Teerika 19

1Ase Naawen dii ale ka ni Wen la a dan ko nuruma baai tɛŋka ate wa pai a te ni la, ale yiak ba ate ba nyini ni yaa le kali ba tɛŋsaŋa ale ba yeeŋa po. 2Ku la ŋaaŋnyiŋ ni lueri tɛŋsa sita ate si bo suŋsuŋ ate Naawen dii ale ka ni Wen la a pai a te ni ayen ni ta la. 3Ni kpa suita tita a ta cheŋ tɛŋsaŋa de. Ni poori tɛŋka buta ate Naawen dii ale ka ni Wen la a pai a te ni ayen ni ta la, ate waai a dan kan potim seba ale ko nuru abe wa chali cheŋ dula.

4Suiku ale nna ase waai a dan kan potim seba ale ko nuru ale chali a cheŋ dula wa vari wa nyuvunni a basi la. Waai a dan kan seba alege ko wa vaanchoa ale ge ku nyɔnɔwa a daa wa dachiaga wa baga a chali a cheŋ tɛŋ sila kanyi kama. 5Ase nuruba baye a dan cheŋ gɔi ba che daata, ase wa ale boro a che la liaka a ga nak nuruwa a ko, nuru wala a baga a chali a cheŋ tɛŋsaŋa de kanyi po kama a suk a vari wa nyuvunni a basi. 6Dan kan daa di kotundɔwa ale vi waai ale kan seba ale ko la ale suipuurum, a paari wa, diila suiku a wɔŋa kama, a ko wa, alege ku an poom magsi ayen wa kpi, wa le kan poom kisi wa kama a nyini daam la. 7Dila nyiŋ ate mi a weeni ayen ni lueri tɛŋsa sita a te nidek la.

8Ase Naawen dii ale ka ni Wen la a dan basi ate ni piisi ase wa ale puulim dii ale ni kokpieŋsaŋa la a yaa a te ni tɛŋka meena, 9dii nyiŋla ni ale chiibi a va sinsaŋŋa ate mi a weeni ni jinla de ayen ni a yaali Naawen dii ale ka ni Wen la abe ni a va wa suitaŋa meena nyiŋ, ni bɛ ŋman lueri tɛŋsa sita a gum du. 10Ni nye di la ate nuru baai ale kan nye wari la a kpi ni tɛŋka po, kaai ate Naawen dii ale ka ni Wen la a yaa wa pai a te ni la, ate ku kan daani ni ale ko ba la nyiŋŋa.

11Alege nuru a dan kisa wa vaanchoa a magi a nak wa a ko ale chali cheŋ tɛŋsaŋa de kanyi, 12waai ate wa ko la tɛŋka niŋdeerɔma a tom ate ba ta wa jam ate kotundɔwa a ko wa. 13Ni kan sak jiirim ale wa. Ni yeeri biem bula a ta nyini ni po a nyini ate ni kaa ko nuru baai ale kan nye wari la, ate wari meena ale nye niak a te ni.

14Kan voori fi vaanchoawa tɛŋka tintain dii ate ni koma a feri ate di a sak ni ni tɛŋsaŋa banaŋa ate Naawen dii ale ka ni Wen la a te ayen ni ta la.

15Nuru yeŋ nyiini a kan baga a weeni ayen nuru a kaasi wari ya. Ka nuruba a nin paari baye yaase bata a weeni ayen nuruwa a nye kaasi kama.

16Ase waai a da a yaali wa daani waai a yaa velim a te wa, 17ba nɔi bayema a magsi ba cheŋ ka Naawen ale lueri juijui a te ba ayen ba a puusi wa la kaabteerɔma ale baai ale a bo buusa yenni po. 18Boteerɔma a magsi kama ayen ba ŋmasi kpesi nya wanni po ase waai ale weeni wanni la ka velimvendik, a yaa wa velim a te wa vaanchoawa, 19ni nye wa mɛ ase wa ale a yaali wa nye wa vaanchoawa diila. Ku a magsi kama ayen ni yeeri biemu de ni po. 20Nuruma meena ale wom dila ate yɔgsum a yik ba ate wa dila choa a kan ŋman nye ni po. 21Ni kan sak jiirimmoa. Waai a dan ko nuru ba le ko wa mɛ a tuni. Waai a dan yeeri nuru num ba le yeeri wa mɛ num a tuni. Waai abe dan voori waai nyin ba le voori wa mɛ nyiini a tuni. Waai mɛ abe dan gebi nuru nisa ba le gebi wa mɛ nisaŋa. Waai a dan gebi nuru naŋ ba le gebi wa mɛ naŋka a tuni.

Currently Selected:

Teerika 19: BWU

Highlight

Copy

Compare