Tuima 23

1Pɔɔl yaa nya tigsuŋku po a weeni ba ayen, <<M mabisa, Izirali demma, mi seba chak kama nalimnyiini ayen a zaani diipo ate mi kasim boro a jam paari jinla la, Wen jigi mi ka wari ya.>> 2Kaabteerɔ kpioŋku Ananaiyas yaa weeni baai ale jam za moata Pɔɔl la ayen, ba fɔbi wa nɔnni. 3Pɔɔl yaa weeni Ananaiyas ayen, <<Wen ale fɔbi fi mɛ. Fi ka pimpaasirɔ. Fi kala ka dula a pai Moosis Sinsaŋŋa a bo mi buusa alege fi zɛ ayen fi a kaasi ka Moosis Sinsaŋŋa ale fi ale a weeni ayen ba fɔbi mi nɔnni la?>>

4Nuru baai ale jam za moata Pɔɔl la a yaa weeni wa ayen, <<Fi kan baga a lɛ Wen kaabteerɔ kpioŋku dila?>>

5Pɔɔl yaa tulisi ba ayen, <<M mabisa, mi poom zɛ ayen wa ka kaabteerɔ kpioŋŋoa. Dii nyiŋla, Wen Gbaŋka a weeni ayen, <Ku a fɛ kama ayen nuru waai kan biisi kpagi dii ale a nya ba zuk la a kaasi.> >>

6Pɔɔl ale ga nya ale nuruma gela ka Sajusiiba, ba gela mɛ Farisiiba la, wa yaa biisi ate ku jueli a weeni kpaŋŋa ayen, <<M mabisa, mi ka Farisii, mi be ka Farisii biik. M be za dela kama ayen ba bo mu buusa boan nyiŋŋa, mi ta yiila kama ayen baai ale kpi la le ŋman yiti kum po kama a ta nyuvuri.>>

7Wa ale weeni dila a magsi chaab ale kpieba le ba ŋman yiti a vua la, Farisiima ale Sajusiiba a yaa deri piilim ta chaab ate dila yaa nye ate ba poori chaab. 8Sajusiiba a weeni kama ayen nuruba a kan ŋman yiti kum po a vua, ba a weeni kama mɛ ayen Wen Maarɔba ale chichirisa karo. Alege Farisiima ta siaka kama ayen nuruba le yiti kum po kama, Wen Maarɔba ale chichirisa boro kama. 9Nuemka yaa jam a jueli nna yegayega ate Sinsak sagrɔma gela baai ale jam maa ka Farisiima la yaa yiti weeni ale pagrim ayen, <<Tama an nya wari dii ate nuruwa de kaasi la. Da dii dai ku ka wensie ayen chichirik yaase Wen maarɔ ale sum jam biisi ale wa.>>

10Nanpaŋŋa a jam pagra ka nna yegayega ate tugurik tɔŋdɔma kpagi kpienni a jam a chali yɔgsum ayen ba nin zaan yik Pɔɔl a dari passi. Wa yaa weeni wa tugurik tɔŋdɔma ayen ba siŋ nuru boanni po a vari Pɔɔl ba jigi a ta jam a nyo yenni po.

11Yok kula dek ate Nyɔnɔwa Yeezu Kirisita jam zaani Pɔɔl tɛŋ a weeni wa ayen, <<Pɔɔl kan a chali yɔgsum. Fi weeni m wie kama a sak nuruba Jerusalem tɛŋka po. Ku be a fɛ kama mɛ ayen fi nye dila dekdega Aroom tɛŋka.>>

12Vari ale ga veenti la, Juuma gela yaa nye tuka ayen ba ko Pɔɔl. Ba yaa jam pɛ ayen ba waai kan dɛ ŋandiinta yaase ba nyu nyiam ka ba nin ko Pɔɔl nueri abe ba dɛ yaase ba nyu. 13Nuru baai ale jam maa chaab a poli nna la, a jam gaam pisinaansi kama. 14Ba yaa cheŋ Juuma Yenni kpaŋŋa ale nisɔmma jigi a weeni ba ayen, <<Tama maa ka chaab a pɛ ayen ti kan dɛ jaaboa ka ti nin ko Pɔɔl. 15Yɔgyɔgla de, ni ale kpaŋŋa meena abe tom weeni Aroom tugurik tɔŋdɔma kpagi kpienni ayen wa ta Pɔɔl jam. Paasi wa ayen ni a yaali kama ayen ni ŋmasi wom chak dii dek ale boro a magsi chaab ale wa la. Alege tama ale poom gomsi magsi kama ate ti ko wa ale ge ate wa poom nya suik a paari dela jigini.>>

16Alege ba ale jam a biisi nna meena la, Pɔɔl toa biik, yaa wom ba ale a biisi dii la, a yaa cheŋ yeri diipo ate ba lik Pɔɔl la a weeni sak wa. 17Pɔɔl yaa wi tugurik tɔŋdɔba kpaŋŋa wanyi ayen, <<Ta nidoabinni nna a cheŋ ni kpagi kpienni jigi ale wa ta ka wari ayen wa weeni a sak kpagni.>> 18Tugurik tɔŋdɔba kpagni yaa ta wa cheŋ kpagi kpienni jigi a weeni wa ayen, <<Pɔɔl waai ate ti yik a lik la ale weeni ayen m ta nidoabinni de a jam fi jigi ale wa ta ka wari ayen wa weeni a sak fu.>>

