Tuima 27

1Gominawa ale jam poli ayen ti jueli ŋaaruŋ a cheŋ Itali la, ba yaa pai Pɔɔl ale ligrɔba ba chaab a nyo Juliyos nisima po. Juliyos jam ka Aroom tɛŋka tugurik tɔŋdɔma beŋ kanyi kpagi. 2Ti jam zaani ka Siizariya tɛŋka a jueli ŋaaruŋ. Ku jam nyini ka Adiramitiyom. Ŋaaruŋku a jam gomsi magsi ayen ku cheŋ ka jigi ŋaai meena ate ŋaaruŋta a zaani Asia tɛŋka la. Nuru ale jam maa va ti a cheŋ, wa yuei ale Arisitaakus wa jam ka Tesalonika denɔ. 3Vari ale veenti la, ti yaa paari Saidon. Juliyos a jam ta zula ale Pɔɔl a yaa siak ayen Pɔɔl ga nya wa doama ate ba te wa jabuui ate wa a yaali la. 4Ti yaa basi ale lo jueli moata Saipurus tɛŋka diila viok ale jam a fɔb ti. 5Ti yaa lo Silisiya nyakpiemu jueli cheŋ Pamfiliya a ga paari Mira tɛŋ kpieŋka ale bo Lisia po la. 6Dula jigini ate tugurik tɔŋdɔba kpagni a yaa nya ŋaaruŋ ale ku nyini Alezandiria a taam a cheŋ Itali. Wa yaa pai ti nyo ku po.

7Ŋaaruŋ kula po, ti kasim jam a cheŋ ka nna maga maga ate daaŋa jam paari da boari ate ti nam ale ge yaa paari Kinides tɛŋka. Ka an jam yalima ale ti. Vioku a jam pagra ka nna yegayega ate ti an ŋman jam baga a va suik kuui ate ti jam va la, ate ti yaa ŋmeriŋ va Kariti tɛŋka juijui ate vioku an jam pagra la a jam va jigi di choa ate ba a wi ayen Salomoni. 8Ti le jam sali va kunkɔŋni a cheŋ la, ku jam tua kama a te ti ate ti yaa jam paari jigi ate ba a wi ayen Ŋaaruŋta Zaani Maŋ jigi a moata Lasia tɛŋka.

9Ti jam beni ka nna yegayega ate ku ga paari diipo ate ku pagra ale ti chelimu la. Dii mɛ la, dai dii danni ate ba a nye Juuma tigi dii a magsi chaab ale wabaataŋa vɔŋteka la a jam poom taam kama. Dila ŋaaŋnyiŋ, vioku a ŋmasi pagra kama. Pɔɔl yaa te ba sinsaŋŋa de ayen, 10<<M doaba, mi nya kama ale ti chelimu a zaani dela a cheŋ a kan nala. Kɔlimaŋa ale ŋaaruŋku le kaasi kama, kum mɛ abe le jam ti jigi.>> 11Alege tugurik tɔŋdɔba kpagni a jam ka siaka ale Pɔɔl ale weeni dii la. Ŋaaruŋku damdɔwa ale ku nyɔnɔwa ale jam weeni diila ale jam basi ate tugurik tɔŋdɔba kpagni a siak te ba. 12Ba jam weeni ayen juijui ate ba jam za la, an jam nala a magsi ba wari dula ŋoota wenni. Dila nyiŋla, nuruma yegayega a jam a yaali kama ayen ku dan siak a nye ba dam a paari Foniksi tɛŋka ate ba wari dula ŋoota wenni a vuusi. Foniksi bo ka Kariti tɛŋka juijui ate ŋaaruŋta a nyiem zaani a vuusi la. Jigini de a tuk ka yeniŋ geŋ.

