Tuima 22

1Pɔɔl yaa piilim wa biika ayen, <<M suata ale m koba, ni lak tue wom mi ale za ni niŋ ayen m biisi a vari m dek a basi diila.>> 2Ba ale wom ale wa a biisi ale badek biika Yiburu la, ba yaa ŋmasi goori nna chorototo ale ge ate Pɔɔl a biisi a cheŋ a weeni ayen,

3<<Mi ka Juu. Ba biak mu ka Taasus tɛŋka kaai ale bo Silisiya po la. Alege mi chim ka Jerusalem dela a zamsi nyini sagrɔ waai ate ba a wi ayen Gamaliil la jigi, waai ale kpesi sak mu wari meena a ta va ti kokpieŋsaŋa sinsaŋŋa. Mi jam tom a te Wen ale ka nimmuna, ase nama baai ale bo dela jinla de la. 4Mi namsi baai ale a va Yeezu la ka nna yegayega a poom jam a bobi ba gela nidoaba ale nipooba ta ba ga a lik, ale ko ba gela mɛ. 5Ni dan bek Wen yenni kpagi kpienni ale kpaŋŋa meena, ba le siak ayen mi ale a biisi diila ka wensie. M jam tuesi gbaŋsa ba jigi ate ba ŋmarisi a te ti mabisaŋa Juuma mɛ baai ale bo Damasikus tɛŋka la ayen mi cheŋ dula a ga yik baai ale a va Yeezu la a pai chɔrima bobi ba a ta jam Jerusalem ate ba nya waalika.

6<<Ase mi ale jam bo suiku po a cheŋ moata Damasikus tɛŋka la, wenbinni jam bo ka wein zuk suŋsuŋ ate wenŋmazuk a deri nyaksi a gilim mu. 7Mi yaa lo tɛŋ a wom ale lueluk a weeni mi ayen, <Sɔɔl, Sɔɔl, ka boa ate fi a namsi mu nna?> 8Ate mi yaa bek wa ayen, <Ka wana, m Nyɔnɔ?> Wa yaa tulisi ayen, <Ka mi, Yeezu, Nazaret denɔwa ate fi a namsi dila.> 9Nidoa baai ale jam maa va mi a cheŋ la, a jam nya nyaksika kama alege ba an jam wom lueluku ale jam a biisi dii ale mi la. 10Mi yaa bek ayen, <Mi le nye ka sɛ m Naawen yaa?> ate ti Nyɔnɔwa Yeezu Kirisita yaa weeni ayen, <Yiti cheŋ Damasikus. Dula jigini fi le wom dii meena ate mi a poli ayen fi nye la.> 11Nyaksi kaai ale jam nyaksi la, a jam basi kama ate m deri yi. M vaanchaama baai ale jam maa va mu la, a yaa yik m nisima a ta mu cheŋ Damasikus.

12<<Dula jigini, nuru wanyi, wa yuei jam le Ananaiyas. Wa jam ka wensuik nyɔnɔ. Wa jam a zuli Moosis Sinsaŋŋa kama. Juuma meena ale jam bo dula la a jam a te wa zula kama. 13Wala yaa jam mi jigi a zaani m tɛŋ a yaa weeni mu ayen, <M suok Sɔɔl, lak fi ninaŋa.> Mi yaa deri lagri ŋa a yaa nya wa 14ate wa deri weeni mi ayen, <Ti kokpieŋsaŋa Wenni ale lueri fu ayen fi seba wa ale a yaali diila, abe fi nya wayɔrisima Tomteerɔwa, abe fi wom wadek lueluku. 15Fi ale chim wa seerɔ a weeni waai meena fi ale nya ale wom diila. 16Fi be ŋman a limisi ka boa jaab yɔgyɔgla de? Yiti, a tuesi soka abe fi puusi a wi wa yuenni ate wa sugri fi wabaataŋa a basi.>

