Teerika 15

1Bena ŋayopɔi meena kpeglimka po baai meena ale dɛ fi pama la fi pai basi a te wa fi kan ŋman bek wa ŋa wari ya. 2Fi le magsi fi nye diila ale nna: waai meena ate ba dɛ wa pami la a baŋ wa ale pai dii a te wa Izirali denɔ choawa la. Wa kan ŋman a yiili ayen Izirali yaase wa mabiika ale tuni wa pamini dii nyiŋla Naawen ale te diipo ayen waai a kan ŋman tuesi pami la a paari kama. 3Fi baga a bek nichamma baai ale ta fi pama la kama alege fi baŋ fi mabisaŋa ale ta fi pamaŋa la wari. 4Alege ja jak an ŋman magsi wa bo ni po, tɛŋ kaai ate Naawen dii ale ka ni Wen la a yaali wa te ni la po. Naawen ale niak ni kama, 5ase nama ale a zuli Naawen dii ale ka ni Wen la nalimnyiini ale chiib va wa wieŋa de meena ate mi a te ni jinla de la. 6Naawen dii ale ka ni Wen la ale niak ni kama ase wa ale puulim diila ate nama ale te tɛŋsa yegayega ŋanta abe ni kan tuesi jaab a ta nyini si jigi ya. Nama ale ta pagrim tɛŋsa yega zuk alege si kan ta pagrim nama zuwa.

7Ase nuru jak a dan bo ni suataŋa tɛŋka kanyi po, kaai ate Naawen dii ale ka ni Wen la a yaa wa te ni la, ni be kan nye suinum pagrik a ta va ni mabiik jakka de jigiya. 8Ni laari ni nisimaŋa ate ni suoku jajakka de jabuui ate wa a yaali la. 9Ni be kan zɛri ayen nama a kan te ba jaaboa, dii nyiŋla diipo ate ni zɛri pama tuesika la moata nyiŋŋa. Ni kan basi ate biem wieŋa de a bo ni popolaŋa po. Ni dan zɛri an te wa jaaboa, wa le kaari a te Naawen ate ni nya ni le nye kaasi la. 10Te wa ale suipeentik kan nye butuemmoa ate Naawen dii ale ka ni Wen la ale niak ni tuima ale dii meena ate ni pai ni nisima a nye la. 11Ŋanjaksa ale kasim a bo tɛŋka po kama. Dila nyiŋla mi a yaali kama ayen ni laari ni nisimaŋa a te ni suataŋa ale ŋanjaksaŋa ale bo ni tɛŋka po la.

12Ase fidek Yiburu denɔ yaase nidoa yaase nipok a dan pai wadek a da te fu ayen wa tom a te fi bena ŋayuebi, ben dii ale a saari ŋayopɔiwa la fi basi wa. 13Ase ni dan a yaali ni basi wa ni kan basi wa kinla, ni te wa ŋanta. 14Ni te wa a ta nyini Naawen dii ale ka ni Wen la ale niak ni ale ŋan baai la. Ni te wa piisa ale zaa ale damasik. 15Ni be a teeri ayen ni daam ka yɔm Ejipiti tɛŋka po ate Naawen dii ale ka ni Wen la a da tuesi ni a basi. Dila ale soa ate mi a te ni sinsaŋŋa de jinla de.

16Alege ni tomteerɔma a dan weeni ayen, <<Mi a kan yaali m basi ni.>> Wa ale a yaali fi ale fi dɔkdemma la nyiŋ ate ku a cheŋ nalimnyiini ale fu, 17ta wa a nyini peelim a vuri wa tueŋa ate wa yaa ale chim fi tomteerɔ taam wuu. Nye nipok baai ale tom a te fu la mɛ dila dekdega.

18Kan basi ate fi suinum a pagra ase fi ale fi basi fi tomteerɔwa ate wa cheŋ wa ale tom a te fu ate ku paari bena ŋayuebiwa la dii nyiŋ la, wa ale tom diila a gaam fi ale pai nuru ate wa a tom ate fi a tuni wa. Naawen fi Wenni ale niak dii meena ate ni a nye la.

19Ni duŋsaŋa ale dɛ niŋ a biak ŋandoa tii la ni pai a te Naawen dii ale ka ni Wen la. Ni kan basi ate naab bula a tom tuini yaase piisaŋa ale dɛ niŋ a biak ŋaai la ni kan che ŋa kɔbtaŋa. 20Bein meena nama ale ni dɔkdemma a magsi kama ayen ni ko ŋa a ŋɔbi Naawen dii ale ka ni Wen la niŋ wa le lueri kauk kuui a te ni la. 21Ase duŋ kaai a dan kɔni, yaase ka gbariŋ yaase ka yi ni kan pai kala choa a nye kaabka a te Naawen dii ale ka ni Wen la. 22Ku a magsi ni ŋɔbi kala ka ni yeeŋa. Baai ale daŋ la ale baai ale nala la a baga a ŋɔbi kama ase ba ale a ŋɔbi gɔi duŋsa diila. 23Alege ni kan dɛ ziimoa; ni kpiiri bu a basi tɛŋ ase nyiam la.

Currently Selected:

Teerika 15: BWU

Highlight

Copy

Compare