13Viok yaa nyini yeniŋ a gala geŋ a fuk nna balibali ate ba yaa poli ayen nya kude ale deri basi kama ate ba nye ba ale poom a yaali dii ayen ba cheŋ la. Ba yaa pai kutuk kpioŋ kuui ate ba nyiem pai a yik ŋaaruŋku a zaani la a yeeri ku a ta nyini nyiamu po a jueli. Ba yaa jam cheŋ va kunkɔŋni nɔi nna farafara a moata Kariti tɛŋka. 14Alege ku an bula beniya ate viok kpioŋ a yaa nyini a gala geŋ kori nummu po kunkɔŋni a jam 15fɔbi ŋaaruŋku. Ku be ale jam pagra nna yegayega ate ti an jam baga dam la, ti yaa basi ate ku ji ŋaaruŋku a ta a cheŋ. 16Ti ale jam paari tɛŋ fiik kanyi ate ba a wi ayen Kɔda ate nyiam a gilim ka la ate vioku an jam pagra, ti yaa nam nna yegayega ale ge baga a yaa yik ŋaaruŋku ŋaaruŋ fiika a zaani. 17Ba yaa dari ate ku jueli ŋaaruŋ kpioŋku zuk. Ba yaa pai mi pagrisa a bobi gilim ŋaaruŋ kpioŋku. Yɔgsum ale jam ta ba ayen dai dii dai ba ŋaaruŋku a nin zaan a chali ga feri tintain tii ale vi chaab a jueli dua nyiamu tɛŋ a moata Libia nyiamu kunkɔŋni nɔi la. Dila nyiŋ, ba yaa jam a cheŋ maga maga ale basi ate vioku a tusi ŋaaruŋku a ta a cheŋ. 18Va kpioŋku kasim jam a fɔbi ka dila ate nyamiisaŋa a yiri a jueli wein a jam a lo. Vari ale ga veenti la, ba yaa piilim a kɔlim ŋantaŋa ŋaaruŋku po a yuk a basi nyiamu po. 19Daa ŋatawa danni ba yaa pai nisima a pai ŋan baai ate ti ta a nye ate ŋaaruŋku a zaani ale a cheŋ la gela a yuk basi nyiamu po. 20Daaŋa a jam piisi ka nna yegayega alege ti an jam baga a pai nimbiri tu wenbinni yaase chiŋmarisa. Vioku mɛ abe kasim jam a fɔbi ka dila. Ti ŋman jam ka yiila ayen ti le vuugi.

21Ba ale ga cheŋ ate ku beni alege ba an dɛ ŋandiinta la, Pɔɔl yaa yiti zaani ba niŋ a weeni ba ayen, <<Nidoaba, ku poom magsi ka ni ti wom mi ate ti kan poom ŋman zaani Kariti a dam cheŋ. Nna po de ti ti poom kan nya kaasuŋku de ale ŋantaŋa de ate ti jɔk la. 22Alege yɔgyɔgla de, ni yik nidek. Ni wanyi mɛ a kan kpi. Ka ŋaaruŋku nyiini ale ku kaasi. 23Deemwa yokku Wen maarɔ ale nyini Wen dii ale soa mi ate mi a puusi wa la a jam mi jigi 24a weeni mi ayen, <Pɔɔl, kan chali yɔgsum, ku a fɛ kama ate fi zaani Siiza niŋ. Wen abe tulisi fi puusaŋa kama ayen nuruma de wanyi mɛ la a kan kpi.> >>

25Pɔɔl yaa weeni nuruma ayen, <<Dila nyiŋla, nidoaba, ni yik nidek, m ta siaka ale Wen kama ayen wa ale weeni mi diila, dila dekdega le ku nye. 26Alege ti cheŋ paari tɛŋ kanyi ate nyiam gilim ka la.>>

27Ti kasim jam bo ka nyakpiem buui po ate ba a wi ayen Adariya#27:27 Adariya Nyiamu a bo ka Nyakpiemu kpeglika jigini. la po a va vioku ate ku fɔbi ti a ta a cheŋ la. Ku jam ka yok kuui ale saari yogta pi ale tinaansiwa la goota suŋsuŋ ate baai ale a tom ŋaaruŋku po la, a yaa poli ayen ti boro a moata tɛŋ yɔgla. 28Dila nyiŋla, ba yaa pai miik a bobi jaab dobruk nyiŋ a yaa basi ate ku siŋ nyiamu po a nya ale ku limisa ka nna yegayega. Ku ale ga nye magadek la, ba yaa ŋman magsi nya ate ku ŋman limisa yegayega. 29Damdɔma a jam yɔgsa kama ayen ti le nak ka pinaŋa, dila ba yaa pai kutuk dobrita tinaansi a bobi basi nyiamu po ale a puusi ayen vari veenti. 30Baai ale a tom ŋaaruŋku po la, a jam pii ka nyiŋ ayen ba chali bɛ. Ba yaa foli ŋaaruŋ fiika a basi nyiamu po ale ge yaa velim ayen ba boro a foli ka kuta dobrita ti chaab ŋaaruŋku niŋ. 31Alege Pɔɔl yaa weeni tugurik tɔŋdɔba kpagni ale tugurik tɔŋdɔma ayen, <<Ŋaaruŋku tuimtomdɔma de a dan kan bo ŋaaruŋku po, ni kan vuugi.>> 32Tugurik tɔŋdɔma yaa gebi mi sii ale yik ŋaaruŋ fiika a ta la a basi nyiamu po.

