Tuima 24

1Daa ŋanu ale jam taam la, kaabteerɔ kpioŋku Ananaiyas ale tɛŋka nisɔmma gela yaa va chaab a cheŋ Siizariya. Ba jam ta ka Tetuulos cheŋ ayen wa biisi te ba. Ba yaa jam Gominawa Feliksi jigi a jam zaani wa niŋ a weeni dii nyiŋ ale soa ate ba a toariŋ Pɔɔl la. 2Ba yaa wi ate Pɔɔl jo ate Tetuulos yaa deri piilim a ŋma wa ayen, <<Feliksi, fi yam buui ate fi pai a nya ti zuk la a basi kama ate ti boro ale suiyɔgni a ta nyini dipo. Ti be seba kama mɛ ayen ka fi yammu nyiŋ ate tagrika kasim a jam ti tɛŋka po ate ti boro ale suiyɔgni. 3Diipo meena wuu ale jiga meena wuu ti kasim a nye ka fi jiam ŋa nyiŋ. 4M be kan yaali ayen m beni fu, alege mi a saalim fu ayen fi le te ti zula a lak tue a wom ti biik gelika de. 5Tama nya kama ale nuruwa de ka nuru biok a ta daanika a jam ti tɛŋka po. Wa a deŋsi ka Juuma ale bo tɛŋzuk de meena la kpa ayen ba nye kpaliŋ ale Aroom demma. Wa be ka nuru baai ate ba a wi ayen Nazaretba la kpagi. 6Wa kasim jam pii ka nyiŋ a nye ayen wa taŋ yenni ate tama yik wa. 7Alege Lisiyas tugurik tɔŋdɔma kpagi kpienni a yaa jam tuesi wa ale pagrim tama jigi. 8Fi dek a dan bek wa bega, fi yaa le miŋ ase ŋade meena ka wensie ya.>> 9Juuma yaa jam pai badek a gum ba po ate ba meena a weeni ayen dii meena ate ba a weeni la ka wensie.

10Gominawa yaa te Pɔɔl suik ayen wa biisi. Pɔɔl yaa piilim ayen,

<<M seba ayen fi chim boteerɔ tɛŋka de ate ku beni ka nna yegayega. Dila nyiŋla, ku te mu suipeentik ate m zaani fi niŋ a biisi vari m dek a basi. 11Yɔgyɔgla de ase fidek a dan bek nuruba wieŋa de fi le wom ayen ka ku da pi ale ŋaye nyiini ale jinla ate mi daam yiti a cheŋ Jerusalem ayen m puusi. 12Diipo ate mi jam jo Wen yenni po la, yaase ba tuka diinaŋa po la, yaase tɛŋka po la, Juuma an nya ale mi a nak nanpaga ale nuru yaase m nye wari dii ale basi ate nuruba tigsi chaab jigi yeŋ la. 13Ba an baga ale sak fu ayen wieŋa de meena ate ba a toariŋ mi la ka wensie. 14Alege mi a weeni nya kude a sak fu kama ayen mi a va ka Kirisita bisaŋa suik kuui ate nuruma de a weeni ayen ku ka venta la, a puusi ti kokpieŋsaŋa Wenni. M be maa ta siaka kama ale Moosis Sinsaŋŋa ale a weeni dii meena la kama. Wen biisiteerɔma mɛ ale ŋmarisi ba gbaŋsaŋa a weeni ŋaai meena la, m ta siaka kama mɛ ale ŋa. 15Mi be ta yiila kama ase nuruma de dek ale ta yiila diila ayen, waai meena, nuru maŋsa ale nuru baata le yiti kum po kama. 16Dila nyiŋla, mi nyiem kasim a pii ka nyiŋ m boka meena po ale m popola po ayen m nye dii ale ka wamaŋ Wen ale nurubiik niŋ la.

17<<Mi ale ga basi Jerusalem ate ku beni maga la, m jam cheŋ kama ayen m te m Kirisita bisa vaanchaama ligra abe m te Wen tiirim. 18Diipo ate mi jam bo Wen yenni po a nye dila la ate Juuma yaa nya mi du. Dila powa ale mi nye weleŋsa nyeka tuini a nueri kama. Dila powa mɛ, nuru boari yaase daanika a jam karo. 19Alege Juuma gela ale jam nyini Asia tɛŋka a jam maa boro. Ku a fɛ kama ayen bala dek a dan ta wari ayen ba toariŋ mu di nyiŋ ba be jam zaani fi niŋ a weeni wa dii ate mi nye kaasi la. 20Yaase fi basi ate nuruma ale za dela la a weeni sak fu diipo ate mi jam zaani kpagi kpiemaŋa niŋ ate ba nya mu la m nin nye wari kaasi. 21Kan daa ka wari dinyi dekki ate mi jam weeni dipo ayen, <Jinla ate mi za nama niŋ ate ni a bek mu beŋŋa de mi ale weeni ayen baai ale kpi la a le yiti kum po kama a ŋman vua la nyiŋ.> >>

22Alege Feliksi a jam seba Yeezu suiku kama, a yaa dak da yoŋ ayen ba biisi biika ale ge a weeni ba ayen, <<Tugurik tɔŋdɔma kpagi kpienni Lisiyas a dan jam, abe m yaa poli nya dii ate m le weeni la.>> 23Feliksi yaa weeni tugurik tɔŋdɔ waai ale a nya Pɔɔl zuk la ayen wa ŋmasi nya Pɔɔl zuk nalimnyiini abe wa basi wa nna fasiyaa yenni po, abe wa basi mɛ ate wa doama a te wa jaabuuri meena ate wa a yaali la.

24Daa maga ale taam la, Feliksi yaa jam ale wa powa Durusila, wa jam ka Juu, a yaa weeni ayen ba ta Pɔɔl a jam wa jigi. Wa jam wom kama ale Pɔɔl a weeni kama ayen ba ta siaka ale Yeezu Kirisitawa. 25Alege Pɔɔl ale a biisi nyemagsika ale seba fidek yikka ale buusa boka la, yɔgsum yaa yik Feliksi ate wa yaa weeni Pɔɔl ayen, <<Fi baga cheŋ yɔgyɔgla de kama. M le ŋman wi fu ate fi jam ase m nin nya suik.>> 26Feliksi ale jam weeni dila la, wa jam a poli mɛ kama ayen da dii dai Pɔɔl ale te wa ligra. Dila nyiŋ wa yaa kasim jam a tom a wi Pɔɔl maga maga a daliŋ ale wa.

27Alege bena ŋaye ale taam la, Gominawa choa yaa jam tagri Feliksi zuk. Gominawa de yuei a jam le Poosiyos Fesitos. Dila powa Feliksi a jam a yaali kama ayen wa nye wari ate Juuma suipeentik. Dila nyiŋ, wa yaa basi ate Pɔɔl bo tugurik tɔŋdɔma nisima po.

Currently Selected:

Tuima 24: BWU

Highlight

Copy