Teerika 16

1Ni be a teeri Abib Chiika ate ni a dɛ Naawen dii ale ka ni Wen la Gaambasika tigini, dii nyiŋla ka Abib Chiika po ate wa ta ni a nyini Ejipiti po a nyini yok. 2Ni be cheŋ kauk kuui ate Naawen a lueri ayen ni a puusi wa la, a tɔgri duŋka dula jigini a nye kaabka ase Gaambasika la te Naawen dii ale ka ni Wen la. 3Ni be kan ŋɔbi bu ale boroborok kuui ate ba nyo dabinta du la. Alege ni pai daa ŋayopɔi a ŋɔbi boroborok kuui ate dabinta a ka ku po la. Ku ka ninam boroborok dii ale ku basi ate ni a teeri ni ale jam nyini Ejipiti tɛŋka po a nyini la. Kauk kuui ate ni jam boro a nam la. 4A ta ga paari da ŋayopɔi ni waai a kan ta dabinta ni tɛŋka po. Ni ale ko duŋ kaai a nye kaabka dai dii ale dɛ niŋka la ni ŋɔbi lantaŋa meena junɔi.

5Ku kan magsi ayen ni nye Gaambasika Tigini jigi yoŋŋoa. Ku magsi ni nye ka kauk kuui ate Naawen dii ale ka ni Wen la a lueri ayen ni a puusi wa la. 6Ku a magsi ni nye Gaambasika Tigini kaabka kauk kuui ate Naawen dii ale ka ni Wen la a lueri ayen ni puusi wa la. Ku magsi ni nye kaabka ka junɔi ase diipo ate nama a jam basi Ejipiti tɛŋka la. 7Ni be sɛ abe ni ŋɔbi bu kauk kuui ate Naawen dii ale ka ni Wen la a lueri ayen ni a puusi wa la, abe ni yaa ŋmani kuli ni yeeŋa chum saluik. 8Ni ŋɔbi boroborok kuui ate dabinta a ka ku po la a ta ga paari daa ŋayuebi alege dai dii ale a saari ŋayopɔiwa la ni tigsi chaab a puusi Naawen dii ale ka ni Wen la. Ni kan tom tuini dai dila danni.

9Ni chiimu bakoa buyopɔi a ta nyini dai dii danni ate ni piilim ni zaaŋa cheka la, 10a yaa piilim a dɛ Bakoa Tigini a te Naawen dii ale ka ni Wen la zula abe ni a te wa jiam ale nidek mariŋka tiirita a magsi chaab ale wa ale niak ni diila. 11Nama ale ni nidoabilisaŋa ale ni liema ale ni tomteerɔ nidoaba ale nipooba ale Livaima ale nichamma ale bo ni tɛŋsaŋa po la ale kpiŋsaŋa ale pukɔŋŋa meena a nye Naawen dii ale ka ni Wen la jiam kauk kuui ate wa lueri ayen ni a puusi wa la. 12Ni be a teeri ayen ni daam ka yɔm Ejipiti tɛŋka po dii ale ku basi ate ni kpesi a va sinsaŋŋa de la.

13Ni dɛ Viitaŋa Tigini a paari daa ŋayopɔi ase nama ale fɔbi ni zaaŋa meena ale ŋmiak ni daamu a nueri. 14Ni be basi ate nama ale ni bisaŋa ale ni liema ale ni tomteerɔma ale nipooma dɔkliema ale Livaima ale nichamma ale kpiŋsaŋa ale pukɔŋŋa baai ale bo ni tɛŋsaŋa po la a dɛ tigini ale suipeentik. 15Ni pai daa ŋayopɔi a nye tigini a te Naawen dii ale ka ni Wen la juijui ate Naawen lueri ayen ni a puusi wa la. Naawen dii ale ka ni Wen la dek ale niak ni kpanni ŋantaŋa ale ni ale pai ni nisima a tom tuin dii meena la ate ni sue ale kasim a peenti meena.

16Nidoama meena a jam Naawen dii ale ka ni Wen la niŋ naŋtuok nɔi buta bein po juijui ate wa lueri a magsi Boroborok Kuui Ale Kan Ta Dabinta Tigini, ale Bakoa Tigini, ale Viita Tigini la. Nuru waai a kan jam Naawen niŋ ale ni koruta. 17Waai meena a ta tiirim a jam a magsi chaab ale Naawen dii ale ka ni Wen la ale niak wa diila.

18Ni lueri boteerɔba ale niŋdeerɔba a ta nyini ni dɔkku po meena tɛŋ kaai meena po ate Naawen dii ale ka ni Wen la a te ni la, ate bala a bo nuruma buusa nalimnyiini. 19Ni kan ni a nye lukka nyeka. Ni be kan basi ate ba te ni jaaboa alege ate ni biisi biika ale wensie. 20Ni va wensie ale ka wensie nyiini ale ŋa basi ate ni vua ate nama ale baga a tuesi tɛŋ kaai ate Naawen dii ale ka ni Wen la a za wa pai a te ni la.

21Ase ni dan sɛ Naawen dii ale ka ni Wen la puusika kuŋkuŋku, ni kan ŋman sɛ nipok bɔglukku ate ba a wi ku ayen Asera la a kaab ku. 22Abe ni kan feri tintain bɔgluk a zaani a kaabi ku, Naawen dii ale ka ni Wen la a kisa ŋala kama.

Currently Selected:

Teerika 16: BWU

Highlight

Copy

Compare