Tuima 21

1Ti ale ga banti ba nueri la, ti yaa jueli ŋaaruŋku a cheŋ yɔrr a jam paari Kosi tɛŋka. Vari ale veenti la, ti yaa paari Aroodisi tɛŋka a zaani dula a taam paari Pataara tɛŋka. 2Dula jigini, ti yaa nya ŋaaruŋ ale ku a cheŋ Fonisia tɛŋka. Ti yaa jueli ŋaaruŋ kula a maa va cheŋ. 3Ŋaaruŋku yaa le paari jigi ate ti jam baga nya Saipurus tɛŋka la, a yaa dam va tɛŋ kala yeniŋ a juga geŋ a ga paari Siriya tɛŋka. Ti ale jam paari Taaya la, ti yaa siŋ dii nyiŋla ka dula jigini ate ŋaaruŋku nyama a jam a yaali ayen ba yeeri ba kɔlimaŋa. 4Dula jigini, ti yaa gisi nya Kirisita bisa a goa dula ale ba ate ku paari daa ŋayopɔi. Wen Chiika yaa basi ate ba kaam Pɔɔl ayen wa kan cheŋ Jerusalem. 5Ti ale jam boro ale ba ate ti danni jam paari ayen ti basi ba la, ti yaa banti ba ale ŋman lo ti chelimu po. Ti ale jam banti ba ale ge ayen ti cheŋ la, ba meena ale ba pooba ale ba bisa ale jam ta ti a nyini tɛŋka po a ta ti jam paari nyakpiemu nɔi. Dula jigini ti meena yaa maa chaab a kpi duna tɛŋ a puusi 6ale ge banti chaab ate tama mɛ jueli ŋaaruŋku a cheŋ ale ge ate ba ŋman a kuli.

7Ti yaa ŋman lo ti chelimu po a zaani Taaya a jueli ŋaaruŋ a cheŋ Tolomayas tɛŋka. Dula jigini ti yaa puusi Kirisita bisaŋa ale ge goa dai yeŋ. 8Vari ale ga veenti la, ti yaa basi dula ale ŋman cheŋ Siizariya. Dula jigini, ti yaa jam boro ale Filip waai ale ka Naawen wieŋa moolidɔwa la. Wa jam ka bayopɔiwa po wanyi baai ate Kirisita bisaŋa a lueri ayen ba a nya ligraŋa zuk la. 9Filip jam ta ka lieba banaansi. Ba waai an jam yali nyaya. Ba jam ka Wen biisiteerɔba. 10Ti ale jam goa dula ate ku beni maga la, Wen biisiteerɔ wanyi yaa jam nyini Judia a jam tama jigi. Wa yuei ale Agabus. 11Wa yaa jam pai Pɔɔl chiak gbanni a bobi wadek naŋsa ale wa nisima ale weeni tama ayen, <<Wen Chiika ale weeni diila, ale nna, ayen, Juuma Jerusalem tɛŋka po ale yik ka di nyɔnɔwa a bobi ase nna la a yaa pai wa a te baai ale kan daa Juuba la.>>

12Ti ale wom nna la, tama ale mbala ale jam maa bo dula la, yaa maa chaab a saalim Pɔɔl ayen wa kan cheŋ Jerusalem. 13Alege wa yaa tulisi ayen, <<Ka boa ate nama a nye dila, a nye ate m popola a kaasi? Mi poom gomsi magsi kama ayen ba kan bobi mu bobika nyiini Jerusalem, alege m poom gomsi magsi kama ayen m kpi dula jigini Nyɔnɔwa Yeezu yuenni nyiŋ.>>

14Ti an jam baga fɛ wa ate wa wari ya. Ti yaa pai dila basi ale weeni wa ayen, <<Ti a saalim Naawen ayen ku meena abe nye magsi ale wadek ale a yaali diila.>>

15Ti le jam goa dula jigini ate ku beni maga la, ti yaa ŋman gomsi ti kɔlimaŋa a magsi a yiti cheŋ Jerusalem. 16Yeezu ŋaaŋviirɔma baai ale jam nyini Siizariya la gela yaa ta ti cheŋ nuru waai yenni ate ti jam a poli ayen ti goa la. Nuruwa yuei ale Minaason. Wa nyini ka Saipurus. A ta nyini diipo ate Kirisita bisaŋa ale a tu chaab la a piilim boro la ale nuruwa a chim ka Kirisita biik.

