Teerika 20

1Ase ni dan cheŋ kpaliŋ ate ni nya ale ni dachaasaŋa a ta wusuma ate ba tugurik tɔŋdɔma mɛ a piisi a gaam nama ale ka diila ni kan chali yɔgsummoa, dii nyiŋla Naawen dii ale ka ni Wen la dii ale ta ni nyini Ejipiti nyini la a bo le ni kama.#20:1 Nya fotowa, Nyinika 14:9. 2Ni daa yaali ni cheŋ kpaliŋ, kaabteerɔwa ale magsi wa jam niŋ a weeni dii ale magsi ni nye la. 3Wa le weeni ayen, <<Ni wom Izirali demma, jinla danni ni a cheŋ ni ga nye ka kpaliŋ ale ni dachaasaŋa. Ni kan chali yaase ni a chali yɔgsummoa; ni kan basi ate yɔgsum nye ate ni nyiŋsaŋa a gɔgi. 4Ka Naawen dii ale ka ni Wen la waai ale ta pagrim meena la ale a cheŋ wa kpaliŋ ale ni dachaasaŋa abe wa basi ate ni nak a dɛ ba.

5Tugurik tɔŋdɔma kpaŋŋa ale bek ayen, <<Waai ale sɛ yie paali a kan pai di a nyo Naawen nisima po? Basi ate wa kuli yeri dai dii dai wa le kpi kama kpaliŋka po ate waai ale pai di nyo Naawen nisima po. 6Waai a boro a ta wa kaduk ale kan dɛ ka ŋanta? Basi ate wa kuli yeri dai dii dai wa le kpi ka kpaliŋ po alege ate waai a dɛ wa kadukka ŋantaŋa. 7Nuru a baga a puulim ale nipok ayen wa ale faari wa alege an faari wa, wa le kpi ka kpaliŋ po ate nuru yoŋ faari wa. 8Ate tugurik tɔŋdɔma kpaŋŋa mɛ ale weeni gum du ayen, <<Nuru a boro a chali yɔgsummoa? Ni basi ate wa kuli yeri ate wa suataŋa mɛ a kan chali yɔgsummoa.>> 9Tugurik tɔŋdɔma kpaŋŋa a dan biisi ale tugurik tɔŋdɔma a ga nueri, ba yaa le lueri nuruba ate bala ale dɛ ba niŋ.

10Ase ni daa cheŋ ni a le te ba ka suiyɔgni. 11Ba yaa a dan siak a lagri ba nansuiŋtaŋa, nuru meena ale siak a tom a te ni. 12Ba be dan zɛri suiyɔgni nyeka alege a nye kpaliŋ ale ni, nama mɛ abe nye kpaliŋ ale ba. 13Naawen dii ale ka ni Wen la a dan pai tɛŋ m nala a nyo ni nisima po, ni ko nuru bala meena. 14Alege nipooma ale bimbaansaŋa ale duŋsaŋa ale jaab meena ale bo tɛŋka po la ni baga a pai a ta kama. Ka Naawen dii ale ka ni Wen la ale tuesi ba ni dachaasaŋa jigi a te ni. 15Ku a magsi ni nye ka dila dekdega ale tɛŋ sii meena ale yalima ale ni la.

16Alege tɛŋ sii ate Naawen dii ale ka ni Wen la ale pai te ate ni bo si po la, ni ko ŋanvutaŋa meena. 17Ni ko nuruma meena: Yit demma ale Amori demma ale Keenan demma ale Perizzi demma ale Yivi demma ale Jebus demma ni ko ba meena ase Naawen dii ale ka ni Wen la ale weeni ayen ni nye diila. 18Ni dan kan nye dila ba le sak ni kama ate nama mɛ maara a tom biem tuima ŋaai ate ba a nye la, a maara a kaab bɔgta. Dila abe basi kama ate ni tom a kaasi Naawen dii ale ka ni Wen la.

19Ase ni dan boro a nye kpaliŋ ale tɛŋ kaai ate ku beni ni kan che tiisaŋa a lɔnsi ale liaga. Dii nyiŋla ni baga a dɛ si yɔnaŋa kama. Ni kan che si a lɔnsi. Tiisaŋa daa ni dachaasaŋa. 20Alege ni baga a che ti sii ale kan ta yɔna ate ni a dɛ la kama a nye ŋanta a nak parisaŋa a wɛ a ta ga paari diipo ate nama ale nak a yik ba la.

Currently Selected:

Teerika 20: BWU

Highlight

Copy

Compare