Tuima 26

1Agiripa yaa weeni Pɔɔl ayen, <<Fi ta suik kama a biisi a te fidek.>> Pɔɔl yaa zak wa nisima a puusi a piilim ayen wa biisi a vari wadek a basi. Wa yaa piilim ayen,

2<<Naab Agiripa, mi a poli ayen mi ta ka wein ate jinla mi zaani fi niŋ ayen mi biisi a vari m dek a basi ale Juuma ale a ŋma mu ayen mi kaasi la. 3Fidek abe seba Juuma ŋiak wieŋa ale ba beŋŋa a magsi chaab ale ba wensuiku vaka a chak kama. Dila nyiŋ ate mi a saalim fu ayen fi wom mi ale suduŋni.

4<<Juuma meena seba mi boka ale ka diila kama a ta nyini m bi fiik po a ta paari diipo ate mi jam bo m dek tɛŋka ate ku ŋaaŋnyiŋ ate mi bo Jerusalem tɛŋka la. 5Ba seba mu ate ku beni kama. Ba daa yaali ba le weeni fu ayen mi jam ka Farisii. Farisiima abe a zuli mi tɛŋka sinsaŋŋa kama chekki a gaam tigsuŋ meena. 6Yɔgyɔgla de m be za ka dela ayen ni bo mu buusa dii nyiŋla, mi ta yiila kama ale Wen ale jam puulim dii ale ti kokpieŋsaŋa la. 7Pumpuulimaŋa de abe le tama nuruma diina pi ale buyewa a yiili ba nya ase ba le tom a te Wen danni po ale yok la. Naabaa, ba ŋma mu ka m ni ta yiilaŋa de dek la nyiŋ. 8Ka boa abe ale soa ate nama ayen ku daa moali ate Wen nak kpilima a yiti kum po?

9<<Mi dek abe jam poli kama ayen m nye dii meena ale di kaasi Yeezu Nazaret denɔwa yuei la. 10M be ale jam nye dii Jerusalem tɛŋka la ale la. M jam tuesi ka suik kaabteerɔ kpaŋŋa jigi a yik Kirisita bisaŋa yegayega a lik. Daa likka nyiini alege, ti ale jam poli ayen ku ka wamaŋ ate ti ko ba la, mi mɛ abe ale jam siak ayen ba ko ba. 11Daa dila nyiini, mi jam te ba waalika ti tuka diinaŋa po ate ku paari ka diichoa, a kasim a nye dila ayen ba lɛ Yeezu. M suinni kasim ŋmasi jam a de ka nna yegayega ale ba ate mi nyiem poom jam cheŋ satɛŋ yonsa juijui ate ba boro la a te ba waalika.

12Mi jam tuesi ka suik ale pagrim kaabteerɔ kpaŋŋa jigi ayen m cheŋ Damasikus tɛŋka. 13Mi ale bo suiku po a cheŋ dula la, wentueŋ suŋsuŋ, mi yaa nya ku nyagsi a nyini wenŋmazuk. Ku jam nyagsi a gaam wenbinni kama a nyagsi a gilim mi ale baai meena ale jam va mi a cheŋ la. 14Ate ti meena yaa lo tɛŋ ate mi wom ale lueluk a weeni mi ale Juuma biika Yiburu ayen, <Sɔɔl, Sɔɔl, ka boa ate fi a namsi mu nna? Fi a namsi ka fidek dila.> 15Mi yaa bek ayen, <Fi ka wana Nyɔnɔ?> Ate ti Nyɔnɔwa Yeezu Kirisita yaa tulisi ayen, <Ka mi Yeezu ate fi a namsi. 16Alege, yiti zaani ŋmai. M pai m dek a sak fu kama yɔgyɔgla de ayen ku sak ayen m lueri fu kama ale tom fu mɛ ayen fi chim m tomteerɔ. Ku a fɛ kama ayen fi weeni a sak nuruba ba chaab dii ate fi nya a magsi chaab ale mi jinla la ale m nin m sak fu dii chum diipo la. 17M le vari fu fidek nuruma Juuma nisima po a basi ale baai mɛ ale kan daa Juuba ate mi le tom fu ba jigi la nisima po mɛ a basi. 18M dan tom fu, mi le basi ate fi lagri ba ninaŋa ate ba tagri nyini legini po a nyini jam peelim niŋ. Ba ale tagri nyini Sitaana nisima po a nyini a jam Wen nisima po ate ba ta siaka ale mu ate ba nya wabaataŋa vɔŋteka ate ba yaa maa bo nuru baai ate Wen lueri la po.>