17Ti ale jam paari Jerusalem la, ti suataŋa Kirisita bisaŋa a jam nye ti tia ka nalimnyiini ale suipeentik. 18Vari ale veenti la Pɔɔl yaa maa va ti a cheŋ ayen wa nya Jeemsi. Kirisita bisaŋa ale a tu chaab la nisɔmma meena a jam maa boro kama. 19Pɔɔl yaa puusi ba ale ge a tɔgi wari meena dinyi dinyi a sak ba Wen ale va wa tuimaŋa nyiŋ a tom dii a te baai ale kan daa Juuba jigi la. 20Ba ale wom wa a nueri la, ba meena yaa te Wen pimpauk. Ba yaa weeni ayen, <<Ti suowa, fi nya Juuma ale piisi dii chim Kirisita bisa la kama. Fidek be nya ba ale kasim a yaali ayen nuruba a va sinsaŋŋa la kama. 21Nuruba weeni ba kama ayen ka fi ale a sak Juuma meena baai ale bo tɛŋ sii ale kan daa Juuba tɛŋsa la, ayen ba kan a va Moosis Sinsaŋŋa abe ba kan a gebi ba bisaŋa yoaŋa yaase ba kan a va Juuma kisitaŋa. 22Yɔgyɔgla de ti ale nye ka sɛ? Ku a fɛ kama ayen ba wom ayen fi jam ya. 23Tama ale a yaali ayen fi nye diila ale nna. Nuruba banaansi ale bo dela jigini a puulim ale Wen.#21:23 Tuima 18:18; Niŋdeerɔba 13:1-5; Chiinika 6:9-12 24Maa va ba a pai fidek a gum ba po a cheŋ a ga nye ba ale ba nye dii ate ba welema Wen jigi la. Tuni pami dii meena ate ba le tuni abe ba nya weleŋsaŋa dɛ la. Fi dan nye dila ba le nya suik a poni ba zuimaŋa yɔgla. Suik kula po, nuruba yaa le seba ayen wie ŋaai meena ate nuruba weeni a magsi chaab ale fi la, wensie fiik fiik la a ka ba biika po, alege ba le nya ayen fidek fi boka po, fi a va ka Moosis Sinsaŋŋa ale a weeni diila. 25Alege baai ale kan daa Juuba a yaa chim Kirisita bisa la, gbaŋ kaai ate tama ŋmarisi ayen fi ta ga te ba la, ti weeni ba kama ayen, ba kan a dɛ bɔgta ŋandiinta, ba kan a dɛ ziim ba a kan ŋɔbi jabuui ate ba an tɔgri la lammoa, abe ba kan a bobi nipok baai ale kan daa ba pooba la a goa.>>

26Vari ale veenti la, Pɔɔl yaa dɛ nuruma niŋ ate ba cheŋ a ga nye dii ale dii ale di basi ate ba chim cheri nuruba. Pɔɔl yaa jo Wen yenni po a weeni ku a le pai daa ŋaai ate cheri nyaka tigini de a nueri abe ku ge ate ba yaa nya suik ate ba nye kaabka a te ba wanyi wanyi la.

