Teerika 21

1Ase ni dan nya nuru ale wa kpi doa tɛŋ kaai ate Naawen dii ale ka ni Wen la a pai a te ni la po ate ni dan kan seba waai ale ko wa la, 2ni niŋdeerɔma ale baai ale a bo buusa la a magsi ba nyini ka peelim a magsi a ta nyini kpiewa ale doa juijui la a ta ga paari tɛŋ kaai ale moata la. 3Ate tɛŋ kaai ale moata kpiewa la niŋdeerɔma a lueri naasari dii ate ba an diem pai bu a tom tuini nya la, 4a yaa ta wa a cheŋ juijui ate ba an diem kpa du a nya yaase kauk kuui ate buboalik nyiam a chali a taam la. Ni wɛ naasanni ŋinni dula jigini. 5Kaabteerɔwa ale Livaima bisaŋa yaa le nyini jam niŋ, diila Naawen dii ale ka ni Wen la ale lueri ba ayen ba a tom abe ba a mooli niauŋ Naawen yuenni nyiŋ abe ba a nya biisa zuk nuruba a nin ta chaab ale a nak chaab. 6Ate niŋdeerɔma baai tɛŋsaŋa ale moata kauk kuui ate ba ko nuruwa la a nari ba nisimaŋa a basi naasanni ate ba a wɛ di ŋinni viaka po la zuk, 7abe ba yaa weeni ayen, <<Tama an ko nuruwa de yaase ti nya dii ale nye la. 8Be duisi fi nuruma Izirali demma biemu, baai ate fi da tuesi la. Naawen kan namsi fi nuruma, nuruwa de kummu nyiŋŋa alege ba zɛ ku nɔi po. Ziim buui ale nyini la, duisi a basi. 9Dila nyiŋ ni le yeeri nidek wanni de po ayen ni zɛ nuruwa de kummu po, ni le nye dii ale nala Naawen nina po la.

10Ase ni dan cheŋ ni nye kpaliŋ ale ni dachaasaŋa ate Naawen dii ale ka ni Wen la a dan pai ba a nyo ni nisima po ate ni nak yik ba, 11ate ni yaa nya ale nipok naliŋ a bo ba po ate ni a yaali wa ayen wa chim ni nipok, 12ni ta wa a kuli ni yeeŋa a che wa zuisaŋa abe ni dueri wa ninyeensaŋa, 13abe ni yeeri kɔlima ŋaai ate wa jo diipo ate ni nya wa kpaliŋka po la dueni nakpiak. Ase wa yaa a dan bo ni yeeŋa po a kum wa nyama nyiŋ a paari chiik pumi ni baga a faari wa kama. 14Ase fi dan kan mariŋ wa, basi ate wa cheŋ kauk kuui meena ate wa a yaali la. Kan pai wa a da yaase fi nye wa ase yɔma la, fi le tɔlim kan te wa zula la.

15Ase nuru a dan faari ni pooba baye ate wa yaa yaali wanyiwa alege kan yaali nwala, alege nipooma meena a biak bisa a te wa alege nipok waai ate wa kan yaali la biika a chim kpagi, 16ate nuruma a poli ayen wa poori ŋantaŋa a te wa bisaŋa, wa kan nye lukka nyeka a gaari kpagni ale magsi wa dɛ kauk kuui la a te baaŋka waai ate wa a yaali la. 17Wa magsi wa siak kama ayen wa pok waai ate wa kan yaali la biika ale kpagi, wa te wa kpagi charuk. Bi kala ale dɛ niŋ a sak wa kowa pagrimu. Kpagi ale magsi wa soa jabuui meena la, ka wa le soa.

18Ase nuru a dan ta biik ate wa ta tukpari a kan wom wa kowa ale wa mawa nɔiya, wa kan zuli ba, se ba dari wa turi, 19wa kowa ale wa mawa a magsi ba ta wa a jam te ka niŋdeerɔma ale bo tɛŋka nansuiŋtaŋa la. 20Ba le magsi ba weeni diila ale nna, <<Tama biika de a ta ka tukpari a kan wom ti nɔiya. Wa kan zuli ti. Wa a kaasi ka ligra ale a nyu daam.>> 21Ate tɛŋka nuruma meena a yaa yuk wa ale tana a ko ku a magsi kama ayen ni yeeri biemu de ni po. Izirali demma meena ale wom dila ate ba yɔgsa.

22Ase ba dan ko nuru wa biemu nyiŋ a pai wa a yik tiib nyiŋ, 23ni kan basi ate wa nyiŋka a bo tiimu nyiŋ ate tɛŋka a sobi. Ni gu wa da dila danni dek. Dii nyiŋla waai ate ba pai a yik tiib nyiŋla Naawen a ka te ku nyɔnɔwa kama. Ni kan kaasi tɛŋ kaai ate Naawen dii ale ka ni Wen la a yaali wa te ni ate ni bo ka po la.

Currently Selected:

Teerika 21: BWU

Highlight

Copy

Compare