Teerika 11

1Yaali Naawen dii ale ka ni Wen la abe ni ta wa ale a yaali diila, ale wa ŋmarisika ale wa buusaŋa ale wa wieŋa diipo meena. 2Ni a teeri jinla danni ayen daa ni bisaŋa ale jam nya Naawen dii ale ka ni Wen la waalika. Wa pagrimu ale wa nisa ale pagra diila, ale wa nisaŋa ale a teeri a tom dii, 3ale wakperikaliisaŋa ate wa tom ale wie ŋaai ate wa tom Ejipiti po ale wa le nye Faaro Ejipiti naawa ale wa tɛŋka meena dii, 4wa ale nye Ejipiti tugurik tɔŋdɔma ale ba wusumaŋa ale ŋa torokoma diila, wa jam basi ate ba wari beli Nyakpiem Mɔnuŋku po diipo ate ba jam a vi ni la. Ni be nya Naawen ale nye ba diila kama. #11:4 Nya fotowa, Nyinika 14:9. 5Daa ni biisaŋa ale jam nya dii ate wa nye gɔnni po a te ni alege ate nama a jam paari dela jigini la. 6Ni be teeri wa ale jam nye Datan ale Abiram, Eliab bisaŋa ate wa nyini Aruben dɔkku po bisaŋa diila kama. Tɛŋka a jam na kama a lagri ate ba zi du ate ka lik ba ale ba dɔkdemma ale ba viitaŋa ale ŋanvuta meena a basi du. 7Ka nidek nina po ate Naawen jam basi ate wakpienni de a nye.

8Ni be va sinsak ŋaai meena ate mi a te ni jinla de la dii ale ku te ni pagrim ate ni baga a jo tɛŋ kaai ate ni ale lo Jodan benni a jueli a tuesi la, 9dii ale ku nye ate ni goa beni tɛŋ kaai po ate Naawen a puulim ale ni kokpieŋsaŋa ayen wa pai a te ba ale ba ŋaaŋbisaŋa la. Siita ale biisim ale bo ka po. 10Tɛŋ kaai ate ni a jo ni tuesi la a kan nye ase ka Ejipiti la kauk kuui ate ni basi la, juijui ate ni jam bori ale ji nyiam a zaŋti ase jenvaata talim la. 11Alege tɛŋ kaai ate nama a lo Jodan benni a jueli ayen ni tuesi la ka tɛŋ kaai ale ta guuta ale vaasa ate ŋmoruk nyiam a jo ka po. 12Ka ka tɛŋ kaai ate Naawen dii ale ka ni Wen la niŋ a bo ka po. Naawen dii ale ka ni Wen la nina a bo ni zuk kama a ta nyini benni piilimka a ga paari di kpeglimka.

13Ni dan chiib va wa sinsaŋŋa ate mi a te ni jinla de la ale a yaali Naawen dii ale ka ni Wen la abe ni a va wa ale ni suiniima meena ale ni chiisa meena, 14wa le basi ate ŋmoruk ale ni ni tɛŋka po wenkarik ale yoei meena ate nama ale nya ŋandiinta ale damasik ale kpaam. 15Wa le basi ate wuuk a nyini tɛŋka po ate ni duŋsaŋa a dɛ ate nama dek mɛ a dɛ chak.

16Ni be kpesi nidek ate ni kan basi Naawen abe le va bɔgluk yonta a koori tɛŋ a zuli ti. 17Ate Naawen sui a puuri ale ni ate wa basi ate ŋmoruk a kan ni ate ni kan nya ŋandiinta tɛŋka po ate ni kpi nwuli abe ni basi tɛŋ naliŋ kaai ate wa ayen wa pai te ni la. 18Ni pai mi wieŋa de a nyo ni suiniimaŋa ale ni popolaŋa po, abe ni bobaŋa a maŋ ni nisaŋa nyiŋ, abe ni pai ŋa a bobi maŋ ni deeŋa nyiŋ. 19Ni pai ŋa a sak ni bisaŋa, Ni a biisi ŋa wie ase ni nin diem bo yeri, yaase ni nin bo suik po a cheŋ yaase ni nin doa tɛŋ yaase ni nin yiti goom po. 20Ni ŋmarisiŋa nyo ni yeeŋa tuataŋa nyiŋ ale ni nansuiŋtaŋa meena nyiŋ. 21Dii ale ku basi ate nama ale ni bisaŋa daaŋa a piisi tɛŋ kaai po ate Naawen pɛ ale ni kokpieŋsaŋa ayen wa pai a te ba la. Ni ale kasim boro ka dila ase diipo meena ate ni zak zuk a nya ale chiŋmaaŋa a diem boro la.

22Ase ni dan chiib a va sinsaŋŋa de meena ate mi a weeni ni la, a yaali Naawen dii ale ka ni Wen la ale a cheŋ wa suitaŋa po ale a va wa nalimnyiini, 23Naawen ale yiak tɛŋsaŋa de meena nuruma kama a basi a te ni ate nama ale jo bo tɛŋ sii ale zuak ale ŋman pagra a gaam ni la po. 24Kauk kuui meena ate nama a pai ni naŋtuok a tabi la ka nama ale soa: Ni tɛŋka ale zuak a ta nyini gɔnni po a ta ga va Lebanon, a ta nyini Yufiretis Benni a ga paari yeniŋ geŋsa nyakpiemu nɔi. 25Nuru a kan boro a baga a nye kpaliŋ ale ni. Naawen dii ale ka ni Wen la ase wa ale puulim dii ale ni la, yɔgsum ale yik tɛŋsaŋa kauk kuui meena ate nama a cheŋ la.

26Ni nya de jinla m pai ka niaka ale kikaasa a dueni ni niŋ. 27Nama ale nya niaka ase nama a nin va Naawen dii ale ka ni Wen la sinsaŋŋa ate mi a pai a te ni jinla dela; 28Nama abe le nya kikaasa ase nama a nin zɛri Naawen dii ale ka ni Wen la sinsaŋŋa ate mi a weeni ayen ni kan ŋmani va bɔgluk yonta tii ate nama a poom zɛ la. 29Ase Naawen dii ale ka nama Wen la ale ta ni a jam tɛŋ kaai po ate ni a jo nna, ku a magsi ayen ni zaani ka Gerizim Guuku zuk a biisi niaka wie abe ni zaani Ebal Guuku zuk mɛ a biisi kikaasa wie. 30Ase nama ale poom seba la, guutaŋa a bo ka Jodan benni ŋmazuk suiku yeniŋ geŋsa kauk kuui ate wenbinni a siŋ la a moata More ti kpieŋsaŋa ale bo Keenan banni la a bo Araba ate ka bo Gilgal po la. 31Nama boro ayen ni lo Jodan benni a jueli kama a taam tɛŋ kaai po ate Naawen dii ale ka ni Wen la ayen wa pai te ni la. Ase ni dan tuesi ka a bo ka po, 32ni be seba ayen ni va sinsaŋŋa meena ate mi a weeni jinla de la.

Currently Selected:

Teerika 11: BWU

Highlight

Copy

Compare