19<<Naab Agiripa, mi a be an zɛri dii ale nyini wenŋmazuk a jam ate mi nya di ase m goadaasim kama la. 20Mi yaa piilim Damasikus ale Jerusalem tɛŋsaŋa po ale ge yaa paari Judia tɛŋka meena ale baai mɛ ale kan daa Juuba la, a sak ba ayen ku a fɛ kama ate ba basi ba wabaataŋa tomka abe ba pai badek a te Naawen abe ba a tom tuim ŋaai ale a sak ayen ba tagri kama la. 21Ku be jam ka sinsaŋŋa de nyiŋ ate Juuma a jam yik mi diipo ate mi jam bo Wen yenni po la a pii nyiŋ ayen ba ko mu. 22Alege zaani dipo a jam paari jinla, ka Wen ale jam a maari mi. Ka dila nyiŋ ate mi za dela ayen m biisi wensie a sak waai meena, nuru fiik yaase nuru kpioŋ. Mi ale a biisi diila ale dila dekdega ate Wen biisiteerɔma ale Moosis a jam weeni ayen ku le nye la, 23ayen Kirisitawa ale kpi, ase wa ale waai ale wa dɛ niŋ a yiti kum po la, wa le ta bolim a jam te nuru meena.>>

24Ase Pɔɔl ale a biisi wieŋa de wa vari wadek a basi la, Fesitos yaa weeni ate ku jueli ayen, <<Pɔɔl fi zukku karo, zamsika yegayega a basi kama ate fi a yesim.>>

25Pɔɔl yaa tulisi wa ayen, <<M koa, mi kan yesimu. Wie ŋaai ate mi a biisi la ka wensie ale yam. 26Mi baga a nyini ka peelim a biisi ale fi Naab Agiripa dii nyiŋla fidek seba wieŋa de nɔi po kama. M seba chak kama ayen fi ŋmasi kpesi wieŋa de dinyi dinyi kama, dii nyiŋla, wanni de an suk nye ka gugoruk po. 27Naab Agiripa, fi ta siaka ale Wen biisiteerɔma ale a biisi diila? M seba ayen fi ta siaka kama.>>

28Agiripa yaa bek Pɔɔl ayen, <<Ku an diem bula beniya ale ge fi a poli ayen fi nye kama ate mi chim Kirisita biik, yaa boa?>>

29Pɔɔl yaa tulisi wa ayen, <<Ku beni yaa ku an beniya, mi a puusi a te ka Wen ayen fi ale baai meena ale kali dela jigini a wom mi jinla danni la, nama ale chim ase mi ale ka nuru waai jinla la. Alege m kan poli ayen ni le ta chɔrima ase mi ale ta diila.>>

30Naawa ale Gominawa ale Beniis ale mbala meena a yaa yiti nyini. 31Ba ale nyini nueri la, ba yaa weeni chaab ayen, <<Nuruwa an nye wari a magsi wa kpi yaase ba yik wa a ligi.>> 32Agiripa yaa weeni Fesitos ayen, <<Nuruwa de a poom magsi ka ti basi wa ase wa nin poom kan weeni ayen wa a yaali ayen ka wa cheŋ Siiza jigiya.>>

Currently Selected:

Tuima 26: BWU

Highlight

Copy