27Ku jam pai ka daa ŋayopɔi ate weleŋsa nyaka tigini de a taam. Alege ku ale jam tali maga ate ŋa nueri la, Juuma gela baai ale jam nyini Asia la yaa nya Pɔɔl Wen yenni po. Ba yaa choa nuru boanni meena a yik Pɔɔl ale pagrim, 28a yaa nuem ate ku a jueli ayen, <<Izirali demma, ni maari ti, nuruwa de ale a nyiem jigi meena a sak ayen Moosis Sinsaŋŋa daa sinsak maŋsa ale biisi a kaasi ti nuruma ale Wen yenni. Wa ta ka baai ale kan daa Juuba la a jam Wen yenni po ale nye ate jigi weleŋka a taŋ.>> 29Ba jam weeni kude kama dii nyiŋla, ba jam nya ka Torofimus waai ale nyini Efisos la ale wa va ka Pɔɔl a nyiem tɛŋka po ate ba yaa deri poli ayen da dii dai Pɔɔl a ta wa jam jo ka Wen yenni po.

30Nuruma meena Jerusalem po sue yaa jam puuri. Ba yaa gum chaab chali ga yik Pɔɔl a vuuri wa a ta nyini Wen yenni po a nyini ale lik di tuataŋa. 31Ba ale jam boro a poli ayen ba ko Pɔɔl la, tuntomiŋ yaa jam paari Aroom tɛŋka tugurik tɔŋdɔma kpagi kpienni ayen wa nya Jerusalem tɛŋka meena demma boro a nye ka kpaliŋ nna ŋaglam. 32Kpagi kpienni yaa deri yik kpaga fiisaŋa gela ale tugurik tɔŋdɔba ate ba yaa chali siŋ nuru boanni jigi. Nuru boanni ale nya wa ale tugurik tɔŋdɔma la, ba yaa basi Pɔɔl nagta. 33Kpagi kpienni yaa taam cheŋ Pɔɔl jigi a yik wa ale pagrim a yaa weeni ayen tugurik tɔŋdɔma pai chɔrima ŋaye a bobi wa. Wa yaa bek ayen, <<Ka be denɔ ale nna? Wa nye ka sɛ?>> 34Nuru boanni yaa deri a nuem ate ku a jueli. Ba gela a nuem a weeni wari di choa, ba gela mɛ a nuem a weeni di choa. Juuma yaa nye nna ŋaglam ate kpagi kpienni an jam baga miŋ wari dii ate Pɔɔl nye la. Wa yaa weeni wa tugurik tɔŋdɔma ayen ba ta Pɔɔl cheŋ juijui ate tugurik tɔŋdɔma boro la. 35Ba ale jam ta wa a jueli dɔkku tiilaŋa zuk la, nuru boanni sue yaa ŋman ŋmasi jam a puuri nna yegayega. Dila nyiŋ ku yaa jam fɛ tugurik tɔŋdɔma ate ba koati Pɔɔl a ji. 36Nuru boanni a kasim jam a vi wa kama ale a kaari a weeni ayen, <<Ko wa.>>

37Tugurik tɔŋdɔma ale jam tali maga ate ba ta wa jo yenni po la, Pɔɔl yaa weeni kpagi kpienni ayen, <<Mi a saalim, m weeni wari a sak fu?>> Kpagni yaa bek wa ayen, <<Fi a wom Girik biika kama? 38Mi poli ayen fi ka Ejipiti denɔ waai dipo ale jam nye kpaliŋka ale tɛŋka nyɔnɔwa ate ku an diem beni la, a ta nuru koorisa tusa ŋanaansi (4,000) a nyini sagni po a nyini la?>>

39Pɔɔl yaa tulisi wa ayen, <<Aaya, mi daa wala, mi ka Juu. Ba biak mu ka Taasus tɛŋka kaai ale bo Silisiya po la. M be nyini ka tɛŋ kpieŋ kaai yuei ale yiti nna yegayega la po. Mi a saalim ayen fi te mu suik ate m biisi ale nuruma.>>

40Kpagi kpienni yaa te wa suik ate Pɔɔl yaa zaani tiini zuk a zak nisima ayen nuruma goori ate wa biisi. Ba ale ga goori la, Pɔɔl yaa pai Juuma biika Yiburu a biisi ale ba.

Currently Selected:

Tuima 21: BWU

Highlight

Copy