Teerika 12

1Sinsaŋŋa de ku a magsi ka ni kpesi va ŋa, tɛŋ kaai po ate Naawen dii ale ka ni kokpieŋsaŋa Wen la a te ni ayen ni ta la diipo meena ate nama a diem vua a bo tɛŋka po la. 2Ni kaasi nuruma ŋan baai meena ale bo pinaŋa ale guutaŋa zuima ale tiisaŋa kab tii ate ba bɔgtaŋa a boro ate ba a kaab la. 3Ni nak ba kuŋkuŋtaŋa a kaasi abe ni saam ba tintanaŋa chaab abe le ju ba bɔgluk kuui ate ba a wi ayen Asera la daataŋa ale bolim. Ni lɔnsi ba bɔgtaŋa tɛŋ ate ti yue a kan ŋman boro.

4Ni kan puusi Naawen dii ale ka ni Wen la ba ale a puusi diila. 5Alege ku magsi kama ayen ni gisi kauk kuui ate Naawen dii ale ka ni Wen la ale lueri a ta nyini ni dɔkku po a bo du la ate ni meena a cheŋ dula a ga a puusi wa. 6Ni ta ŋan baai ate ni a nye juka kaabka a jam ni piika ale ni tiiritaŋa tii ate nama a pɛ ayen ni te ale nidek yaalika la ale ni duŋsaŋa ale dɛ niŋ biak biik sii la a jam te Naawen. 7Dula jigini Naawen dii ale ka ni Wen la niŋ nama ale ni dɔkdemma ale kasim a dɛ kama ate ni sue a peenti ale jabuui meena ate ni ta la, dii nyiŋla Naawen dii ale ka ni Wen la ale niak ni.

8Ni kan nye ase ti ale nye dii dela jinla de la waai meena a jam a nye ka wa yaalika, 9dii nyiŋla ba an diem jam paari ba vuusumu ale ba ale magsi ba tuesi ŋan baai ate Naawen dii ale ka ni Wen la ayen wa pai te ni la jigini. 10Alege ni ale lo Jodan benni a jueli a kali tɛŋ kaai ate Naawen dii ale ka ni Wen la a pai a te ni ayen ni vuusi a nyini ni dachaasaŋa ale kala a gilim ni la po ate ni yaa ale boro ate wari a kan daani ni. 11Dula jigini Naawen dii ale ka ni Wen la ale lueri ase ni boka jigi la wa yuenni nyiŋ. Dula jigini ni yaa le ta jabuui meena ate mi a weeni ayen ni ta ba a jam la, ŋan baai ate ni a yaali ni pai ba a nye juka kaabka la, ale ni piika ale ni tiirim maŋka ale nidek ŋantaŋa ate nama a lueri ale pɛ ayen ni pai ba a te Naawen. 12Dula jigini ni yaa le ta suipeentik Naawen dii ale ka ni Wen la niŋ. Nama, ni bisaŋa ale ni liema ale ni tuimtomdisaŋa ale nipooma dɔkliema ale Livaima ale bo ni tɛŋsaŋa po la baai ale kan ta badek tɛŋ yaase ŋanta la. 13Ni be kpesi nidek ate ni kan nye juka kaabka nidek ale mariŋ juijui la. 14Ni nye kaabka juijui ate Naawen a yaa wa lueri a ta nyini ni dɔkku po la. Dula jigini ni nye dii meena ate mi a weeni la.