19Kpagi kpienni dek yaa yik nidoabinni nisima a ta wa a taam nakpiak a bek wa ayen, <<Ka boa ate fi tara ayen fi weeni a sak mu?>>

20Nidoabinni yaa weeni wa ayen, <<Juuma kpaŋŋa a maa chaab a siak kama ayen, ba bek fu ate fi dan siak abe fi ta Pɔɔl a cheŋ kpagi kpiemaŋa jigi chum. Ba be ale paasi fu kama ase kpagi kpiemaŋa ale sum a yaali wa ayen ba ŋmasi wom dii dek chekki ale boro a magsi chaab ale wa la. 21Alege ba dan weeni dila, kan wom ba, dii nyiŋla, nuruba ale gaam pisinaansi a suk suik a limisi ayen wa dan jam paari abe ba ko wa. Ba pɛ kama ayen ba kan dɛ yaase ba nyu, ka ba nin ko wa. Yɔgyɔgla de ba be gomsi badek a magsi kama a limisi ayen ba wom fi ale ta dii ayen fi weeni a magsi chaab ale wanni de la.>>

22Kpagi kpienni yaa weeni nidoabinni ayen, <<Kan weeni a sak nuru ayen fi weeni wanni de a sak mi.>> Kpagni yaa weeni dila ale ge basi ate nidoabinni kuli.

23Tugurik tɔŋdɔba kpagni yaa wi wa tugurik tɔŋdɔba kpaŋŋa baye a weeni ba ayen, <<Gomsi tugurik tɔŋdɔba kobsiye a magsi ate ba cheŋ Siizariya. Gomsi wusum duerɔba pisiyopɔi ale ba wusumaŋa ale nuruba kobsiye baai ale a kpaliŋ ale gbatta la ate bala meena a gum chaab ale tugurik tɔŋdɔba kobsiyewa ate ku dan nak yok baŋ neok abe fi ta ba cheŋ. 24Ni ta wusuma jam ate Pɔɔl do. Ni ta wa paari du ale nyiŋyɔgsa a ga te Gominawa Feliksi.>> 25Kpagni yaa weeni dila ale ge yaa ŋmarisi gbaŋ ayen ba ta ga te Gominawa. Wa ale ŋmarisi gbaŋka a weeni diila ale nna ayen,

26<<Mi, Kilɔdiyus Lisiyas ale a ŋmarisi gbaŋka de a te fi Feliksi waai ale ka Gomina a nya ti meena zuk la.

<<Mi a puusi fu nalimnyiini.

27<<Juuma a yik nuruwa de, Pɔɔl kama ale pagrim ayen ba ko. M be wom kama ayen wa ka Aroom denɔ ate mi yaa cheŋ wa jigi ale tugurik tɔŋdɔma ayen m vari wa a basi. 28Mi abe jam a yaali kama ayen m miŋ wa dii ate wa kaasi la ate ba a toariŋ wa la. Dila nyiŋ ate mi yaa ta wa cheŋ ba kpagi kpiemaŋa jigi.

29<<M be nya kama ale wa an nye wa dii ale magsi ba ko wa yaase ba ta wa ga lik la. Ka badek Sinsaŋŋa vaka nyiŋ ale soa ate ba a toariŋ wa.

30<<Mi ale wom ale ba a poli ayen ba paasi a ko wa la, m yaa deri weeni m tugurik tɔŋdɔma ayen ba ta wa jam fi jigi. M be weeni baai ale a toariŋ wa la kama ayen ba ta beŋŋa meena jam bek wa fi niŋ.>>

31Tugurik tɔŋdɔma yaa nye ba kpagni ale weeni ba diila. Ba yaa yik Pɔɔl yok kula a cheŋ dila a ga paari Antipatirisi. 32Vari ale veenti la, tugurik tɔŋdɔ baai ale jam a cheŋ naŋsa la, yaa pilim ŋmani Jerusalem ale ge basi tugurik tɔŋdɔba baai ale jam do wusumaŋa la ate ba a cheŋ ale wa. 33Ba yaa ta Pɔɔl cheŋ Siizariya a ga paari, pai gbaŋka a te Gominawa a yaa pai Pɔɔl a nyo wa nisima po. 34Gomina yaa karim gbaŋka ale ge yaa bek Pɔɔl ayen, <<Fi nyini ka tɛŋ boa?>> Gominawa ale miŋ ayen Pɔɔl nyini ka Silisiya la, wa yaa weeni Pɔɔl ayen, 35<<Mi le wom dii ate fi ta la ase baai ale a toariŋ fu la a nin jam.>> Gominawa yaa weeni tugurik tɔŋdɔba ayen ba basi Pɔɔl yenni po abe ba nya wa zuk nalimnyiini. Ye kpienni de jam ka Naawa Ayerod ale se di.

Currently Selected:

Tuima 23: BWU

Highlight

Copy