ta ka chivie a jam Izirali tɛŋka po. Wa jam diem boka wa kowa yenni po ale deri a goa ale nidoaba. Ni yeeri biemu de ni po a basi.

22Ase ni dan yik nuru ale wa boro a goa ale nuru pok nidoawa ale nipowa baai ale goa ale chaab la ni ko ba meena. Ni yeeri biemu de Izirali tɛŋka po a basi.

23Ni be dan nya nuru ale wa zik nipokbili tɛŋka po waai ale a gomsi wa yali a goa ale wa, 24ku a magsi kama ayen ni ta ba nɔi bayema nyini peelim a yuk ale tana a ko. Ni ko nidoawa mɛ dii nyiŋla wa kaasi ka a waai pok. Ni yeeri biemu de ni po a basi.

25Alege nuru a dan zik nipokbili dii ale gomsi magsi ayen wa yali la gɔi po a fɛ a goa ale wa, nuru waai ale nye dila la ba ko wa. 26Ni kan nye nipokbinni wari ya, dii nyiŋla wa an nye biem a magsi ni ko wa. Kude a nye ase ka nuru ale nye kpaliŋ ale wa vaanchoa a ko wa diila. 27Nuruwa a nya nipokbinni ka gɔnni po, nipokbinni a kaari kama alege waai an moata ayen wa vari wa a basi.

28Ase nuru a dan zik nipokbili dii ale kan seba nidoa ale ka waai a gomsi ayen wa yali mɛ la a goa ale wa ate ni nya, 29ku a magsi nidoawa a tuni ka ligra a te nipokbinni kowa abe wa faari nipokbinni dii nyiŋla wa kaasi wa kama. Wa ka suik a zɛri wa diipo diipo.

30Nuru an magsi wa faari wa ko powa. Ku an magsi wa goa ale wa ko powa.

Currently Selected:

Teerika 22: BWU

Highlight

Copy

Compare