15Alege ni baga a tɔgri ni duŋsaŋa ni tɛŋsaŋa kaai po kama ase gɔi duŋsa la a ŋɔbi lantaŋa ni ale baga a ŋɔbi diila a ta va Naawen dii ale ka ni Wen la niauŋku ale ka dii ate wa pai te ni la. Baai ale daŋ la ale baai ale nala la a baga a ŋɔbi kama. 16Alege ni kan de ziimoa; ni kpiiri ziimu a basi tɛŋ ase nyiam la. 17Ni kan dɛ nidek tɛŋka po piika ale zaaŋa ale damasika ale kpaamu yaase ni duŋsaŋa ale dɛ niŋ a biak biik sii la yaase jaabuuri meena ate nama a pɛ ayen ni pai te Naawen yaase nidek yaalika tiirim. 18Ni magsi ni dɛ ba ka Naawen dii ale ka ni Wen la niŋ juijui ate Naawen dii ale ka ni Wen la a lueri la. Nama ale ni bisaŋa ale ni tomteerɔma ale Livaima baai ale bo ni tɛŋsaŋa po la a magsi ba dɛ tiirimu ŋantaŋa de ka Naawen dii ale ka ni Wen la niŋ nyiini abe ni ta suipeentik ale dii meena ate ni nye la. 19Ni seba ate ni kan baŋ Livaima wie, ni maari ba diipo meena ate ni bo ni tɛŋka po la.

20Ase Naawen dii ale ka ni Wen la a dan basi ate ni tɛŋ banni a lagri ase wa le puulim diila, ate mi a yaali lam, a yaa weeni ayen, <<Ti a yaali ka lam,>> ni baga a ko duŋsa a ŋɔbi ni ale a yaali diila kama. 21Ase Naawen dii ale ka ni Wen la ale lueri kauk kuui ayen ni a nye kaabka la a dan yalima ale ni, ni baga a ko duŋsaŋa ate Naawen a te ni la kama ase mi ale weeni diila. Ni dɛ ni yeeŋa po nama ale baga a dɛ diila. 22Ni ŋɔbi duŋ sii ate ni a ko la meena ase ni ale a ko gɔi duŋsa diila. Baai ale daŋ la ale baai ale nala la a baga a ŋɔbi kama. 23Ni be a kpesi nidek ate ni kan dɛ ziimu dii nyiŋla ziimu ka nyuvuri. Di la ale soa ate ku an magsi ayen ni ŋɔbi lam buui ale ta nyuvuri la. 24Ni kan dɛ ziimu ni kpiiri bu a basi tɛŋ ase nyiam la. 25Ni kan dɛ ba ate wari meena ale nye nalimnyiini a te ni ale ni bisaŋa dii nyiŋla ni a yaa ni a nye ka dii ale nala Naawen nimbie po la.

26Ni ta ni tuilum ŋantaŋa ate ni ta la ale ni puulimka tiiritaŋa ni ta cheŋ kauk kuui ate Naawen a lueri a te ni la. 27Ni nye ni juka kaabka Naawen dii ale ka ni Wen la kuŋkuŋku zuk. Lammu ale ziimu ni pai ba meena a vi Naawen dii ale ka ni Wen la kaabka kuŋkuŋku zuk abe ni ŋɔbi lantaŋa. 28Ni be chiib kpesi nidek a va wie ŋaai ate mi a te ni la dii ale ku nye ate wari meena a cheŋ nalimnyiini ate nama ale ni bisaŋa ale bo ŋaaŋ la. Dii nyiŋla ni a nye ka dii ale nala la Naawen dii ale ka ni Wen la nimbie po.

29Naawen dii ale ka ni Wen la dek ale yik tɛŋ sii ale moata ayen ni jo si po la. Alege ni dan yik ba ate ba nyini ale kali ba tɛŋsaŋa po, 30ase ni ale kaasi ba a ga nueri la ni be seba ate ni kan bek ayen, <<Tɛŋsaŋa de a nye ka sɛ a kaab ba bɔgtaŋa? Tama mɛ ale nye ka dila.>> 31Ni kan puusi Naawen dii ale ka ni Wen la ba ale a puusi diila. Dii nyiŋla, ba dan boro a puusi ba bɔgtaŋa, ba a nye ka wabulɔrisa ate Naawen a kisa la. Ba poom a ju ba bisaŋa ale ba liema ale ka bolim a nye kaabka a te ba bɔgtaŋa.

32Ni nye dii meena ate mi a weeni la. Ni kan yaali wari a gum du yaase ni yeeri wari a basi.

Currently Selected:

Teerika 12: BWU

Highlight

Copy

Compare