2 Samuel 19

1Ba jam weeni Joab kama ayen, <<Naawa a kum kama Absalom nyiŋ.>> 2Tugurik tɔŋdɔma meena dai dila danni nak dɛka a tulim chim ka kumsa, dii nyiŋla dai dila danni ate tugurik tɔŋdɔma a wom la a weeni kama ayen, <<Naawa a kum ka wa biika nyiŋ.>> 3Nuruma a suk jo tɛŋka po kama, ase nuruba ale chali kpaliŋ po ate chivie ta ba ate ba suk a jo tɛŋ po diila. 4Naawa a lik wa nimbieŋa ale kaari ate ku a jueli ayen, <<M biika Absalom! Absalom m biika, m biika!>>

5Ate Joab yaa jo yenni po naawa jigi a weeni wa ayen, <<Jinla fi valiŋ fi nuruma meena kama, baai ale vari fi nyuvunni ale fi nidoabilisaŋa ale fi liema ale fi pooma ale fi nɔŋtaŋa nyuvooŋa a basi la. 6Fi a yaali ka baai ale kisi fu la ale kisi baai ale a yaali fu la. Fi basi ate ti jinla seba kama jassi ayen tugurik tɔŋdɔma kpaŋŋa ale ba nuruma a ka kiri a te fu. Mi nya kama ayen fi sui ate peenti kama ase Absalom a nin vua jinla alege ate tama meena a kpi. 7Yɔgyɔgla de nyini a te fi nuruma nyiŋbiiri. Mi pɛ Naawen nyiŋ ayen fi dan kan nyini ya, nuru yeŋ mɛ la a kan bo le fu alege ate tɛŋ a sobi. Kude ale bie a te fu a gaam kaasuŋ kuui meena ale jam fi zuk a nyini fi biik po a jam paari yɔgyɔgla de la.

8Naawa yaa yiti a ga kali nansuiŋku nɔi. Ba le weeni nuruma ayen, <<Naawa a kali ka nansuiŋku la,>> ba meena yaa jam wa niŋ. Dila po meena, Izirali demma a chali kama a kuli ba yieŋa. 9Izirali yie zuimaŋa po meena, nuruma jam a nak ka nanpaga ale chaab a weeni ayen, <<Naawa a vari ti kama ti dachaasaŋa nisima po a basi. Wa le vari ti Filistia demma nisima po a basi. Alege yɔgyɔgla de wa chali kama ale ge tɛŋka Absalom nyiŋ. 10Absalom waai ate tama bobi ayen wa a nya ti zuk la a kpi kama kpaliŋka po. Dila nyiŋ ka boa ale soa ate tama a kan biisi naawa ta ŋman jamka wari ya?>>

11Naab Deevid yaa te tontomiŋka de Zadok ale Abiata kaabteerɔma ayen, <<Bek Juda nisɔmma ayen, <Ka boa ale soa ate nama a wari ŋaaŋ a ta mi naawa a ŋman jam wa yenni, dii meena ate ba toalim biisi Izirali po meena la ale paari naawa wa yenni la? 12Ni ka mi suata, mi dek nyiŋ lam ale ziim. Dila nyiŋ ka boa ale soa ate nama a wari ŋaaŋ a ta mi naawa a ŋmani?> 13Abe ni weeni Amasa ayen, <Ni daa mi dek nyiŋ lam ale ziimoa? Wen abe nye ale mi abe ku kasim a jo m nyiŋ, ase yɔgyɔgla de a cheŋ fi nin kan tagri Joab zuk a chim tugurik tɔŋdɔma kpagi ya.> >>

14Wa tulim Juda nuruma suiniima ase ba ka nuru yeŋ la. Ba tom wari te naawa ayen, <<Fi ale fi nuruma meena ŋmani. 15Ate naawa a ŋmani a cheŋ a ga paari Jodan Benni. Yɔgyɔgla de Juda nuruma a jan jam ka Gilgal ayen ba nyini a ga tu naawa a ta wa lo Jodan Benni a jueli. 16Gera nidoabinni Simei ale ka Benjamin buuni po la a nyini Bayurim la, yaa nye mwuli a siŋ ale Juda nuruma ayen wa tu naab Deevid. 17Benjamin dem tusidi ale Ziba waai ale jam a nya Sɔɔl yenni zuk la, ale wa nidoabilisa pi ale banuwa ale tomteerɔba pisiye ale jam va wa. Ba yaa nye mwuli a cheŋ Jodan Benni, juijui ate naawa a boro la. 18Ba yaa lo beli kpienni jueli ayen ba ta naawa ale wa yenni demma a jueli abe ba nye wa le a yaali diila. Gera nidoabinni Simei ale lo Jodan jueli la, wa yaa lo naawa niŋ 19a weeni wa ayen, <<Mi nyɔnɔwa kan yik mi ate mi nye foolaa. Kan teeri fi tomteerɔwa ale nye kaasi dai dii dai ate mi nyɔnɔwa naawa a basi Jerusalem la. Naawa abe yeeri ku wa popola po. 20Mi fi tomteerɔwa a seba ayen wa nye a kaasi, alege jinla mi jam dela kama ase waai ale dɛ niŋ Josefi yenni meena po la a jam dela ayen m tu m nyɔnɔwa naawa.>>

21Zeruiya nidoabinni Abisai a yaa weeni ayen, <<Ku a magsi ayen ba ko Simei kude nyiŋŋa? Wa ka te Naawen ale bobi waai la kama.>>

22Deevid yaa tulisi ayen, <<Nama ale mi ta ka boan wari a nye ale chaaba, Zeruiya nidoabilisa? Jinla danni ni chim ka mi dachaasa. Ba ko waai Izirali tɛŋka po jinla? Mi zɛ ayen jinla mi ka naab a nya Izirali zuwa? 23Naawa yaa weeni Simei ayen, <<Fi kan kpi.>> Ate naawa yaa puulim pumpuulima a te wa.

