Tuima 25

1Fesitos ale ga dɛ wa naamu a yaa soa tɛŋka la, ku daa ŋata dai ate wa basi Siizariya ale ge cheŋ Jerusalem. 2Kaabteerɔ kpioŋku ale Juuma kpaŋŋa a yaa jam wa jigi a weeni wa wie ŋaai meena ate Pɔɔl kaasi la. Ba meena jam a saalim Fesitos ayen, 3wa maa maari ba ate ba ta Pɔɔl a jam Jerusalem. Ba jam weeni dila kama a poli ayen ba le basi kama ate nuruba suk suiku niŋ ate wa dan jam a taam abe ba ko wa. 4Fesitos yaa tulisi ba ayen, <<Ba yik Pɔɔl a lik ka Siizariya. Mi dek abe le cheŋ dula ka yɔgyɔgla de. 5Ni basi ate ni kpaŋŋa a va mu cheŋ Siizariya ate ni ga ŋma wa dula jigini ase wa nin kaasi wari.>>

6Fesitos a ŋman goa ale ba daa naaniŋ yaase daa pi a gum du ale ge cheŋ Siizariya. Wa ale ga paari Siizariya ate vari veenti la, wa yaa jo biisaŋa dɔkku po a kali wa zukpaglika zuk a weeni wa tugurik tɔŋdɔma ayen ba ta Pɔɔl jam. 7Pɔɔl ale ga jam la, Juuma baai ale jam maa nyini Jerusalem a jam la, a yaa jam za gilim Pɔɔl a weeni ayen wa kaasi ka wie nna yegayega alege ba an jam baga sak ayen ŋaai ate ba a weeni a magsi chaab ale Pɔɔl la ka wensie. 8Pɔɔl yaa biisi ayen wa vari wadek a basi, wa weeni ayen, <<Mi an kaasi Juuma Sinsaŋŋa yaase Wen yenni yaase m biisi naab kpioŋku Siiza a kaasi ya.>>

9Alege Fesitos ale jam a yaali ayen wa nye wari ate Juuma suipeentik la, wa yaa bek Pɔɔl ayen, <<Fi ale siak a cheŋ Jerusalem ate m bek fu a wom ba ale a biisi ŋaai meena a te fu la?>>

10Pɔɔl yaa tulisi ayen, <<Mi za ka waai ale tagri naab kpioŋku Siiza la niŋ, ale wadek buusa boka dɔkku po juijui ale magsi ayen wa bo mi buusa la. Fidek abe seba chak kama ayen mi an nye Juuma wari a kaasi ya. 11M be dan kaasi ka wari ate dila nyiŋ ku magsi ayen m kpi, m kan weeni ayen m kan kpi. Alege wensie abe dan kan boro ale ba ale a ŋma mu la, nuru karo a baga pai mi a nyo ba nisima po. Mi a yaali kama ayen ti cheŋ naab kpioŋku Siiza jigi ate wala bo mi buusa.>>

12Fesitos yaa nya chaab ale wa nuruma baai ale bo ale wa a sak wa a magsi chaab ale wa tuimaŋa la a nueri ale ge a weeni Pɔɔl ayen, <<Fi weeni kama ayen fi yaali ayen fi cheŋ ka naab kpioŋku Siiza jigi, fi abe le cheŋ ka wa jigi.>>

13Ku ale ga beni maga la, Naab Agiripa ale wa toawa Beniis yaa cheŋ Siizariya ayen ba puusi Fesitos abe ba nye wa tia. 14Ba ale bo dula ate ku paari da boari la, Fesitos ya tɔk Pɔɔl wanni kiri a sak Naab Agiripa ayen, <<Nuru ale bo dela ate Feliksi jam yik wa lik. 15Mi ale cheŋ Jerusalem la, kaabteerɔ kpaŋŋa ale Juuma nisɔmma ale jam a ŋma nuruwa de ayen wa nye wie kaasi ate ba yaa jam mi jigi ayen m bo wa buusa. 16Mi mɛ yaa tulisi ba ayen tama Aroom demma sinsaŋŋa a weeni kama ayen nuru waai ate nuru a ŋma wa ayen wa kaasi wari la, bala bayewa a tu chaab a nya chaab ate waai ate ba a ŋma la a biisi vari wadek a basi ale ge ate ti yaa bo ba buusa. 17Nuruma de ale va mi a jam Siizariya ayen ti chamsi wa nya la, mi an beni du. Dai dii ale pasaŋ la mi yaa kali buusa zukpaglika zuk a weeni ayen ba ta nuruwa a jam. 18Wa dachaasaŋa ale ga yiti zaani ayen ba biisi la, ba an poom biisi wakaasima ŋaai ate mi jam a poli ayen ba ale biisi a magsi chaab ale wa la. 19Ba ale jam a biisi dii meena la ale nanpaga nakka a magsi chaab ale badek wensuik vaka wie ale nuru wanyi ate ba a wi wa ayen Yeezu ate wa kpi alege Pɔɔl a weeni ayen wa vua kama. 20Mi ale kan jam seba mi ale m tulisi beŋŋa dii la, mi yaa bek Pɔɔl, <Fi a yaali fi cheŋ Jerusalem ate ba bo fi buusaŋa dula?> 21Alege Pɔɔl a jam weeni kama ayen wa a yaali kama ayen wa wari dela ate Naab Kpioŋku a poli nya wa ale wa nye wanni de diila. Dila nyiŋ ate mi yaa weeni ayen ba a limisi wa ate m yaa tom ate wa cheŋ naab kpioŋku Siiza jigi.>>

22Agiripa yaa weeni Fesitos ayen, <<Mi a yaali kama ayen midek a wom nuruwa de biik.>> Fesitos mɛ yaa tulisi wa ayen, <<Chum fi be le wom wa.>>

23Vari ale ga veenti la, Agiripa ale Beniis yaa va chaab a jam ate nuruba nna yegayega a vi ba ŋaaŋ a te ba zula. Bala meena yaa va chaab ale tugurik tɔŋdɔma kpagi kpiemaŋa ale tɛŋka nisɔm kpientaŋa yaa maa jo dɔk kpioŋ kuui ate nuru boari a jo ku po a nye tuka la. Fesitos yaa weeni ate ba ta Pɔɔl a jo jam. 24Fesitos yaa weeni ayen, <<Naab Agiripa ale baai meena ale bo dela jigini ale ti la, ni meena nya nuruwa de waai ate Juuma ale bo dela ale Jerusalem tɛŋka la a yaa maa chaab a ta wa wie a jam mi jigi, a kaari a weeni ayen, ku an poom ŋman magsi ayen nuruwa de a ŋman bo tɛŋzuk de diipo diipo. 25Alege mi abe nya kama ale wari karo a magsi nuruwa kummoa. Alege wadek ale weeni ayen wa a yaali ayen wa cheŋ Naab Kpioŋku jigi la, ate mi yaa poli ayen m basi ate wa cheŋ Aroom. 26Alege mi potim ka wari ayen m ŋmarisi a magsi chaab ale wa a te Naab Kpioŋku. Dila nyiŋ ate m ta wa jam nama meena jigi a potim jam fi jigi Naab Agiripa ayen fi dan bek wa wanni a wom, abe mi yaa ta wari a ŋmarisi. 27Mi jigi, yam ka ku po ate m tom ligrɔ ale ge kan weeni ate ku a lagri dii dek chekki ate nuruba a weeni ayen wa kaasi la.>>

Currently Selected:

Tuima 25: BWU

Highlight

Copy