Teerika 17

1Ni kan nye kaabka a te Naawen dii ale ka ni Wen la ale naab buui yaase posuk kuui ale kɔni ya. Naawen a kisi dila kama.

2Ase nidoa yaase nipok a dan bo ni tɛŋsaŋa kanyi po, sii ate Naawen dii ale ka ni Wen la a yaa wa te ni la po ate ni dan nya ale wa nye biem Naawen dii ale ka ni Wen la nimbie po a zɛri nɔiyeŋka, 3ale nye dii ale kan va m sinsaŋŋa la ale kaab bɔgta, a koori tɛŋ a puusi wenbinni yaase chiika yaase chiŋmarisaŋa, 4ate ni dan ga miŋ dila, ni ŋmasi a gisi di po a nya dan ka wensie ayen kisukku de choa a sum nye kama Izirali tɛŋka po, 5ni ta nidoawa de yaase nipowa de waai ale nye biemu de la a cheŋ tɛŋka nansuiŋku nɔi peelim a yuk ku nyɔnɔwa ale tintana a ko. 6Nuruba dan paari baye yaa bata a weeni ayen wanni ka wensie ku a magsi kama ayen ba ko nuru wala, alege ku an magsi ni ko waai ya ase nin ka nuru yeŋ nyiini ale weeni ayen wanni ka wensie. 7Baai ale weeni ayen wanni ka wensie la ale magsi ba dɛ niŋ a yuk nuruwa ale tintana abe ba ge suik ate waai meena a yuk wa a ko. Ku a magsi kama ayen ni basi ate biemu de a nyini ni po a nyini.

8Ase ba dan ta biik a jam buusa boka yenni ate ka pagra ate nama a bo biika buusa. Ase ba dan ko nuru a yaase tɛŋ nyiŋ ate ba ta chaab yaase ba kpaliŋ chaab ni ta ba a cheŋ juijui ate Naawen dii ale ka ni Wen la a lueri ayen ni a puusi wa la. 9Ni cheŋ kaabteerɔma jigi baai ale ka Livaima la jigi ate boteerɔwa waai ale bo dɔkku po la a yaa nya biika zuk. 10Ku a fɛ kama ate ni nye a ta va chaab ale ba ale zɔk dii a weeni ayen Naawen ale lueri juijui ayen ni a puusi wa la. 11Ni nye a ta va chaab ale sinsaŋŋa ate ba sagni la ale ba ale a poli diila. 12Nuru waai ale a zɛri boteerɔ waai yaase kaabteerɔ waai ale za a tom a te Naawen dii ale ka ni Wen la a magsi ba ko wa kama. Dila ale ku basi ate ni yeeri biem Izirali tɛŋka po a basi. 13Nuruma meena ale wom ate ba a chali yɔgsum, ate waai a kan ŋman nye wa dila choa.

14Ase ni yaa dan jo tɛŋ kaai ate Naawen dii ale ka ni Wen la a yaa wa pai te ni la a tuesi nueri a yaa kala ka po, ate ni yaa weeni ayen, <<Ti lueri naab ate wa a nya ti zuk ase tɛŋ sii ale kala a gilim ti la ale ta nalima diila.>> 15Ni be lueri naab waai ate Naawen dii ale ka ni Wen la a lueri la. Wa magsi wa nyini ka nidek suataŋa po. Ni kan basi ate nichaanɔ a nya ni zuwa. 16Naawa an magsi ayen wa yaali naa wusum boari a te wa tugurik tɔŋdɔma, wa be kan tom nuruba mɛ ate ba cheŋ Ejipiti tɛŋka a da naa wusuma. Dii nyiŋla Naawen a weeni kama ayen wa nuruma a kan ŋman cheŋ Ejipiti tɛŋka. 17Wa be kan faari nipok boari ya. Wa dan nye dila wa suinummu a kan ŋman bo ale Naawen yaa. Wa be kan tuesi kpana ale ligmɔniŋ yegayega mɛ.

18Ase wa yaa a dan chim naab a ga nueri, ku magsi kama ayen wa ta Naawen sinsaŋŋa gbaŋka kanyi piilimka po sinsaŋŋa ate kaabteerɔma baai ale ka Livaima a ŋmarisi la. 19Ku a magsi ka kasim a bo ale wa kama ate wa kasim a kariŋ ka diipo meena ate wa diem vua la dii ale ku nye ate wa a zuli Naawen dii ale ka wa Wen la abe wa a va wa wieŋa nalimnyiini la, 20abe wa kan wa a nya wadek ase wa zunchoŋŋa ka waai la abe wa kan viriŋ wa gala yaase wa juga ate wa ale wa buuni po ale kasim a dɛ naam Izirali tɛŋka po ate ku beni.

Currently Selected:

Teerika 17: BWU

Highlight

Copy

Compare