24Sɔɔl ŋaaŋbiika Mefiboset mɛ jam cheŋ ayen wa tu naawa kama. Wa an jam nya wa naŋsaŋa zuwa yaase wa che wa nɔi kɔbtaŋa yaase wa sugri wa gattaŋa a nyini dai dii danni ate naawa a basi la a ga paari dai dii danni ate wa ŋmani sɔŋsɔŋ la. 25Wa le nyini Jerusalem jam ayen wa tu naawa la, naawa yaa bek wa ayen, <<Ka boa ale soa ate fi an cheŋ ale mi, Mefiboset?>>

26Wa yaa tulisi ayen, <<Mi nyɔnɔwa naawa, fi tomteerɔwa ale toalim ka gbaniŋ la, mi weeni kama ayen, <M le gomsi m boniŋka a do ka, ate m baga a cheŋ ale naawa.> Alege mi tomteerɔwa Ziba a pai mi a da. 27A kaasi mi fi tomteerɔwa yuei a te mi nyɔnɔwa naawa. Mi nyɔnɔwa naawa a nye ase ka Wen maarɔ la, dila nyiŋ nye dii ale peenti fi sui la. 28Mi kokpieŋka ŋaaŋbisaŋa meena an magsi ba nya jaab fi jigi ya alege ka kum nyiini mi nyɔnɔwa naawa jigi, alege fi te fi tomteerɔwa jigi baai ale a de ale fu la po. Dila nyiŋ mi ta ka boan jaab suik a saalim naawa?>>

29Naawa yaa weeni ayen, <<Ka boa ate fi biisi a gaam a taamu? Mi te fi ale Ziba ka suik ayen ni labi laŋsaŋa.>>

30Mefiboset yaa weeni naawa ayen, <<Basi ate wa pai jaab meena, yɔgyɔgla de ate mi nyɔnɔwa naawa a paari yeri nalimnyiini la.>>

31Gilead denɔwa Barzillai mɛ a nyini ka Arogelim a siŋ lo Jodan jueli ale naawa abe wa tom wa a ta nyini dula a cheŋ. 32Barzillai jam kpaŋ kama. Wa jam ka bena pinaanuŋ. Wa le jam a te naawa ŋanta wa le jam bo Mayanaim la, diila wa jam jigsi kama. 33Naawa yaa weeni Barzillai ayen, <<Lo jueli ale mu a bo ale mu Jerusalem, ate m nya fi zuk.>>

34Alege Barzillai a tulisi naawa ayen, <<Ka bena dina ate mi ale goa, ate mi a cheŋ Jerusalem ale naawa? 35Yɔgyɔgla de mi ka bena pinaanuŋ. Mi baga a gaari dii ale nala ale dii ale kan nala? Mi fi tomteerɔwa a baga a lam jabuui ate wa a de ale a nyu la? Mi diem baga a wom nidoaba ale nipooba yi siarɔba luelita? Ka boa ale soa ate mi fi tomteerɔwa a chim jibta a gum du a te mi nyɔnɔwa naawa? 36Mi fi tomteerɔwa ale lo Jodan a jueli kama ale naawa wa kan ga niŋŋa, alege ka boan le soa ate naawa a tuni mi nna? 37Basi ate mi fi tomteerɔwa a pilim ŋmani, ate m kpi m dek tɛŋ ka po a moata m kowa ale m mawa boosuku. Alege fi tomteerɔwa Kimyam. Basi ate wa lo jueli ale mi nyɔnɔwa naawa. Nye dii ale a peenti wa sui la te wa.>>

38Naawa yaa weeni ayen, <<Kimyam ale lo jueli ale mi, ate m nye dii meena ale a peenti fi Barzillai sui la a te wa. Ate dii meena fi a yaali mi jigi la m le nye te fu.>>

39Nuruma meena yaa lo Jodan jueli. Ate naawa a gbaari Barzillai ale te wa wa niauŋku, ate Barzillai yaa ŋman kuli.

40Naawa ale lo jueli Gilgal la, Kimyam yaa lo jueli ale wa. Juda tugurik tɔŋdɔma meena ale Izirali tugurik tɔŋdɔma geli ale ta naawa jueli.

41Ku an beni ya Izirali nuruma meena a yaa cheen Deevid jigi ale a weeni wa ayen, <<Ka boa ale soa ate ti suataŋa Juda demma, a zu naawa ale wa yenni demma a ta ba lo Jodan Benni jueli ale wa yenni demma a ta ba lo Jodan Benni jueli ale wa nuruma meena?>>

42Juda nuruma meena yaa tulisi Izirali nuruma ayen, <<Tama nye dila kama dii nyiŋla naawa a moata ka tama. Ka boa ate nama sue a puuri ale kude? Tama de naawa ale te ŋan baai la? Tama pai jaab te ti dega?>>

43Izirali nuruma yaa tulisi Juda nuruma ayen, <<Tama charuku ka naŋtuok nɔi pi ale naawa, be daa di nyiini, tama a soa Deevid kama a gaam nama. Ka boa ale soa ate nama a nye ti ale kisi ka? Daa tama ale dɛ niŋ a biisi ti naawa ta ŋmanika?>> Alege Juda nuruma a tulisi nna vakvak a gaam Izirali nuruma.

Currently Selected:

2 Samuel 19: BWU

Highlight

Copy

Compare