33Vari yaa jam moata ka veentika ate Pɔɔl yaa weeni ba ayen ba dɛ ŋandiinta yɔgla. Pɔɔl yaa ŋman pilim weeni ba ayen, <<Daa pi ale ŋanaansi ale jinla ate ni kasim a limisi a jam paari yɔgyɔgla de alege ni an diem dɛ jaaboa. 34Dila nyiŋ ate mi a weeni ni ayen ni dɛ ŋandiinta. Ku a fɛ kama ayen ni dɛ ate ni vuuk. Wen weeni mi kama ayen ni zuimaŋa zuisaŋa kanyi la a kan bɛ.>> 35Pɔɔl ale ga weeni nna a nueri la, wa yaa pai boroborok puusi a te Wen a nye wa jiam ba meena niŋ, a yaa wɛ boroboroku a piilim ŋɔbika. 36Ba yaa yik badek meena a dɛ ŋandiinta. 37Baai meena ale jam bo ŋaaruŋku po la a jam ka nuruba kobsiye ale pisiyopɔi ale bayuebi. 38Waai meena ale dɛ chak la, ba yaa kɔlim ŋanbieŋa meena a yuk basi nyiamu po ale ge ayen ŋaaruŋku a valima maga.

39Vari ale veenti la, ŋaaruŋku tuimtomdɔma yaa nya kunkɔŋni dinyi alege ba an jam miŋ ale ka juijui kunkɔŋi la. Ba jam nya ka nyakpiemu gugoruk kunyi ale tintain busuŋ a dua jueli maga ate ba yaa poli ayen ba dan baga abe ba dam ŋaaruŋku a ga zaani dula. 40Ba yaa gebi kuta tii ale jam yik ŋaaruŋku a zaani la miisaŋa yaa basi ate ti a cheŋ nyiamu po. Diipo ate ba boro a gebi kutaŋa miisaŋa la, ba jam maa foli dakpien tii ale bobi maŋ ŋaaruŋku ŋaaŋka ate nuruba pai a dam ku la ayen ba yaa pai tila a dam ku. Ba yaa zak garuk kuui ale bobi yiga ŋaaruŋku niŋka la ale ge ayen vioku fuk ku a basi niŋ. Ba yaa nye dila a deri a cheŋ kunkɔŋni. 41Alege ŋaaruŋku yaa nak kuŋkutinni ate ku niŋka yaa feri kuŋkutinni an ŋman baga cheŋ. Ku ale nye dila la, nyamiisaŋa mɛ a kasim jam a fɔbi ku ŋaaŋka ate ku a wɛ nna bunabuna a lo nyiamu po.

42Tugurik tɔŋdɔma yaa nye ba popola ayen ba ko ligrɔma meena ate ba waai a kan nya suik a puŋ nyiamu a chali bɛ. 43Alege tugurik tɔŋdɔma kpagni a kan jam a yaali ayen wa ko Pɔɔl. Wa yaa weeni ba ayen ba kan nye dila. Wa jam weeni ba kama ayen waai meena ale baga a dɛ nyiam la, ba yɔk a zi nyiamu po a dɛ jueli kunkɔŋni 44ale ge ate mbala meena a yik ŋaaruŋku daataŋa yaase ku ŋan baai ale kasi a lo la a jueli. Ti meena ale jam nye dii a vuuk a paari kunkɔŋni la ale la.

Currently Selected:

Tuima 27: BWU

Highlight

Copy