17<<Mi ale ŋmani Jerusalem la, mi yaa bo Wen yenni po a puusi, ku yaa nye mi jigi nna ase gɔdaasima la 18ate mi nya ti Nyɔnɔwa Yeezu Kirisita ate wa yaa weeni mi ayen, <Nye nwuli basi Jerusalem yɔgyɔgla de dii nyiŋla nuruma dela jigini a kan siak fi ale a biisi dii a magsi chaab ale mi la.> 19Mi yaa weeni Wa ayen, <M Nyɔnɔ Yeezu, ba seba chak kama ayen ka mi ale cheŋ tama tuka yeeŋa po a yik baai ale ta siaka ale fi la a nak ale a lik ba mɛ. 20Ba ale jam yik Sitiven a ko ayen wa ale jam a sak nuruba fi wieŋa la nyiŋ, ka mi dek abe ale jam maa boro a siak ayen ba ko wa. Be ka mi ale jam a nya baai ale ko wa la kasaautaŋa zuk.> 21Ti Nyɔnɔwa Yeezu Kirisita yaa weeni mi ayen, <M le basi ate fi cheŋ nna niŋniŋa baai ale kan daa Juuma la jigi.> >>

22Nuru boanni a jam a wom Pɔɔl kama ate wa ga biisi nna la. Ba yaa piilim a na ayen, <<Ni ko wa, ni yeeri wa tɛŋzuk de a basi, ni kan basi ate wa vua.>> 23Ba yaa jam a kaari a yik ba gattaŋa a kpaanti ale ŋari tintanta a yuk a basi wenzuk. 24Aroom tugurik tɔŋdɔma kpagi kpienni yaa weeni wa tugurik tɔŋdɔma ayen ba ta Pɔɔl a ga jo tugurik tɔŋdɔma yenni po, a miiri wa ate wa weeni a sak ba jabuui nyiŋ ale soa ate Juuma a kaari ayen ba kan yaali wa la. 25Ase tugurik tɔŋdɔma ale chamsi wa a nya a gomsi ba miiri wa la, Pɔɔl yaa weeni kpagi dinyi ale jam moata wa la ayen, <<Fi ta suik a nak Aroom tɛŋka denɔ waai ale kan kaasi wari yaa?>>

26Tugurik tɔŋdɔba kpagni ale wom nna la, wa yaa ga bek Tugurik tɔŋdɔma kpagi kpienni ayen, <<Fi a nye ka boan dila? Fi zɛ ayen nuruwa dɛ ka Aroom denɔ?>>

27Kpagi kpienni yaa cheŋ Pɔɔl jigi a ga bek wa ayen, <<Weeni a sak mu, fi ka Aroom denɔ?>> Pɔɔl mɛ yaa tulisi ayen, <<Mm.>>

28Kpagi kpienni yaa weeni ayen, <<Mi tuni ka ligra nna yegayega ale ge a chim Aroom denɔ.>> Pɔɔl yaa tulisi ayen, <<Alege a nyini mi biam po mi ka Aroom denɔ.>>

29Nuru baai ale jam gomsi ayen ba miiri Pɔɔl la ale wom nna la, yaa pilim ŋmani ŋaaŋ ale ge basi Pɔɔl. Yɔgsum yaa yik kpagi kpienni dii nyiŋla wa ale jam miŋ ayen Pɔɔl ka Aroom denɔ alege bobi wa ayen ba nak wa la.

30Wa jam a yaali kama ayen wa seba a chak dii nyiŋ ale soa ate Juuma a ŋma Pɔɔl la. Dila nyiŋ vari ale ga veenti la, wa yaa foli Pɔɔl chɔrimaŋa ale ge a wi kaabteerɔ kpaŋŋa ale Juuma tɛŋka kpaŋŋa ayen ba nye tuka. Wa yaa ta Pɔɔl a cheŋ ga zaani ba niŋ.

Currently Selected:

Tuima 22: BWU

Highlight

Copy