Teerika 14

1Nama ka Naawen dii ale ka ni Wen la bisa. Ni kan chiiri ni tɛŋsaŋa yaase ni che ni zuimaŋa kpieba nyiŋŋa, 2ale nama ka nuru weleŋsa a te Naawen dii ale ka ni Wen la. A ta nyini nuruba meena po tɛŋka de zuk, Naawen a lueri ka nama ayen ni chim wa nuruba.

3Ni kan dɛ jabuui ate Naawen a weeni ayen wa an welema la. 4Duŋsaŋa de ale magsi ayen ni a ŋɔbi, naab ale posuk ale buuk 5ale sebik ale walik ale yisik ale nɔŋ ale kab. 6Ni baga a ŋɔbi duŋ sii meena ale ta naŋsaba ŋaai ale poori alege a ŋɔbi a guli la kama. 7Ni kan ni ŋɔbi duŋ yonsa. Ni a ŋɔbi sii ale ta naŋsaba ate ŋa poori ale a ŋɔbi a guli la nyiini. Ni kaa ŋɔbi laalaakomi ale suem ale siseri ya. Duŋsaŋa de a ŋɔbi a guli kama alege si ka naŋsaba; si ka duŋ daŋtisa a te ni. 8Deri mɛ daŋ kama; di ta naŋsaba ate ŋa poori alege di kan ŋɔbi a guli. Ni kaa ŋɔbi di lammu yaase ni tiri deri dii ale kpi la.

9Ŋan baai meena ale bo nyiam po a ta pie ale pagta la ni baga a ŋɔbi kama. 10Alege jabuui ale kan ta pie ale pagta la ni kan ŋɔbi ba ale ba ka ŋan baai ale daŋ la.

11Ni baga a ŋɔbi ja yirim buui ale nala la kama. 12Alege ŋantaŋa de ni kan ŋɔbi, jiiruk ale duiŋ ale duiŋ sobluk ale 13duiŋ ale kpaliŋchiak mɔnuŋ buuri meena ale 14tagaaruk buuri meena ale 15poinaab ale viuk kuui ale a nye ase ku ta nyiila la ale jumyigrik ale kpaliŋ buuri meena, 16ale viuk fiik ale viuk kpioŋ ale viuk peeluk ale 17gɔi viuk ale takaribayauk ale amaavak ale 18jumbaliiruk ale jumyigrik ale chiintain ale jinjaanuŋ.

19Ŋan yirin tii ale a nye ase nanjuŋsa la daŋ kama ni kan ŋɔbi ba. 20Alege jabuui meena ale ta kinkaŋŋa ale nala la ni a ŋɔbi.

21Ni kan ŋɔbi ja kpiuwa. Ni baga a pai ja kpiuku a te nichamma ale bo ni tɛŋsaŋa po la kama ate bala a ŋɔbi yaase nama baga a pai ja kpiuku kama a da a te nichamma. Nama ka nuru weleŋsa Naawen dii ale ka ni Wen la jigi. Ni be kan dik buli ale ku ma biisimɔ.

22Ni teeri ate ni poori benni po ate ni kpa nya ŋan baai ni talitaŋa po la piika a zaani nakpiak. 23Ni dɛ ni kpanni ŋantaŋa piika po, da paalimu ale kpaamu ale ni duŋsaŋa ale dɛ niŋ a biak biik sii la Naawen dii ale ka ni Wen la niŋ kauk kuui ate wa lueri a te ni ayen ni boro wa yuenni nyiŋla. Dila ale ku basi ate ni a va Naawen dii ale ka ni Wen la nalimnyiini. 24Alege dula jigini a dan yalima, ase Naawen dii ale ka ni Wen la ale niak ni la, ni dan kan baga a ji ni piika a ta a cheŋ dula dii nyiŋla Naawen dii ale ka ni Wen la ale a yaali wa lueri juijui la ale yalima la nyiŋ, 25ni be pai ni ŋantaŋa da a ta ligraŋa a cheŋ kauk kuui ate Naawen dii ale ka ni Wen la ale te ni la. 26Ni pai ligraŋa a da jabuui ate ni a yaali la: ni da ase ka niiga, piisa ale daam ale da buui ale kum la ale ŋan baai ate nama a yaali la. Nama ale ni yeeŋa demma a dɛ Naawen dii ale ka ni Wen la niŋ ale suipeentik. 27Ni be kan baŋ Livaima ale bo ni tɛŋka po la wari ya, ale ba ka badek tɛŋa yaase jaaboa.

28Bena ŋata meena kpeglim ka po, ni piisaŋa meena ate ni kpa nya la ni ta jam dueni ni tɛŋsaŋa po, 29dii ale ku basi ate Livaima (baai ale kan ta badek tɛŋ yaase badek jaab la) ale nichamma ale kpiŋsaŋa ale pukɔŋŋa baai ale bo ni tɛŋsaŋa po la a jam dɛ chak ate Naawen dii ale ka ni Wen la a niak ni nisima tuima meena.

Currently Selected:

Teerika 14: BWU

Highlight

Copy

Compare