Teerika 18

1Kaabteerɔma, baai ale ka Livaima la an magsi ayen ba ta ba dek tɛŋ Izirali tɛŋka po. Livai dɔkku meena an magsi ba poom ta jaaboa. Ku a magsi ba soa ka ŋan baai ate ba pai a nye juka kaabka a te Naawen la. 2Ba an magsi ba ta tɛŋ ba suataŋa jigi ya; Naawen ale ba ŋantaŋa ase wa ale puulim ba la.

3Diipo meena ni dan nye kaabka ale naab yaase posuk ku a magsi kama ayen ni te kaabteerɔwa ka bɔŋŋa ale tapayaasaŋa ale puuka. 4Ni te ba ni kpanni ŋan baai ale liŋ a bɛ la ni zaaŋa ale da paalimu ale kpaamu ale ni ale dɛ niŋ a che ni piisaŋa kob tii la, 5ale ka Naawen dii ale ka ni Wen la ale lueri ba ale ba ŋaaŋbisaŋa a ta nyini ni dɔkku po ayen ba zaani a biisi a te Naawen yuenni nyiŋ diipo meena.

6Ase Livai denɔ a dan basi wa le bo juijui la ale jam juijui ate Naawen ale lueri ayen ni a puusi wa la, 7wa ale biisi kama wa Naawen dii ale ka wa Naawen la yuenni nyiŋ ase wa vaanchaab mbala Livaima ale a nye dii Naawen nyiŋla. 8Wa ale kaabteerɔma a magsi ba dɛ a soa si ka chaab la a gum wa dɔkdemma ŋan baai ate wa pai da ligra la po.

9Ase ni dan jo tɛŋ kaai ate Naawen dii ale ka ni Wen la a yaa wa te ni la, ni kan ni tomsi ba a nye kisita wie ŋaai ate Naawen a kisa alege ate tɛŋ sila a nye la. 10Ni waai kan pai wa nidoabili yaase wa lie a ju bolim a nye kaabka. Waai kan chim baanɔ yaase wa a porisi, yaase wa a weeni wie kie la, yaase waai a tom sakpaŋni, 11yaase waai a paasi nuruba, yaase waai a porisi yaase waai a wi chichirisa yaase waai a biisi ale baai ale kpi la. 12Waai abe a nye wieŋa de la Naawen a kisa ŋa kama. Be ka kisita wieŋa de nyiŋ ate Naawen dii ale ka ni Wen la a yiak tɛŋsaŋa de meena a basi a te ni la. 13Ni kan ta nye kaasuŋ Naawen dii ale ka ni Wen la niŋŋa.

14Tɛŋ sii po ate ni za ni tuesi la nuruba ale a va sampoporinni ale sakpaŋni wie. Alege Naawen dii ale ka ni Wen la a kan yaali ni a nye di la. 15Naawen dii ale ka ni Wen la ale te ni biisiteerɔ ase mi la a ta nyini nidek suataŋa po. Ku a fɛ kama ayen ni a wom wa. 16Dii ate ni jam a bek Naawen dii ale ka ni Wen la diipo ate ni jam tigsi chaab Yoreb guuku zuk a weeni ayen, <<Mi kan basi ate ti wom Naawen dii ale ka ni Wen la lueluku yaase ti nya bolim kpiemu, kan daa di ti ale kpi.

17Ate Naawen a yaa weeni mi ayen, <<Ba ale weeni diila a nala kama. 18M le te ba ka biisiteerɔ a nyini badek suataŋa po ase fi la, m le pai m wieŋa a nyo wa nɔnni po ate wa ale weeni ba m sinsaŋŋa ate mi a te wa la. 19Ase nuru waai a dan kan wom m wieŋa ate biisiteerɔwa a biisi m yuenni nyiŋla, m dek ale te wa waalika. 20Alege biisiteerɔ waai ale a pai mi yuenni nyiŋ a biisi dii ate mi an weeni wa ayen wa biisi la yaase biisiteerɔ waai ale a biisi bɔgluk yonta yuei nyiŋla, a za wa kpi kama.

21Da dii dai ni ale bek nidek ayen, <<Tama ale nye ka sɛ a seba ayen wanni de daa Naawen ale biisi ya? 22Ase biisiteerɔwa a dan biisi wari Naawen yuenni nyiŋ alege ate wanni an nye ya di ka wa dii ate Naawen an biisi ya. Nuru wala a biisi ka wadek wie. Ni kan chali wa yɔgsum.

Currently Selected:

Teerika 18: BWU

Highlight

Copy

Compare